លោកអ្នក បានជ្រាបរួចមកហើយថា កាលពីថ្ងៃទី២៥ ខែកញ្ញា ឆ្នាំ២០២១ អ្នកស្រី ទ្រី ដាណា បានចុះអនុស្សរណៈសហការធ្វើជាដៃគូជំនួញលើអាហារបំប៉នសារាយសមុទ្រ NNP ជាមួយតារាចម្រៀង សួស វីហ្សា និងលោកថមមី។
កន្លងមកឲ្យតែមានកម្មវិធីបែបនេះ មិនដែលរំលង ឧកញ៉ា ហ៊ីង បញ្ញារិទ្ធ ហៅ ពូម៉ៅនោះឡើយ តែតាំងពីពួកគេ មានជម្លោះជាមួយគ្នារួចមក ពូម៉ៅ គ្មានឱកាសមួយនេះទៀតនោះទេ បានត្រឹមតែចែករំលែកអនុស្សាវរីយ៍ចាស់ៗធ្លាប់សាងជាមួយគ្រួសារប៉ុណ្ណោះ។
ជាក់ស្ដែង ក្រោយពី អ្នកស្រី ទ្រី ដាណា ចុះអនុស្សរណៈជាមួយប្ដីប្រពន្ធស្ថិតក្នុងរង្វង់សិល្បៈរួចមក ពូម៉ៅ បានចែករំលែកសារ(ស៊ែរ) កាលពីអំឡុងឆ្នាំ២០១៨ឡើងវិញ ដោយសារនោះ មានខ្លឹមសារថា «តស៊ូព្យាយាមគង់បានសម្រេច»។ ពេលចែករំលែកសារ អមដោយរូបថតពកូន ឡើងវិញនោះ ពូម៉ៅ បានដាក់Captionថា «រូបភាពកម្រងថ្ងៃសម្ពោធក្រុមហ៊ុនដាណាទ្រីខេមបូឌាត្រេឌីខូអិធីឌី។ ថតជាមួយកូនប៊ី បានមួយខួប»។
ដោយឡែក កាលពីថ្ងៃទី២៤ ខែកញ្ញា ឆ្នាំ២០២១ ពូម៉ៅ បានចែករំលែកវីដេអូ កូនរបស់ខ្លួនធ្វើកាយវិការតាមតុក្កតា នៅក្នុងទូរទស្សន៍ ហើយដាក់Captionដ៏កម្សត់ថា «វីដេអូចាស់ប៉ាថតកូន ។ ឥឡូវប៉ា បានត្រឹមតែមើលរូបកូនតាមទូរសព្ទមិនបានថ្នាក់ថ្នមមើលថែកូនដូចមុនទេ»។
គេកំពុងរង់ចាំមើលថាតើការតស៊ូរបស់ពូម៉ៅ ក្នុងការជួបជុំគ្រួសារវិញនោះ បានសម្រេច ឬយ៉ាងណានោះ ព្រោះតាមរយៈសកម្មភាព និងការរៀបរាប់កន្លងមក ឃើញថា ពូម៉ៅ ពិតជាសោកស្ដាយនូវកំហុសរបស់ខ្លួនខ្លាំងណាស់ ហើយចង់ឲ្យពេលវេលាត្រឡប់ក្រោយ ដើម្បី មានឱកាសទៅមើលថែប្រពន្ធកូនដូចពីមុនវិញ។
គួរបញ្ជាក់ថា ឧកញ៉ា ហ៊ីង បុញ្ញារិទ្ធិ ហៅ ពូម៉ៅ បានសម្រេចចិត្តបួសជាព្រះសង្ឃ នៅវត្តពោធិ៍អណ្តែត ក្នុងខេត្តព្រៃវែង កាលពីថ្ងៃទី១៥ ខែកញ្ញា ឆ្នាំ២០២១កន្លងទៅនេះ ហើយនៅថ្ងៃទី២២ ខែកញ្ញា ពូម៉ៅ ក៏បានលាចាកសិក្ខាបទវិញ។
មុននឹងសម្រេចចិត្តបួស ពូម៉ៅ បានព្យាយាមម្ដងហើយម្ដងទៀត ក្នុងការផ្សះផ្សាជាមួយភរិយា តែហាក់មិនទទួលបានផលសោះ។ ដោយហេតុនេះ មុនបួស លោកបងម៉ៅ បានចេញវីដេអូ សុំទោសជាសាធារណៈ១ ដោយរៀបរាប់ថា «ដោយសារតែខ្លួនអស់ជម្រើស សូម្បីតែហ្វេសប៊ុក, តេឡេក្រាម, ប្រព័ន្ធទាក់ទងទាំងអស់ ភរិយារបស់លោក បានប្លុកចោលអស់ហើយ។ ដូច្នេះលោកគ្មានជម្រើសអ្វី ក្រៅពីធ្វើវីដេអូនេះឡើយ ដើម្បីបង្ហាញជូនភរិយាបានឃើញ។
ពូម៉ៅ បានបញ្ជាក់ថា កន្លងមក ខ្លួន និងភរិយា បានឈ្លោះគ្នាពិតប្រាមែន រហូតឈានដល់ការដាក់ពាក្យបណ្ដឹងមិនឲ្យលោកចូលផ្ទះ។ លោកថា នេះមិនមែនជាការសម្ដែងដើម្បីប្រយោជន៍ ដូចការលើកឡើងមួយចំនួននោះឡើយ គ្មានអ្នកណាយកកិត្តិយសគ្រួសារមកសម្ដែងនោះទេ។ នេះដោយសារការខឹងមួយឆាវ ឈានទៅដល់ចំណុចនោះ។
ពូម៉ៅ បញ្ជាក់ទៀតថា នេះក៏ជាវីដេអូមួយ ដែលលោកធ្វើការសុំទោសជាសាធារណៈ ក៏ដូចជាការសុំទោសដល់ភរិយារបស់លោក ព្រោះរយៈពេលកន្លងមកនេះ លោករស់នៅផ្ទះម្ដាយរបស់លោក។ ដូច្នេះរយៈពេលរស់នៅបែកគ្នានេះ លោក បានគិតឃើញពីចំណុចខ្វះខាត និងកំហុសរបស់ខ្លួន។លោកនឹងធ្វើការកែប្រែដើម្បីគ្រួសារ ភរិយា និងកូន។
ពូម៉ៅ បានបន្ថែមទៀតថា លោកសុំធ្វើវីដេអូនេះ ដើម្បីសុំអភ័យទោសដល់ភរិយា ដើម្បីឲ្យគាត់បានឃើញ ហើយដកពាក្យបណ្ដឹងពីតុលាការ ឲ្យលោកបានចូលផ្ទះ មើលថែប្រពន្ធ និងកូន ដូចដើមវិញ។
ពូម៉ៅ បញ្ជាក់នៅចុងវីដេអូថា ខ្លួនទៅបួសមួយរយៈពេល ដើម្បីយកធម៌ មកដាក់ក្នុងខ្លួន រកអ្វីដែលស្ងប់។ បន្ទាប់មកលោក នឹងធ្វើអ្វីៗដើម្បីគ្រួសាររបស់លោក»។ ដោយឡែក នៅរសៀលថ្ងៃទី២២ ខែកញ្ញានេះ ទំព័រហ្វេសប៊ុកឈ្មោះ «ពូមៅសិកវិញហើយបងប្អូន» បានបង្ហោះវីដេអូពូម៉ៅ ដោយបញ្ជាក់ថា «ពូមៅសិកវិញហើយបងប្អូន»៕ សូមទស្សនាវីដេអូ ខាងក្រោម ៖
