ប្រិយមិត្តមួយចំនួនទំនងជាជ្រាបរួចមកហើយថា អ្នកនាង សួស វីហ្សា និងលោកថមមី ទម្រាំតែមានជីវភាពល្អប្រសើរដ៏សព្វថ្ងៃនេះ ពួកគេធ្លាប់ឆ្លងកាត់ការតស៊ូជាមួយគ្នាជាច្រើនតាំងពីនៅជាសង្សារនឹងគ្នា ហើយត្រូវគេមើលងាយ ពេលពួកគេមានជីវភាពលំបាកទៀតផង។
ក្រោយពីពួកគេ មានជីវភាពល្អប្រសើរហើយនោះ ជីវិតគ្រួសារពួកគេ ក៏កាន់តែមានសុភមង្គល ហើយការងាររកស៊ីរបស់ពួកគេ ក៏កាន់តែរលូនថែមទៀត។ ជាក់ស្ដែង រយៈពេលប៉ុន្មានថ្ងៃនេះ ពួកគេ ឡាយលក់ផលិតផល ដោយមានអ្នកទស្សនាច្រើនបំផុត បំបែកកំណត់ត្រាអ្នកលក់អនឡាញនៅស្រុកខ្មែរទៀតផង។
ការ ដែលមានអ្នកទស្សនាច្រើននេះ វាកើតឡើងក្រោយពីពួកគេ បានទៅទិញមាសពេជ្រ នៅហាងអ្នកស្រី ទ្រី ដាណា ដោយចំណាយថវិកាអស់រហូតដល់ជាង១០ម៉ឺនដុល្លារ និង ក្រោយពីពួកគេ ទិញវិឡាទោល និងផ្ទះល្វែង នៅបុរីឡេង ណាវ៉ាត្រា នោះ។
ទោះយ៉ាងណា ចំនួនអ្នកទស្សនាច្រើនបែបនេះ ក៏មានមតិមួយចំនួនមិនពេញចិត្តនឹងពួកគេផងដែរ រហូតដល់អ្នកខ្លះថា ពួកគេបំពុលសង្គម, ត្រូវគេជួលឲ្យថតហាងពេជ្រគេជាដើម ហើយជាការឆ្លើយតប សួស វីហ្សា បានបញ្ជាក់ថា មិនមែនជាការពិតឡើយ។
សួស វីហ្សា បានបង្ហោះសារនៅយប់ថ្ងៃទី២១ ខែកញ្ញា ឆ្នាំ២០២១ ដោយរៀបរាប់ដូច្នេះថា «ប៉ុន្មានថ្ងៃនេះ ខ្ញុំLive វីដេអូ ជាមួយស្វាមីឃើញថា មានចំនួនអ្នកចូលទស្សនារាប់សែននាក់ ខ្ញុំពិតជារំភើបចិត្តណាស់ យើងខ្ញុំពិតជាសូមអរគុណដល់ពុកម៉ែបងប្អូនលោកយាយលោកតា ដែលស្រលាញ់ចូលចិត្តប្តីប្រពន្ធខ្ញុំ និងមិនប្រកាន់ពួកខ្ញុំទាំងពីរនាក់
តែក៏មានមតិបងប្អូនមួយចំនួនតូច ពួកគាត់មិនពេញចិត្ត ហើយបែរជាគិតមកលើពួកយើងផ្លូវមិនល្អទៅវិញ ពួកយើងទាំងពីរនាក់ប្តីប្រពន្ធកម្សត់ណាស់ ពីដើមមកខិតខំតស៊ូលំបាកជាមួយគ្នាទម្រាំមានដូចសព្វថ្ងៃនេះ
អញ្ចឹងបើយើងទាំងពីរខុសឆ្គងអីសូមអភ័យទោសផងចុះដូចប៉ុន្មានថ្ងៃមុនអញ្ចឹង ពួកខ្ញុំគ្រាន់តែទៅទិញមាសទិញពេជ្រជារបស់ដែលខ្លួនស្រលាញ់ ក៏មានបងៗមួយចំនួនមិនសប្បាយចិត្ត ហើយនិយាយថា គេជួលអោយទៅថតអោយហាងគេ
តាមពិតពួកយើងមិនមែន ទើបតែទិញមាសទិញពេជ្រនិងរបស់មានតម្លៃលើកទីមួយឯណា យើងធ្លាប់បានទៅទិញមាសពេជ្រនៅកន្លែងផ្សេងៗជាច្រើនដែរ ហើយក៏បានថតបង្ហោះដូចគ្នាម៉េចបងមិនប្រតិកម្មផង?
ចុះបើថ្ងៃណាមួយស្រាប់តែពីរនាក់ប្តីប្រពន្ធខ្ញុំទៅបោះដើមទន់ចាប់ដៃគ្នាធ្វើជាដៃគូសហការរកស៊ីជាមួយនឹងបងស្រីទ្រីដាណាយ៉ាងពិតប្រាកដមែន តើបងៗនៅគិតថា គេជួលពួកខ្ញុំមកសម្តែងទៀតទេបើឃើញរូបភាពបែបនេះកើតឡើងពិតមែន?
ហើយមួយទៀត គ្រាន់តែយើងទាំងពីរនាក់ទិញមាសពេជ្រកន្លែងគាត់យកប្រើប្រាស់សោះ តែវាពិតជាហេងមែន អោយនិយាយថា ម៉េចវិញ??? បងៗអើយមនុស្សយើងម្នាក់ៗមានជីវិតមិនទៀងទេ ចូរស្រលាញ់រាប់អានគ្នាអោយបានច្រើនៗ ទើបជីវិតយើងមានក្តីសុខ
ជាចុងក្រោយសូមជូនពរបងប្អូនមានសុខភាពល្អ និងរស់នៅសប្បាយរីករាយជាមួយនឹងអ្វីដែលយើងមាន កុំបំពានអ្នកដទៃ នោះយើងនឹងមានក្តីសុខពិតប្រាកដ ហេងហេងសុខសប្បាយទាំងអស់គ្នាបងប្អូន»៕
