គេនៅចាំបានថា ក្រោយពីរួមរស់ជាមួយគ្នាជាង១០ឆ្នាំ រហូតមានកូន៤នាក់ ប្រកបដោយសុខសុភមង្គលនោះ, អ្នកឧកញ៉ាគិតម៉េង បានសម្រេចចូលរោងការជាមួយ អ្នកនាង ស្រីតូច ចំណាន កាលពីថ្ងៃទី២០ ខែមីនា ឆ្នាំ២០១៥ ដោយគិតមកដល់ពេលនេះ មានរយៈពេល៦ឆ្នាំហើយ។
ជារឿយៗគេសង្កេតឃើញថា អ្នកឧកញ៉ា គិត ម៉េង តែងតែបង្ហាញក្ដីស្រឡាញ់ចំពោះប្រពន្ធ កូន ខ្លាំងណាស់ ដោយរាល់ថ្ងៃពិសេសម្ដងៗអ្នកឧកញ៉ា មិនភ្លេចឡើយ នូវការបង្ហោះរូបថត អមសារបង្ហាញពីទឹកចិត្តរបស់ខ្លួនចំពោះគ្រួសារ បន្ថែមលើថ្ងៃធម្មតានោះ។
ជាក់ស្ដែងនៅយប់ថ្ងៃទី២១ ខែកញ្ញា ឆ្នាំ២០២១នេះ អ្នកឧកញ៉ា បានបង្ហោះសារថា «អាទិភាពចម្បងបំផុតរបស់ខ្ញុំ គឺគ្រួសារ ដូច្នេះ ខ្ញុំតែងតែឱ្យតម្លៃ និងស្ញប់ស្ញែងចំពោះការស្វែងយល់ពីទំនៀមទម្លាប់ផ្សេងៗដែលនាំឱ្យគ្រួសារខ្ញុំកាន់តែមានភាពជិតស្និទ្ធគ្នា។
ដោយសារពិភពលោកកំពុងធ្វើសកលភាវូបនីយកម្ម នៅខណៈពេលនៃការអភិរក្សនិងអបអរសាទរដល់វប្បធម៌និងប្រពៃណីជាតិខ្មែរយើង យើងក៏អាចស្វែងយល់ពីអត្ថប្រយោជន៍នៃអ្វីដែលសកលភាវូបនីយកម្មនាំមក ដែលរួមមានការចែករំលែកប្រពៃណីនិងវប្បធម៌ដែលមានអត្ថន័យពីប្រទេសផ្សេងៗ។
ថ្ងៃនេះគឺជាពិធីបុណ្យប្រពៃណីចិនធំជាងគេទី២ ដែលត្រូវបានស្គាល់ថាជា ពិធីបុណ្យសែនព្រះខែ។ ពិធីបុណ្យសែនព្រះខែនេះត្រូវបានប្រារព្ធនៅក្នុងប្រទេសអាស៊ីជាច្រើន។
ពិធីបុណ្យនេះមានសារៈសំខាន់ណាស់ចំពោះសហគមន៍មួយចំនួនដោយសារ ពិធីបុណ្យនេះផ្សារភ្ជាប់ទំនាក់ទំនងរវាងគ្រួសារ នំសែនព្រះខែ និងព្រះចន្ទ។ តាមទម្លាប់ ប្រជាជនតែងប្រារព្ធពិធីបុណ្យនេះដោយមានការជួបជុំគ្នាបរិភោគអាហារពេលល្ងាច គយគន់និងសែនព្រះខែ ដុតគោម និងទទួលទាននំសែនព្រះខែ។
នំសែនព្រះខែគឺជាអាហារតំណាងដ៏សំខាន់បំផុតសម្រាប់ពិធីបុណ្យនេះ ដោយសារតែនំនេះមានរាងមូលនិងរសជាតិផ្អែម។ ជាធម្មតានៅថ្ងៃបុណ្យនេះ សមាជិកគ្រួសារជួបជុំគ្នា ហើយកាត់នំសែនព្រះខែជាបំណែកៗ រួចចែកគ្នាបរិភោគនូវរសជាតិផ្អែមរបស់វា ដែលប្រៀបដូចជា ចែករំលែកភាពផ្អែមល្ហែមដល់ក្រុមគ្រួសារពួកគេ។
ព្រះចន្ទពេញវង់គឺជានិមិត្តរូបនៃការជួបជុំគ្រួសារនៅក្នុងវប្បធម៌ចិន ដែលបង្ហាញពីមនោសញ្ចេតនាយ៉ាងជ្រាលជ្រៅដែលគេតែងនិយាយថា «ព្រះចន្ទនៅរាត្រីនៃពិធីបុណ្យសែនព្រះខែគឺភ្លឺបំផុតនិងស្រស់ស្អាតបំផុត”។
កំណាព្យចិនដ៏ល្បីល្បាញមួយដែលមានចំណងជើងថា “គំនិតនាពេលរាត្រីស្ងប់ស្ងាត់” និពន្ធដោយកវីដ៏ល្បីមួយរូប គឺលោក លីបៃ បានរៀបរាប់ពីព្រះចន្ទក្នុងថ្ងៃសែនព្រះខែនេះថា៖ ពន្លឺដួងចន្ទរះតាមមាត់បង្អួច ធ្វើឱ្យខ្ញុំនឹកភ្នកថាតើមានពន្លឺអ្វីនៅលើពសុធា ក្រឡេកមើលលើ ឃើញព្រះចន្ទ ក្រឡេកចុះក្រោមធ្វើឱ្យខ្ញុំនឹកស្រុកកំណើតរបស់ខ្ញុំ»៕
