ភ្នំពេញ ៖ កីឡាករប្រដាល់គុនខ្មែរលោក វង្ស ណយ បានប្រកាសនៅលើបណ្ដាញសង្គមរបស់ខ្លួនធ្វើបង្កឲ្យមានការភ្ញាក់ផ្អើលយ៉ាងខ្លាំង ខណៈដែលខ្លួនត្រូវបានបុរសម្នាក់ ដែលជាអ្នកដឹកងៀតក្របី លួចយកម៉ូតូចំនួនពីរគ្រឿង និងលុយលក់ងៀតក្របីមួយចំនួន ហើយកំពុងតែរត់គេចខ្លួន ។
តាមការបញ្ជាក់នៅលើបណ្ដាញសង្គម វង្ស ណយ បានឱ្យដឹងដោយពាក្យពេចន៍ដង្ហោយថា៖ «ខ្ញុំសុំពឹងពាក់បងប្អូនឲ្យជួយផង យប់នេះខ្ញុំបាទនឹងឡាយលម្អិតព័ត៌មាននិយាយអំពីចោលលួចម៉ូតូរបស់ខ្ញុំ និងបង ជៀស ស្រួច សូមបងប្អូនមេត្តាជួយចាប់ ជួយស៊ែរផង, សូមបងប្អូនជួយស៊ែរបន្តផងបង ខ្ញុំបាទបានបាត់ម៉ូតូ២គ្រឿង» ។
ជុំវិញករណីនេះភរិយាលោក វង្ស ណយ ក៏បានអះអាងប្រាប់ តារាញូស៍ ថា ខ្លួនពិតជាបានម៉ូតូចំនួនពីរគ្រឿងពិតប្រាកដមែន ហើយអ្នកដែលជាជនសង្ស័យ គឺជាអ្នកដឹករបស់ខ្លួនផ្ទាល់តែម្ដង ។ ដោយប្រភពបានរៀបរាប់ថា៖ «គាត់បានយកម៉ូតូដឹកងៀតក្របីឲ្យភ្ញៀវ ហើយក្រោយមកគាត់ក៏បានដើរមកផ្ទះវិញ ពេលនោះខ្ញុំក៏សួរថា បងឯងដើរមកចឹងចុះឯណាម៉ូតូ? គាត់ក៏ឆ្លើយប៉ូលិសចាប់ធ្វើស៊ីគាត់ ។ ហើយខ្ញុំក៏បានប្រាប់គាត់វិញថា បងឯងមកផ្ទះវិញសិនមក ចាំពេលប្ដីខ្ញុំមកពីដឹកងៀតក្របីឱ្យគេវិញដែរ ចាំនាំទៅកន្លែងប៉ូលិសដែលចាប់នឹង ។ ហើយស្រាប់តែមួយសន្ទុះ គាត់ក៏បានយកម៉ូតូបង ជៀស ស្រួច ជិះទៅទៀតដោយប្រាប់ថាទៅទិញកាហ្វេផឹក ហើយក៏ទៅបាត់ដល់ឥឡូវតែម្ដង» ។
ជាមួយគ្នានោះ លោក វង្ស ណយ ក៏បានបញ្ជាក់ដែរថា អ្វីដែលធ្វើឱ្យលោកមានការហួសចិត្តខ្លាំងបំផុតនោះ គឺលោកត្រូវបានមហាជនចោទថាសម្ដែង ។ វង្ស ណយ បានរៀបរាប់ថា៖ «ខ្ញុំពិបាកនឹងនិយាយណាស់ ព្រោះនៅពេលដែលបង្ហោះទៅគេថាសម្ដែងគ្រប់គ្នា មិនថាត្រូវគួរនិយាយយ៉ាងម៉េចឱ្យល្អ» ។
ករណីនេះទៀតសោត កីឡាករ វង្ស ណយ ក៏បានសម្ដែងការសោកស្ដាយយ៉ាងខ្លាំង ដោយលើកឡើងជាហូរហែរថា៖ «ខំអាណិតឃើញលំបាក ឱ្យមកដឹកងៀតក្របី ចុងក្រោយយកទាំងលុយងៀតក្របី នឹងម៉ូតូ២គ្រឿង ។ បើបាត់ទៅហើយ ទោះខ្ញុំយំបោកខ្លួន ក៏គ្មានបានអ្វីមកវិញដែរ ប៉ុន្តែខ្ញុំអាណិតបង ជៀស ស្រួច ខ្លាំងណាស់ ខ្ញុំមិនគួរណានាំចោរចូលផ្ទះទេ» ។
គួរបញ្ជាក់ថា បើតាមការអះអាងរបស់កីឡាករ វង្ស ណយ បុរសជាជនសង្ស័យខាងលើ គឺជាអ្នករាប់អានគ្នា ហើយដោយមើលឃើញពីទុក្ខលំបាក រូបលោកក៏បានហៅមកឱ្យជួយដឹកងៀតក្របីរបស់ខ្លួន គ្រាន់បានចំណូលជួយទ្រទ្រង់ជីវភាពគ្រួសារ។ ប៉ុន្តែទើបតែបាន៤ថ្ងៃប៉ុណ្ណោះ បុរសខាងលើក៏បានធ្វើសកម្មភាពបោកយកម៉ូតូរបស់ខ្លួននិងអតីតកីឡាករ ជៀស ស្រួច ទៅតែម្ដង ៕ ប្រភពពីតារាញូស៍
ដេីម្បីកាន់តែជ្រាបច្បាស់សូមទស្សនារូបភាពខាងក្រោមទាំងអស់គ្នា៖
