ជាការកត់សម្គាល់, តារាចម្រៀងស្រី ជ្រកក្រោមទ្រនំផលិតកម្ម ហង្សមាសអ្នកនាង សួស វីហ្សា មួយរយៈធំនេះ ហាក់ស្ងប់ស្ងាត់ក្នុងការឡើងឆាកតន្ត្រី ហើយមកមមាញឹក ជាមួយនឹងការលក់ផលិតផលតាមអនឡាញវិញ។
ស្របពេលកំពុងជោគជ័យលើជំនួញផ្ទាល់ខ្លួននេះ កាលពីថ្ងៃទី១៥ ខែកញ្ញា ឆ្នាំ២០២១កន្លងទៅនេះ អ្នកនាង សួស វីហ្សា និងស្វាមី បាននាំគ្នាទៅទិញមាសពេជ្រ នៅហាង អ្នកស្រី ទ្រី ដាណា ដោយចំណាយលុយអស់រហូតដល់ជាង១០ម៉ឺនដុល្លារឯណោះ។
តាមរយៈការចំណាយដ៏ច្រើនលើគ្រឿងមាស ពេជ្រនេះ បានធ្វើឲ្យអ្នកគាំទ្រ មានការចាប់អារម្មណ៍ជាខ្លាំង។ តែអ្វី ដែលធ្វើឲ្យអ្នកគាំទ្រ ចាប់អារម្មណ៍ និងសរសើរខ្លាំងជាងនេះទៀតនោះ ក្រោយពីពួកគេ ទិញគ្រឿងអលង្ការខាងលើ បានប៉ុន្មានថ្ងៃ ស្រាប់តែទិញវិឡា ២ ៣ថែមទៀតផង ពិតជាមិនធម្មតានោះទេ។
បង្ហោះភ្ជាប់ជាមួយរូបថត វិឡារ ជាច្រើនសន្លឹក នៅថ្ងៃទី១៧ ខែកញ្ញា ឆ្នាំ២០២១ លោក ថមមី ប្ដីអ្នកនាង សួស វីហ្សា បានបញ្ជាក់ថា «ហេងហេង ថ្ងៃសុក្រ សុខសប្បាយ ចែចង់បានអីចែប្រាប់ប៊យ ឥឡូវដូចនិយាយមែន ថ្ងៃនេះមកទិញផ្ទះវីឡាទោលនឹងផ្ទះល្វែងនៅបុរីឡេងណាវាត្រាផ្លូវជាតិលេខ៦Aជូនព្រះនាងតូចកូនស្រីរបស់ខ្ញុំ OunJenny ថង សាម៉ូលីណា សម្រាប់ជាការដូខែក្រោយ 09.10.2021 កូនស្រីពួកយើងខ្ញ៉ំអាយុ 1ខួប
តែម៉ែប្រពន្ធហ្នឹង គឺចឹងម៉ង ទារម៉ែអាទារឪអាទារយាយអាទារតាអាទារ ទៀតហើយទារបានប៉ុន្មានល្វែងទៀតហើយ ប្រហែលជាខ្ញុំត្រូវរត់ម៉ូតូឌុបវិញហើយ ជួយៗជិះផងម៉ូយៗ អើយ អំបិលហើយលើកនេះ Sous Visa»។
គួរបញ្ជាក់ថា តារាចម្រៀងសួស វីហ្សា និងលោកថមមី ជាស្វាមី បានស្រឡាញ់គ្នាជាសង្សារអស់រយៈពេលជាយូរ ដោយតស៊ូជាមួយគ្នា រហូតរើបបម្រាស់ចេញពីភាពក្រីក្រ ហើយសម្រេចចិត្តភ្ជាប់ពាក្យជាមួយគ្នា និងក្រោយមកឈានដល់ជីវិតអាពាហ៍ពិពាហ៍នោះ។
ពួកគេ បានសម្រេចចិត្តរៀបអាពាហ៍ពិពាហ៍កាលពីថ្ងៃទី២៩ ខែវិច្ឆិកាឆ្នាំ ២០១៩ ក្រោមវត្តមានភ្ញៀវជាង១០០០នាក់ ហើយក្រោយមកក៏បានទទួលចំណងដៃកូនស្រីដ៏គួរឲ្យស្រឡាញ់ម្នាក់ឈ្មោះ ថង សាម៉ូលីណា ហៅ Jenny កើតនៅថ្ងៃទី០៩ ខែតុលា ឆ្នាំ២០២០វេលាម៉ោង៩និង០៩នាទីព្រឹក នៅ មន្ទីរពហុព្យាបាល និងសម្ភព អរៀនដា។
ក្រោយពីទទួលបានកូនស្រីម្នាក់នេះរួចមក គេសង្កេតឃើញថា ជីវិតគ្រួសារមួយនេះ កាន់តែមានសុភមង្គលមួយកម្រិតទៀត ហើយសុភមង្គលនោះទៀតសោត ពួកគេ តែងតែបង្ហាញតាមបណ្ដាញសង្គមហ្វេសប៊ុក ដើម្បីឲ្យអ្នកគាំទ្រ ធ្វើជាគំរូល្អទៀតផង។ បន្ថែមលើសុភមង្គលទៀតនោះ បច្ចុប្បន្ន ពួកគេកំពុងតែជោគជ័យខ្លាំងណាស់លើការលក់ផលិតផលតាមអនឡាញ៕
