បើទោះមកដល់ពេលនេះ ប្រពន្ធរបស់តារាចម្រៀងមាឌល្អិតកែវ វាសនា អ្នកនាង លឹម សុគន្ធធារី ហៅ ឆី ឆី មានកូនរហូតដល់ទៅ២យ៉ាងណាក្ដី តែបើនិយាយពីរូបសម្រស់ ស្អាតមិនចាញ់តារានោះឡើយ ធ្វើឲ្យអ្នកគាំទ្រសរសើរមិនដាច់ពីមាត់ផងដែរ។
ជាក់ស្ដែង កាលពីពេលថ្មីៗនេះ អ្នកនាង លឹម សុគន្ធធារី ហៅ ឆី ឆី បានបង្ហោះរូបថតមួយសន្លឹកនៅមុខវិឡារដ៏ស្កឹមស្កៃតម្លៃជិត១លានដុល្លាររបស់ខ្លួន ធ្វើឲ្យអ្នកគាំទ្រលាន់មាត់សរសើរម្ដងរួចមកហើយពីរូបសម្រស់នៅតែស្អាត សាច់ខ្ចីដូចបណ្ដូលចេក កាន់តែក្មេងជាងវ័យទៀតនោះ។
បន្ថែមលើនេះ ដោយហេតុថា រយៈពេលប៉ុន្មានថ្ងៃចុងក្រោយនេះ ល្បីរឿងគេអួតពីរូបសម្រស់ស្អាតពីធម្មជាតិ ក្នុងចំណោម១០នាក់ ស្អាតជាងគេ៩នាក់ទៅហើយនោះ ភរិយា លោក កែវ វាសនា ក៏បានបង្ហោះរូបថតដ៏ស្រស់ស្អាតរបស់ខ្លួនជាច្រើនសន្លឹកនៅថ្ងៃទី១៥ ខែកញ្ញា ហើយនិយាយតាមគេដែរថា «ក្នុងចំណោម10នាក់ខ្ញុំស្អាតជាងគេ9នាក់ (ហាមសើចណាអ្នកស្អាតជាងខ្ញុំ)»។
ទោះភរិយាលោកកែវ វាសនា មិនបានបញ្ជាក់ថា នេះជាសម្ដីអួតអាងរបស់អ្នកណាក៏ដោយ ក៏គេអាចដឹងបានថា ជាសម្ដីរបស់អាជី ដែលបានផ្ដល់បទសម្ភាស៍ឲ្យលោក អ៊ឹម ជីវ៉ា កាលពីពេលថ្មីៗកន្លងទៅនេះ ហើយពេលអាជី បានឃើញរូបសម្រស់ដ៏ក្មេងវ័យនេះ រួមទាំងនិយាយដូច្នោះទៀត មិនដឹងថា អៀនខ្លួនប៉ុណ្ណានោះទេ។
គួរបញ្ជាក់ថា ម្ចាស់បទ«កុលាបពុលដី» លោក កែវ វាសនា បានសម្រេចចិត្តបញ្ចប់ភាពនៅលីវហើយ កាលពីថ្ងៃទី១១ ខែឧសភា ឆ្នាំ២០១៦ ជាមួយនឹងកូនស្រី របស់សេដ្ឋីជនបទ ឈ្មោះ«សេដ្ឋីលី» ក្នុងស្រុកមង្គលបុរី ខេត្តបន្ទាយមានជ័យ។
ក្នុងពិធីមង្គលការរបស់លោកនោះ គេកត់សម្គាល់ឃើញថា អ្នកសិល្បៈជិតស្និទ្ធ មួយចំនួនធំ មិនបានទៅចូលរួមដោយផ្ទាល់នោះទេ ពោលគឺពួកគេអាចនឹងចាំ ជួបជុំគ្នា ម្ដងទៀត នៅក្នុងទីក្រុងភ្នំពេញ ក្នុងពិធីកាត់ចំណងដៃ។
ក្រោយរៀបការ បើគិតមកទល់ពេលនេះ លោក កែវ វាសនា បានជោគជ័យយ៉ាងខ្លាំងជាមួយនឹងការសាងសង់វិឡារតម្លៃជាង៨០ម៉ឺនដុល្លាររួចរាល់ ព្រមទាំងមានកូនក្នុងបន្ទុកគ្រួសារចំនួន២នាក់ទៅហើយ តែសម្រាប់ទំនាក់ទំនង និងក្តីស្រលាញ់ រវាងប្រពន្ធ នៅតែស្រលាញ់លើសដើម មិនប្រែប្រួលទៅណាទេ។
ថ្មីៗនេះ ភរិយា លោកកែវ វាសនា បានទម្លាយពីប្រភពចំណូលរបស់ខ្លួនថា មានចំនួន៣ផ្នែក ហើយការមានបានដូចសព្វថ្ងៃ ក៏មិនមែន ដោយសារទ្រព្យសម្បត្តិរបស់ឪពុកម្ដាយ១រៀលដែរ គឺបានគ្រប់យ៉ាងដូចសព្វថ្ងៃជាញើសឈាមរបស់ពួកគេទាំង២តែម្ដង។ តាមរយៈនេះ ឃើញថា ប្រពន្ធលោក កែវ វាសនា មិនត្រឹមតែស្អាតនោះទេ ថែមទាំងឆ្លាតក្នុងការរកស៊ី ទៀតផង៕
