ទោះកំពុងជួបរឿងឈឺចាប់ ពិបាកចិត្តប៉ុណ្ណាក៏ដោយ ក៏អ្នកស្រី ទ្រី ដាណា ថៅកែហាងពេជ្រចិត្តធម៌ មិនចោលការងារ រកស៊ីរបស់ខ្លួនដែរ ហើយអ្នកស្រី បានផ្ដាំទៅស្រីៗទាំងអស់ កុំឲ្យរឹងមាំពេក ព្រោះនឹងក្លាយជាមនុស្សឯកោ។
អ្នកស្រី ទ្រី ដាណា បានបង្ហោះសារនៅល្ងាចថ្ងៃទី១១ ខែកញ្ញា ឆ្នាំ២០២១នេះ ដូច្នេះថា «ខ្ញុំដឹងត្រឹមថា ត្រូវធ្វើឱ្យខ្លួនឯងរវល់ជានិច្ច ទោះមិនអាចសម្រេចបានទាំងអស់ តែយ៉ាងណាក៏បានធ្វើរឿងជាច្រើនក្នុងថ្ងៃនេះ រួចគិតថា ត្រូវធ្វើអ្វីនៅថ្ងៃស្អែក
កំពុងពិបាកចិត្ត កំពុងឈឺចាប់យ៉ាងណា តែខ្ញុំមិនដែលចោលការងារ ការរកស៊ី មិនទន់ជ្រាយទេ ព្រោះមានមនុស្សជាច្រើនកំពុងរង់ចាំខ្ញុំជួយ មនុស្សរាប់ម៉ឺននាក់ក្រោមការដឹកនាំ បុគ្គលិកជាច្រើនកំពុងចាំបើកប្រាក់ខែ ហើយកូនៗខ្ញុំក៏កំពុងចាំចូលរៀនដែរ។
អ្នកខ្លះ ឃើញខ្ញុំយករឿងគ្រួសារមកនិយាយ រួចផ្សាយផលិតផល ក៏គិតថា ខ្ញុំសម្ដែង វាគ្មានអ្នកណាយករឿងគ្រួសារមកសម្ដែងទេ ជាកិត្តិយសរបស់មនុស្សម្នាក់ៗ តែនៅពេលលាក់ទុកក្នុងចិត្តលែងបាន នៅពេលដែលគេយល់ច្រឡំ ត្រូវលាតត្រដាងការពិត កុំឱ្យខ្ញុំខុសម្នាក់ឯង ទាំងខំប្រឹងអស់ពីកម្លាំងកាយចិត្តទៅហើយ
ឬចង់ឱ្យបងប្អូនថ្លៃ ឪពុកម្ដាយក្មេក មកគ្រប់គ្រងលើខ្ញុំ ដឹងទេ មនុស្សស្រី ដែលមើលទៅរឹងមាំផុត មនុស្ស ដែលមិនងាយស្រក់ទឹកភ្នែក អាចញញឹមនៅក្នុងបញ្ហា គឺជាមនុស្សដែលឈឺចាប់បំផុត វិនាទីនៅមុខអ្នកកំពុងញញឹម តែមួយវិនាទីបែរទៅក្រោយ កំពុងសោកសៅ។
សុំផ្ដាំទៅស្រីៗទាំងអស់ដែរ កុំរឹងមាំខ្លាំងពេក ព្រោះអ្នកនឹងក្លាយជាមនុស្សឯកា ប៉ុន្តែអ្វីដែលខ្ញុំកំពុងដើរ គឺមិនអាចបកក្រោយទេ ត្រូវទៅមុខជានិច្ច។ ជឿជាក់លើខ្ញុំ ព្រោះភាពឈឺចាប់ បានបង្ហាត់បង្រៀនខ្ញុំ ជម្នះអស់បញ្ហា
ចំពោះកម្មវិធីមនុស្សធម៌ ខ្ញុំនៅតែបន្តធ្វើ និងចែកអំណោយជូនអ្នកខ្វះខាតបន្តឆាប់ៗនេះ កុំច្រណែន ព្រោះគេលំបាកជាងគ្រួសារអ្នកឆ្ងាយណាស់!»៕
