គេនៅចាំបានថា អ្នកឧកញ៉ា ឡេង ណាវ៉ាត្រា អគ្គនាយកក្រុមហ៊ុន បុរី ឡេង ណាវ៉ាត្រា កាលពីព្រឹកថ្ងៃទី០៣ ខែកញ្ញា ឆ្នាំ២០២១កន្លងទៅ បានធ្វើដំណើរចុះមកប្រមូលទិញផ្លែមៀនរបស់ប្រជាពលរដ្ឋកំពុងជួបបញ្ហាខ្វះទីផ្សារ នៅខេត្តបាត់ដំបង និងខេត្តប៉ែលិន។
ការចុះប្រមូលទិញផ្លែមៀនដោយផ្ទាល់នេះ ធ្វើឡើងតាមការចង្អុលបង្ហាញផ្តល់អនុសាសន៍ដោយផ្ទាល់ពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ប្រធានកាកបាទក្រហមកម្ពុជា។
រួមដំណើរចុះទៅប្រមូលទិញផ្លែមៀនដោយផ្ទាល់នោះ ក៏មានវត្តមានកំពូលតារាចម្រៀង ព្រាប សុវត្ថិ, ខេមរៈ សិរីមន្ត ក៏ដូចជាលោកហេង ឡុងផងដែរ។ ក្រោយពីចុះដោយផ្ទាល់ហើយនោះ តារាចម្រៀង ខេមរៈ សិរីមន្ត ថែមទាំង បញ្ជាទិញផ្លែមៀនមួយចំនួនពីផ្សារកសិផលធម្មជាតិ របស់ អ្នកឧកញ្ញា ឡេង ណាវ៉ាត្រា ដើម្បីធ្វើការចែកដោយឥតគិតថ្លៃទៀតផង។
ជាក់ស្ដែង នៅថ្ងៃទី១០ ខែកញ្ញា ឆ្នាំ២០២១នេះ កំពូលតារាចម្រៀងខេមរៈ សិរីមន្ត បានបង្ហោះរូបថត ការទទួលផ្លែមៀន ជាការច្រើន អមដោយសារ បញ្ជាក់ថា «មៀនប៉ៃលិន ដែលខ្ញុំបានបញ្ជាទិញពី ផ្សារកសិផលធម្មជាតិ របស់ អ្នកឧកញ្ញា ឡេង ណាវ៉ាត្រា បានមកដល់គេហដ្ឋានខ្ញុំបាទហើយ
ពេលនេះខ្ញុំត្រៀមចែកចាយ មៀន ប៉ៃលិន នេះ ទៅតាមមណ្ឌល និង ស្អែកម៉ោង ៩ព្រឹក បងប្អូនអាចមកទទួលយក មៀន ក្នុង មួយនាក់ ៥គីឡូ ដោយឥតគិតថ្លៃ នៅ ផ្ទះរបស់ខ្ញុំបាទផ្ទាល់។ និង សូមអធ្យាស្រ័យ មៀន មានកំណត់ មិនអាចជូនបងប្អូនបានគ្រប់គ្នានោះទេ»៕
