តារាចម្រៀងប្រុសសំឡេងស្អកពិរោះខុសពីតារាចម្រៀងដទៃក្នុងវិស័យសិល្បៈ លោក ខេម ក្រោយជោគជ័យខ្លាំងក្នុងទ្រនំថ្មី គឺផលិតកម្ម Galaxy Navatra ដោយទទួលបានបទថ្មីជាច្រើនបទបញ្ចេញលើទីផ្សារផ្ទួនៗ និងទទួលបានការគាំទ្រភ្លូកទឹកភ្លូកដីនោះ មួយរយៈចុងក្រោយនេះហាក់ស្ងប់ស្ងាត់ទៅវិញបន្តិច មិនមានបទចម្រៀងថ្មីបន្ថែមសម្រាប់បំពេរអារម្មណ៍មហាជន ជាពិសេសអ្នកគាំទ្ររបស់ខ្លួនឡើយ។
ស្របពេលដែលស្បើយពីការងារសិល្បៈនោះ តារាចម្រៀងរូបនេះក៏ឆ្លៀតសាកថ្មអោយជីវិតនៅទឹកដីនាយសមុទ្រប្រទេសបារាំងផងដែរ ហើយការចាកចេញទៅអស់រយៈពេលជាងមួយខែនេះ លោក ខេម មិនបានបញ្ជាក់ពីគោលបំណងឱ្យមហាជនអ្នកគាំទ្របានដឹងឡើយ ប៉ុន្តែក៏មានអ្នកគាំទ្រជាច្រើនបានស្និដ្ឋានថា លោក ខេម ទំនងជានឹករលឹកចង់ជួបភ័ក្រថ្នមថ្នាក់ម្ចាស់ស្នេហ៍របស់ខ្លួន។
ខណៈដែលទទួលបានក្ដីសុខពេញលេញក្នុងប្រទេសបារាំងនោះ តារាចម្រៀងសំឡេងស្អក លោក ខេម ក៏មិនភ្លេចបង្ហោះរូបភាព និងវីដេអូ បង្អួតភ្នែកមហាជនអ្នកគាំទ្រនៅស្រុកកំណើតរបស់ខ្លួន អំពីទេសភាព និងការរស់នៅរបស់ប្រជាជនបារាំង ក៏ដូចជាអនិកជនខ្មែររស់នៅលើទឹកដីបារាំងផងដែរ។
ទោះបីមានក្ដីសុខខ្លាំងក្នុងទឹកដីស៊ីវិល័យឯនាយសមុទ្រនោះក៏ពិតមែន ប៉ុន្តែលោក ខេម តែងរលឹកនឹកដល់មាតុភូមិកំណើតជានិច្ច។ ជាក់ស្ដែងប៉ុន្មានថ្ងៃមុននេះ ខ្លួនក៏បានបង្ហាញអារម្មណ៍ព្រួយបារម្ភដល់បងប្អូនខ្មែរផងដែរ ស្របពេលដែលកម្ពុជា កំពុងវាយលុកដោយមេរោគផ្លូវដង្ហើបកូវីដ១៩ ដោយលោកបានបង្ហោះសារយ៉ាងវែងថា «ពេលណាទៅទើបយើងអាចដោះម៉ាស់ចេញបាន សង្គ្រាមមនុស្សនឹងមនុស្សវាស្រួលដោះស្រាយ ប៉ុន្តែសង្គ្រាមមនុស្សនឹងមេរោគមើលមិនឃើញនេះវាពិបាកបរិយាយនិងទប់ស្កាត់ណាស់ ជូនពរបងប្អូនខ្មែរគ្រប់រូបឆ្លងផុតពេលវេលាដ៏អាក្រក់នេះផង»៕ប្រភពពីតារាញូស៍
ដេីម្បីកាន់តែជ្រាបច្បាស់សូមទស្សនារូបភាពខាងក្រោមទាំងអស់គ្នា៖
