មរណភាពរបស់ ស្ត្រីឈ្មោះ សឿន ស្រីអូន អាយុ២២ឆ្នាំ កាលពីទៀបភ្លឺថ្ងៃទី១៦ ខែមីនា ឆ្នាំ២០២៣ បានក្លាយជារឿងដ៏រំជួលចិត្តសម្រាប់មហាជនទូទាំងប្រទេស ពិសេស ពេលបានឃើញ វីដេអូពេលនាងនៅមានជីវិតជួបជុំគ្រួសារយ៉ាងមានក្ដីសុខ និងពាក្យបណ្ដាំចុងក្រោយមុនពេលផុតរលត់នោះ។
កាលស្ត្រីខាងលើនៅមានជីវិតនោះ លោក ស៊ន សុភក្រ្ត និពន្ធនាយក សារព័ត៌មានហ្វ្រេសញូស៍ បានបង្ហោះវីដេអូ សកម្មភាពស្រីអូន រួមនឹងកូន, ប្ដី បង្ហាញស្នាមថើបលើកទឹកចិត្តនាង មើលទៅ ពិតជាអាណិត ខ្លោចចិត្តខ្លាំងណាស់។
បង្ហោះភ្ជាប់ជាមួយវីដេអូ កាលពីថ្ងៃទី១៩ ខែកុម្ភៈ លោក ស៊ន សុភ័ក្ត្រ បានរៀបរាប់ថា «មើលពេលណា អាណិតគាត់ពេលនោះ! ច្បាប់គួរតែត្រូវបានអនុវត្តចំពោះការធ្វេសប្រហែស ពីសំណាក់គ្រូពេទ្យស្ទើរចំណេះ និងជំនាញបែបនេះ! រហូតមកដល់ពេលនេះ ស្រ្តីរងគ្រោះ មិនទាន់អាចហូបចំណីតាមមាត់នៅឡើយទេ ដោយត្រូវបញ្ចូលសារធាតុចិញ្ចឹមតាមសសៃឈាមនៅឡើយ!
ខ្ញុំសង្ឃឹមថា គាត់អាចវិលមករកសភាពដូចដើមវិញចុះ បើទោះក្តីសង្ឃឹមមានតិចក៏ដោយនោះ! សូមបញ្ជាក់ថា ស្ដ្រីម្នាក់ដែលរំលូតគភ៌ស្លាប់ក្នុងផ្ទៃ ឈ្មោះ សឿន ស្រីអូន អាយុ២២ឆ្នាំ មានអាសយដ្ឋានភូមិអន្លង់រមៀត ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល បានចូលមកសម្រាកនៅគ្លីនិកដើមអង្គ្រងនៅថ្ងៃទី១០ ខែវិច្ឆិកា ឆ្នាំ២០២២ ដោយរោគវិនិច្ឆ័យមានកូនស្លាប់ក្នុងស្បូនអាយុ១៨សប្តាហ៍! ក្រុមគ្រូពេទ្យរបស់គ្លីនិកបានធ្វើការព្យាបាលដោយ រំលូតយកកូនដែលស្លាប់ក្នុងផ្ទៃចេញ និងបន្តសម្រាកនៅគ្លីនិក រយៈពេលមួយយប់ ហើយបានចេញពីគ្លីនិកដើមអង្គ្រងនៅថ្ងៃទី១១ ខែវិច្ឆិកា ឆ្នាំ២០២២!»។
ទោះជាមានការបួងសួង ឬបង្ហាញក្ដីសង្ឃឹម និងការយកចិត្តទុកដាក់ ខិតខំប្រឹងប្រែងអស់ពីសមត្ថភាពយ៉ាងណា ក៏ក្រុមគ្រូពេទ្យមិនអាចជួយសង្គ្រោះស្ត្រីខាងលើនេះ បានឡើយ ហើយនាងក៏ទទួលមរណភាព ពេលបញ្ជូនទៅដល់គេហដ្ឋានវិញ កាលពីទៀបភ្លឺថ្ងៃទី១៦ ខែមីនា ឆ្នាំ២០២៣។
អ្វី ដែលកាន់តែស្រណោះទៀតនោះ ពេលឮសម្ដី នាងបាន ផ្ដាំផ្ញើជាលើកចុងក្រោយទៅកាន់ស្វាមីយ៉ាងរំជួលចិត្តថា សូមឲ្យស្វាមី មើលថែកូនឲ្យបានល្អ ខ្ញុំចង់រស់ណាស់ ប៉ុន្តែធ្វើម៉េចវាសនារបស់ខ្ញុំបានតែត្រឹមហ្នឹង។ តែកុំភ្លេចឲ្យគេរកយុត្តិធម៌ឲ្យខ្ញុំផង ទោះខ្ញុំស្លាប់ទៅហើយក៏ដោយ។ តាមរយៈនេះ មហាជន មានសេចក្ដីរំជួលចិត្ត អាណិតចំពោះនាងពន់ពេក រហូតមានការលើកលើកពីមតិមួយចំនួនថា «ចាំមើលផ្លូវច្បាប់ ចាត់វិធានការបែបណា ចំពោះយាយឆ្មបមួយនេះ ដែលធ្វេសប្រហែស គ្មានវិជ្ជាជិវៈ យកជីវិតគេមកលេងសើច ធ្វើឱ្យគេបាត់បង់ជីវិត ព្រាត់ប្រាស់ប្ដី និង កូន ។»៕
