ប្រិយមិត្ត បានជ្រាបរួចមកហើយថា កាលពីទី១១ ខែកុម្ភៈ ឆ្នាំ២០២៣ កីឡាករជើងខ្លាំង ធឿន ធារ៉ា បានប៉ះជើងខ្លាំងម្នាក់ទៀត គឺកីឡាករ ធីអាហ្គោ (Thiago) មកពី Brazil (ប្រេស៊ីល) ហើយ នៅក្នុងការប្រកួតនោះ ធឿន ធារ៉ា ប្រើពេល៤ទឹក ផ្តួលកីឡាករប្រេស៊ីលរូបនេះ ដើម្បីឈ្នះខ្សែក្រវាត់ IPCC Kun Khmer។
តាមរយៈវីដេអូនៃការប្រកួតនេះ អ្នកលេងបណ្ដាញសង្គមនៅកម្ពុជា បានសម្ដែងការអបអរសាទរចំពោះកីឡាករ ធឿន ធារ៉ា និង បានសម្ដែងក្ដីអាណិតជាពន់ពេកចំពោះកីឡាករ Thiago។ លើសពីនេះ ពេល Thiagoបានមកដើរលេងដល់ មុខព្រះបរមរាជវាំង ស្រាប់តែ ប្រជាពលរដ្ឋខ្មែរជាច្រើនាក់ សម្តែងក្តីរីករាយ ព្រមទំាងបានថតរូបជាមួយកីឡាករជនជាតិ Brazil ម្នាក់នេះទៀតផង។
តាមរយៈការគាំទ្រនេះ, Thiago បានផ្ញើទឹកចិត្តក្ដីស្រឡាញ់ចំពោះប្រជាជនកម្ពុជា ហើយចង់ឲ្យរូបគេ ក្លាយជាផ្នែកមួយនៅកម្ពុជា ទៀតផង។ បន្ថែមលើនេះ Thiago ក៏បានបង្ហោះលើបណ្ដាញសង្គមកាលពីពេលថ្មីៗនេះថា គាត់សប្បាយចិត្តដែលបានស្គាល់ក្បាច់គុន ដែលគាត់បានហាត់សមតាំងពីអាយុ ១៦ឆ្នាំ ហើយគាត់ធ្លាប់ហៅវាថាជា «ម៉ឺយថៃ» ដោយមិនបានដឹងថា ការពិតគឺគាត់បានហាត់គុនខ្មែរតាំងពីដើមមក។
ការបង្ហោះរបស់ Thiago Teixeira បានធ្វើឱ្យរសើបដល់អ្នកលេងបណ្ដាញសង្គមថៃ ហើយពួកគេមានការខឹងសម្បារយ៉ាងខ្លាំង ដោយទាមទាឱ្យ Thiago Teixeira លុបស្នាមសាក់នៅលើខ្នងរបស់គាត់ចេញជាមុនសិន មុនពេលដែលគាត់ផ្សព្វផ្សាយគុនខ្មែរទៅកាន់ពិភពលោក។
ក្រោយពីទទួលបានព័ត៌មាននេះ លោក ឌួង ឆាយ ដែលជាអ្នកស្នេហាវិស័យកីឡាមួយរូបដែរនោះ បានលើកឡើងនៅថ្ងៃទី១៦ ខែមីនា ឆ្នាំ២០២៣ថា «ខ្ញុំសូមចេញថ្លៃកែសាក់ដាក់គុនខ្មែរវិញ»។ តាមរយៈនេះ អ្នកលេងបណ្ដាញសង្គមខ្មែរ មានការគាំទ្រជាច្រើន៕
