គេនៅចាំបានថា ក្រោយពីរួមរស់ជាមួយគ្នាជាង១០ឆ្នាំ រហូតមានកូន៤នាក់ ប្រកបដោយសុខសុភមង្គលនោះ, អ្នកឧកញ៉ា គិត ម៉េង បានសម្រេចចូលរោងការជាមួយ អ្នកនាង ស្រីតូច ចំណាន កាលពីថ្ងៃទី២០ ខែមីនា ឆ្នាំ២០១៥ ដោយគិតមកដល់ពេលនេះ មានរយៈពេលជិត៨ឆ្នាំហើយ។
ស្របពេលកំពុងរស់នៅយ៉ាងមានសុភមង្គល, អ្នកឧកញ៉ា គិត ម៉េង តែងតែចែករំលែកចំណេះដឹង បទពិសោធន៍ទៅកាន់អ្នកគាំទ្ររបស់ខ្លួនផងដែរ។ ជាក់ស្ដែងនៅថ្ងៃទី២៤ ខែកុម្ភៈ ឆ្នាំ២០២៣នេះ អ្នកឧកញ៉ា បានបង្ហោះរូបថតគ្រួសាររបស់ខ្លួនជាច្រើនសន្លឹក ហើយពោលពាក្យថា «វាជារឿងប្រពៃ ដែលអ្នកចេះស្រឡាញ់ខ្លួនឯង និងមើលថែលើខ្លួនឯងនៅពេលយើងជិះយន្តហោះ មុននឹងយន្តហោះឡើង អ្នកបម្រើការនឹងបង្ហាញការណែនាំអំពីសុវត្ថិភាព និងរំឭកយើងពីវិធីប្រើប្រាស់ម៉ាស់អ៊ុកស៊ីហ្សែនក្នុងគ្រាអាសន្ន។
អ្នកបម្រើការលើយន្តហោះប្រាប់យើងឱ្យពាក់ម៉ាស់អ៊ុកស៊ីហ្សែនជាមុនសិន មុននឹងជួយអ្នកបន្ទាប់នៅក្បែរយើង។ ពេលយើងជួយខ្លួនឯងបានហើយ ទើបយើងអាចជួយអ្នកដទៃបាន។ យើងក៏មានឧទាហរណ៍មួយទៀតដែលជាពុទ្ធភាសិតមួយឃ្លាចែងថា៖ “អត្តាហិ អត្តនោ នាថោ” គឺមានន័យថាខ្លួនទីពឹងខ្លួន។
នេះគ្រាន់តែជាឧទាហរណ៍ពីរប៉ុណ្ណោះដែលងាយយល់ក្នុងការធ្វើឱ្យអ្នកចេះស្រទ្បាញ់ខ្លួនឯង។ ដូច្នេះ តើការមើលថែ ឬយកចិត្តទុកដាក់លើខ្លួនឯងមានសារៈសំខាន់យ៉ាងណា?»។
មនុស្សមួយចំនួនប្រហែលជាគិតថា “អត្ត” គឺជាអំពី “អាត្មានិយម” ។ ប៉ុន្តែ ខ្ញុំយល់ថាការមើលថែលើខ្លួនឯងមិនត្រូវបានចាត់ទុកថាជាអំពី “អាត្មានិយម” នោះទេ។ ការមើលថែ ឬយកចិត្តទុកដាក់លើខ្លួនឯងត្រូវធ្វើដោយឆន្ទៈខ្លួនអ្នក មិនមែនក្នុងចេតនាធ្វើទុក្ខទោស ឬកេងចំណេញពីអ្នកដទៃនោះទេ។
វាជារឿងប្រសើរក្នុងការយល់ដឹងអំពីសារៈសំខាន់នៃការមើលថែលើខ្លួនឯង។ “ប្រសិនបើខ្ញុំសប្បាយចិត្ត ខ្ញុំក៏អាចធ្វើឱ្យមនុស្សជុំវិញខ្ញុំសប្បាយចិត្តផងដែរ។ ប្រសិនបើខ្ញុំមានសុខភាពល្អ ខ្ញុំអាចមើលថែមនុស្សដែលខ្ញុំស្រទ្បាញ់បាន។ ប្រសិនបើខ្ញុំចេះស្រឡាញ់ខ្លួនឯង ខ្ញុំក៏អាចផ្តល់ក្តីស្រឡាញ់ដល់អ្នកដទៃបានដែរ»។
ឃ្លាទាំងនេះគឺសាមញ្ញ ប៉ុន្តែពិតជាមានន័យក្នុងការដាស់អារម្មណ៍អ្នក។ សូមចងចាំថាមុននឹងអ្នកជួយសង្គ្រោះអ្នកដទៃ សូមសង្គ្រោះខ្លួនអ្នកជាមុនសិន ដោយក្នុងនោះមាន សុភមង្គលតិចតួចរបស់អ្នក សុខភាពប្រចាំថ្ងៃរបស់អ្នក ទាំងផ្លូវកាយ ផ្លូវចិត្ត និងគោលដៅរយៈពេលវែងរបស់អ្នក។ មុននឹងចេះស្រទ្បាញ់អ្នកដទៃ សូមស្រទ្បាញ់ខ្លួនឯងជាមុនសិន»។
បន្ថែមលើនេះ អ្នកឧកញ៉ា គិត ម៉េង ក៏បានដាក់Captionទៅតាមរូបនីមួយៗផងដែរ ហើយរូប និងCaptionដែលចាប់អារម្មណ៍ គឺអ្នកឧកញ៉ាបិទឡេវអាវឲ្យកូនប្រុស ពោលពាក្យថា «កូនប្រុស កូនត្រូវដឹងថា វាជារឿងប្រសើរក្នុងការយល់ដឹងអំពីសារៈសំខាន់នៃការមើលថែលើខ្លួនឯង។ “ប្រសិនបើខ្ញុំសប្បាយចិត្ត ខ្ញុំក៏អាចធ្វើឱ្យមនុស្សជុំវិញខ្ញុំសប្បាយចិត្តផងដែរ។ ប្រសិនបើខ្ញុំមានសុខភាពល្អ ខ្ញុំអាចមើលថែមនុស្សដែលខ្ញុំស្រទ្បាញ់បាន។ ប្រសិនបើខ្ញុំចេះស្រឡាញ់ខ្លួនឯង ខ្ញុំក៏អាចផ្តល់ក្តីស្រឡាញ់ដល់អ្នកដទៃបានដែរ»។ ឃ្លាទាំងនេះគឺសាមញ្ញ ប៉ុន្តែពិតជាមានន័យក្នុងការដាស់អារម្មណ៍អ្នក»៕
