នៅថ្ងៃទី២២ ខែកុម្ភៈ ឆ្នាំ២០២៣នេះ ក្រុមហ៊ុនហង្សមាសគ្រុប បានធ្វើពិធីក្រុងពាលីផលិតរឿងភាគប្រវត្តិសាស្រ្ត មានចំណងជើងថា «អប្សារាមហាអង្គរ» ដែលមានរហូតទៅដល់៥០ភាគឯណោះ។
រឿងមួយនេះ ពិតជាអស្ចារ្យ ព្រោះ បានរៀបរាប់សម័យកាល អង្គរ និងតួអង្គអប្សរា ជាពិសេសមានតួអង្គល្បីៗជាច្រើនក្នុងប្រទេសកម្ពុជា មានសុទ្ធតែតារាជើងចាស់ វ័យក្មេង ស្រស់សង្ហារ និងបវរកញ្ញាដ៏ស្រស់ស្អាត ពោរពេញដោយសមត្ថភាព។
ក្នុងចំណោមតួអង្គល្បីជាច្រើននោះ ក៏មាន កញ្ញា ពេជ្រវត្តី សារ៉ាវុឌ្ឍី សម្តែង នាងឆផ្កា ផងដែរ។ ក្រោយចូលរួម ក្នុងពិធីក្រុងពាលីផលិតរឿងភាគប្រវត្តិសាស្រ្តខាងលើនេះរួចមក បវរកញ្ញាឯកទទួលបានលំដាប់រងទី៥ក្នុងកម្មវិធី Miss Grand Internation 2022រូបនេះ បានពោលពាក្យថា «ខ្សែភាពយន្តខ្នាតធំ រឿង«អប្សារាមហាអង្គរ» ជាភាពយន្តសម័យអង្គរក្នុងរជ្ជកាល ព្រះបាទជ័យវរ្ម័នទី៧ ចុងសតរត្សទី១២ បានធ្វើពិធីក្រុងពាលីបញ្ចប់ដោយរលូន
តិចមើលឆផ្កាមិនស្គាល់ទៅ»។
កញ្ញា ពេជ្រវត្តី សារ៉ាវុឌ្ឍី បន្តរៀបរាប់ពីតួអង្គខ្លួនថា «•អត្ថន័យខ្លះៗរបស់តួអង្គឆផ្កា:នាងឆផ្កាគឺជាតួអង្គមួយនៅក្នុងផ្ទៃរឿងដែលមានភាពរឹងមាំមិនទន់ជ្រាយចំពោះរឿងស្នេហាទេ នាងក្លាហានហ៊ានទូលថ្វាយនៅចំពោះមុខព្រះភក្ត្រព្រះរាជា ព្រះបាទ ជ័យ វរធន និងព្រះរាជអគ្គមហេសី ឥន្ទ្រទេវី ទៀតផង។
ទស្សន:របស់ ឆផ្កា- គ្រប់ដង្ហើមចេញចូលនៃជីវិត ព្រះឱរស ទេវបុត្រមិនត្រូវទ្រង់ព្រះចិន្តាថា អ្នកដទៃល្ងង់និងទន់ខ្សោយជាងអង្គឯងនោះទេ ត្រូវតែគប្បីសន្ដោសអភ័យទោសចំពោះកំហុសអ្នកដទៃ ពីព្រោះការធ្វើបែបនេះនាំឲ្យអ្នកមានកំហុសមានមុខមាត់ប្រសើរជាងការដាក់ទោសទណ្ឌ»។
គួរបញ្ជាក់ថា ក្នុងការលេចវត្តមាននៅក្នុងពិធីក្រុងពាលីផលិតរឿងខាងលើនេះ កញ្ញា ពេជ្រវត្តី សារ៉ាវុឌ្ឍី បានទម្លាយអារម្មណ៍ថា នាងស្ទើរតែមិនបានថតរឿងបែបប្រវត្តិសាស្រ្តខ្មែរមួយនេះ ក្រោយអ្នកដឹងនាំរឿងបានទាក់ទងទៅនាង ៥-៦ ដង តែនាងរវល់គ្រប់ពេល រហូតមានថ្ងៃមួយនាងបានមកថតរឿងមួយទៀតជាមួយហង្សមាស ដែលធ្វើឱ្យនាងទទួលបានឱកាសម្តងទៀតពីអ្នដឹកនាំរឿងដើម្បីឱ្យចូលសម្តែងក្នុងរឿង «អប្សរាមហាអង្គរ» នេះ។ ជាមួយគ្នានេះ ពេជ្រ វត្តីសារ៉ាវឌ្ឍី ក៏បានសម្តែងការប្ដេជ្ញាចិត្តថា នឹងពាំនាំវប្បធម៌ខ្មែរទៅកាន់ឆាកអន្តរជាតិឱ្យគេបានស្គាល់៕
