ប្រិយមិត្តមួយចំនួនទំនងជាជ្រាបរួចមកហើយថា អ្នកនាង សួស វីហ្សា និងលោកថមមី ទម្រាំតែក្លាយជាប្ដីប្រពន្ធនឹងគ្នាដូចសព្វថ្ងៃ ពួកគេធ្លាប់ឆ្លងកាត់ការតស៊ូជាមួយគ្នាជាច្រើនតាំងពីនៅជាសង្សារនឹងគ្នា ហើយក៏ធ្លាប់ត្រូវគេមើលងាយ ពេលពួកគេមានជីវភាពលំបាកផងដែរ។
ពួកគេ បានសម្រេចចិត្តរៀបអាពាហ៍ពិពាហ៍ជាមួយគ្នា កាលពីថ្ងៃទី២៩ ខែវិច្ឆិកាឆ្នាំ ២០១៩ ហើយក្រោយមកក៏បានទទួលចំណងដៃកូនស្រីដ៏គួរឲ្យស្រឡាញ់ម្នាក់ឈ្មោះ ថង សាម៉ូលីណា ហៅ Jenny កើតនៅថ្ងៃទី០៩ ខែតុលា ឆ្នាំ២០២០វេលាម៉ោង៩និង០៩នាទីព្រឹក នៅ មន្ទីរពហុព្យាបាល និងសម្ភព អរៀនដា។
បច្ចុប្បន្ន ពួកគេ កំពុងរស់នៅជាមួយគ្នាយ៉ាងមានក្ដីសុខ តែថ្មីៗនេះ សួស វីហ្សា បានបង្ហោះសារមួយទាំងកណ្ដាលយប់ ដោយមានន័យថា «អស់និស្សយ័នឹងគ្នាហើយ ដើរផ្លូវរៀងខ្លួនចុះ!!! ធ្វើឲ្យអ្នកគាំទ្រមានការចាប់អារម្មណ៍ជាខ្លាំង។ តាមរយៈសារនេះ អ្នកខ្លះសង្ស័យថា ពួកគេ បែកបាក់គ្នា ខណៈអ្នកខ្លះថា គ្រាន់តែជាចំណងជើងបទថ្មីប៉ុណ្ណោះ។
ក្រោយបង្ហោះសារបែបនេះរួចមក ស្រាប់តែនៅយប់ថ្ងៃទី១២ ខែកុម្ភៈ សួស វីហ្សា បានបង្ហោះសារទៀតថា «រូបភាពគេឃើញមើលមកដូចមានក្តីសុខ តែគ្រប់យ៉ាងបង្កប់នៅពីក្រោយដោយក្តីឈឺចាប់!» ជាហេតុកាន់តែធ្វើឲ្យអ្នកគាំទ្រមានការចាប់អារម្មណ៍ថែមទៀត។
បន្ថែមលើនេះ នៅរាត្រីឆ្លងចូលថ្ងៃទី១៦ ខែកុម្ភៈ ឆ្នាំ២០២៣នេះ សួស វីហ្សា បានបង្ហោះសារ១ទៀតគួរឲ្យចាប់អារម្មណ៍ថា «នឹកឃើញកាលពីស្រលាញ់គ្នាដំបូង កម្សត់ណាស់ តស៊ូណាស់ វេទនាណាស់ទម្រាំអាចមានថ្ងៃនេះ តែដោយសារលុយ កិត្តិយស មុខមាត់ ទើបធ្វើឲ្យជីវិតគូនេះត្រូវដើរដល់ផ្លូវ…»។
ទោះជាមានការបង្ហោះសារបែបនេះ ក៏ពិតមែន អ្នកគាំទ្រនាងភាគច្រើន នៅតែជឿថា នេះគ្រាន់តែជាអត្ថន័យក្នុងបទចម្រៀងថ្មីរបស់នាងប៉ុណ្ណោះ ដោយពួកគេលើកឡើងថា «ជិតFullហើយចេៗ, មួយបទនេះចេញមកដឹងតែកក្រើកបេះដូងប្រពន្ធស្របច្បាប់ហើយ, ទម្រាំចេញអស់ប្រហោងពោះហ្វេន, បទថ្មីប្រហែលទប់ទឹកភ្នែកមិនជាប់ទៀតហើយខ្ញុំ»។
ងាកមកថមមី វិញ នៅថ្ងៃបុណ្យក្ដីស្រឡាញ់ បានបង្ហោះរូបថតកូនស្រី ហើយពោលពាក្យថា «ជីវិតខ្ញុំកម្លាំងចិត្តខ្ញុំ តែងតែមកលួងលោមឲ្យកម្លាំងចិត្តថើបឪពុករហូត ម្ចាស់ជីវិតប៉ាៗមានតែកូនស្រីទេ ដែលផ្តល់ភាពស្រលាញ់ស្មោះ និងអោយតម្លៃមកកាន់ប៉ាយ៉ាងពិតប្រាកដ I love You Jenny Happy valentine for you Jenny សូមជូនពរអោយកូនស្រីឆ្លាត ពូកែ សំណាងល្អ អាយុវែងណាកូនណា
14 កុម្ភៈ សម្រាប់កូនស្រីគឺពិសេសលើសគេ»។
ដោយឡែក នៅព្រឹកថ្ងៃទី១៦ ខែកុម្ភៈ ឆ្នាំ២០២៣ លោកខ្ជិលធ្វើការបកស្រាយច្រើន សុខចិត្តទុកឲ្យពេលវេលាជាអ្នកបង្ហោះចុះ។ ថមមី បានបង្ហោះសារនៅលើទំព័រហ្វេសប៊ុករបស់ខ្លួនដូច្នេះថា «ខ្ជិលបកស្រាយច្រើនទុកឲ្យពេលវេលាជាអ្នកបង្ហាញចុះ»។
ទោះជានិយាយមើលទៅពួកគេ ដូចជាបែកគ្នាមែន តែថមមី បានបញ្ជាក់កាលពីពេលថ្មីៗហើយថា «ប្តីប្រពន្ធខ្ញុំតស៊ូជាមួយគ្នាណាស់ ស្រលាញ់គ្នាណាស់ . រាល់ថ្ងៃទោះបីបើខឹង ឬឈ្លោះគ្នាក៏យើងមិន ដែលមកហែកខ្លួនឯងតាមបណ្តាញសង្គមចឹងដែរ. ២នាក់ខ្ញុំ មិនងាយបែកបាក់គ្នាទេ លុះត្រាតែអស់ជីវិតរៀងខ្លួន .ទោះថ្ងៃក្រោយយើងទាំងប្រែជាអ្វី ក៏នៅតែស្រលាញ់គ្នាស្មោះត្រង់នឹងគ្នាលុះសូន្យសង្ខារ.»៕
