បទចម្រៀងមួយបទមានចំណងជើងថា «ថ្នម» ជាសំនៀងដើមរបស់អធិរាជសំឡេងមាស ស៊ីន ស៊ីសាមុត ត្រូវបានច្រៀងឡើងវិញ ដោយអ្នកនាង ម៉េង កែវពេជ្ជតា និងលោក យ៉ែម សំអូន នោះ ត្រូវបានជនជាតិបរទេសម្នាក់ សរសើរ មិនដាច់ពីមាត់។
ជុំវិញរឿងនេះ អ្នកនាង ម៉េង កែវពេជ្ជតា មានក្ដីរំភើបជាពន់ពេក ក៏បង្ហោះវីដេអូ ជនបរទេសរូបនោះ អមដោយសារ បញ្ជាក់ដូច្នេះថា «បទចម្រៀង ថ្នម សំនៀងដើម អធិរាជសំនៀងពេជ្រ លោក ស៊ីន ស៊ីសាមុតផ្ដើមគំនិតរៀបចំធ្វើជាថ្មី និងបង្កើតផ្ទាំងទស្សនីយភាពដោយ ឯកឧត្តម ទិត្យ ថាវរិទ្ធ ច្រៀងឡើងវិញដោយនាងខ្ញុំ ម៉េង កែវពេជ្ជតា និងលោក យ៉ែម សំអូន
ក្នុងឱកាសវគ្គផ្តាច់ព្រ័ត្រសម័យប្រលងចម្រៀងសាកលក្រោមការរៀបចំអំពីក្រសួងវប្បធម៌ និងវិចិត្រសិល្បៈ ថ្ងៃទី ២៦.តុលាឆ្នាំ ២០១៩ នៅសាលមហោស្រព កោះពេជ្រ ( នាងខ្ញុំជាគណៈកម្មការផ្តល់ពិន្ទុផង និងជាតារាចម្រៀងកិត្តិយសក្នុងគ្រានោះផង )
ម្ចាស់ឆានែលយូធូប Oyea Bangla ជនជាតិ បង់ក្លាដេសរូបនេះ បានធ្វើការវិភាគសំឡេងនាងខ្ញុំ ជាភាសាអង់គ្លេស។ ខ្ញុំយល់មិនអស់ទេ ប៉ុន្តែតាមរយៈការជួយបកប្រែបន្ថែមពីមិត្ត គឺពិតជាធ្វើអោយខ្ញុំមានក្តីរំភើបជាពន់ពេកណាស់។
មិនត្រេកអរមិនបានទេ ព្រោះពាក្យខ្លះខ្ញុំមិនសូវឮគេសរសើរប្រាប់ខ្ញុំ ពិសេសអ្នកមានអាជីពដូចគ្នាខ្លះ..។ សូមថ្លែងអំណរគុណដល់ម្ចាស់ឆានែល ដែលបានកោតសរសើរ និងផ្តល់តម្លៃដល់នាងខ្ញុំ គឺជាការផ្តល់កិត្តិយសដ៏ធំធេងមិនមែនត្រឹមតែខ្ញុំ គឺបានដល់លោកឪពុកអ្នកម្តាយ និងត្រកូលរបស់ខ្ញុំទាំងមូលផងដែរ សូមអរគុណណាស់ អរគុណមែនទែន
ខ្ញុំក៏សូមអរគុណថ្នាក់ដឹកនាំនៃស្ថានីយទូរទស្សន៍បាយ័ន និងថ្នាក់ដឹងនាំក្រសួងវប្បធម៌ និងវិចិត្រសិល្បៈ ដែលបានផ្តល់កិត្តិយសដល់នាងខ្ញុំក្នុងការធ្វើជាគណៈកម្មការផ្តល់ពិន្ទុ និងជាតារាចម្រៀងកិត្តិយសក្នុងពិធីជាតិដ៏អស្ចារ្យនេះ
សូមអរគុណដល់ប្អូនស្រី Vuth Chanmoly ដែលបានជួយនាំយកសម្លៀកបំពាក់អំពីសំអាងការ ណុបដាណេ មករៀបចំអោយនាងខ្ញុំ។ បុរសបរទេសរូបនេះ គាត់ក៏មិនភ្លេចសរសើរសំឡេង លោកយ៉ែម សំអូន និងសរសើរការរៀបចំឈុតឆាកដ៏ប្រណិតឥតខ្ចោះនេះផងដែរ។ ចង់ដឹងថាគាត់មានមតិយ៉ាងណាសូមអញ្ជើញទស្សនាវីដេអូ និងអានការបកប្រែជាភាសាខ្មែរខ្លះអំពីមិត្តខ្ញុំ។ សូមអរគុណ
បន្ថែម : នាងខ្ញុំសូមឧទ្ទិសស្នាដៃនេះជូនដល់វិញ្ញាណក្ខន្ធបិតាចម្រៀងខ្មែរ លោក ស៊ីន ស៊ីសាមុត ដែលជាម្ចាស់សំនៀងដើម និងរៀមច្បងផ្សេងទៀតដែលជាកវីនិពន្ធ អ្នកតន្ត្រីដែលបានកសាងស្នាដៃដ៏ល្អឯកគ្មានពីរនេះឡើងទុកអោយយើងខ្ញុំជំនាន់ក្រោយបានល្បីដោយសារដែរ សូមលោកទាំងអស់អញ្ជើញបានដល់ឋានបរមសុខកុំបីឃ្លាត»៕
