គេនៅចាំបានថា អ្នកនាងសួស វីសា និង លោកថមមី បានសម្រេចចិត្តរៀបអាពាហ៍ពិពាហ៍ជាមួយគ្នា កាលពីថ្ងៃទី២៩ ខែវិច្ឆិកាឆ្នាំ ២០១៩ ក្រោយពីពួកគេ បានតស៊ូ និងស្វែងយល់ចិត្តគ្នាប្រមាណជាង៤ឆ្នាំ។
ក្រោយរៀបការ ពួកគេក៏ទទួលចំណងដៃកូនស្រីដ៏គួរឲ្យស្រឡាញ់ម្នាក់ឈ្មោះ ថង សាម៉ូលីណា ហៅ Jenny កើតនៅថ្ងៃទី០៩ ខែតុលា ឆ្នាំ២០២០វេលាម៉ោង៩និង០៩នាទីព្រឹក នៅ មន្ទីរពហុព្យាបាល និងសម្ភព អរៀនដា។
រំលឹកថ្ងៃខួបអាពាហ៍ពិពាហ៍រយៈពេល២ឆ្នាំ កាលពីអំឡុងឆ្នាំ២០២១របស់ពួកគេ, លោកថមមី បានធ្វើឲ្យអ្នកនាង សួស វីសា រំភើបចិត្ត មិនស្ទើរនោះទេ ដោយលោក បានរំលឹកអនុស្សាវរីយ៍ជាច្រើនកាលនៅគ្រាក្រ និងធ្វើតាមការសន្យា ដោយនាំភរិយារបស់ខ្លួនទៅជិះកន្ទុំរុយទៀតផង។
ទោះយ៉ាងណា ស្របពេលពួកគេ កំពុងស្រឡាញ់គ្នាសុខៗ ស្រាប់តែនៅរាត្រីឆ្លងចូលថ្ងៃទី១១ ខែកុម្ភៈ ឆ្នាំ២០២៣ តារាចម្រៀង សួស វីសា បានបង្ហោះសារយ៉ាងភ្ញាក់ផ្អើលថា «អស់និស្សយ័នឹងគ្នាហើយដើរផ្លូវរៀងខ្លួនចុះ!!!»។
តាមរយៈនេះ អ្នកគាំទ្រខ្លះគិតថា ពួកគេ កំពុងបែកបាក់គ្នា ក៏ចូលខំមិនថា «គិតឲ្យច្បាស់សិនទៅអាយដល, យីកូនម្ដាយគិតសិន, កើតអីអូន, ជីវិតគ្រួសារ»។ ដោយឡែក អ្នកគាំទ្រ ផ្សេងទៀតគិតថានេះ គ្រាន់តែជាចំណងជើងបទចម្រៀងថ្មីប៉ុណ្ណោះ៕
