និយាយដល់ឈ្មោះ ទុំ សុវត្ថិ នោះ ប្រិយមិត្តច្បាស់ជាជ្រាបសឹងគ្រប់គ្នារួចមកហើយថា រូបគេ បានប្រែក្លាយគ្រោះក្លាយជាលាភ ក្រោយពីទទួលបានការគាំទ្រច្រើនពីមហាជន បើទោះរូបគេត្រូវធ្លាក់ចេញពីកម្មវិធីCambodian Idolត្រឹមវគ្គJugde Audition ក្រោមការសម្រេចចុងក្រោយ របស់លោក ឆន សុវណ្ណរាជ ក៏ដោយចុះ។
បច្ចុប្បន្ន ទុំ សុវត្ថិ ត្រូវបានមហាជនស្គាល់ស្ទើរតែមួយប្រទេសទៅហើយ ដោយអាចនិយាយបានថា ល្បីជាងម្ចាស់ពានទៅទៀតនោះ ហើយឱកាសការងាររកលុយចំពោះយុវជនមានប្រវត្តិដ៏កម្សត់រូបនេះ ក៏មានច្រើនផងដែរ។
បន្ថែមលើនេះ ក្រោយប្រឡូកក្នុងវិស័យសិល្បៈមួយរយៈ គេក៏ឃើញ ទុំ សុវត្ថិ បានបញ្ចេញMVដំបូងរបស់ខ្លួនមានចំណងជើងថា«ឈឺទេពេលឮពេញត្រចៀក» ជាប្រភេទបទ Original Song កាលពីកណ្ដាលឆ្នាំមុន ដោយទទួលបានការចាប់អារម្មណ៍ជាខ្លាំង។
ដោយឡែក ថ្មីៗនេះ បាត់មុខមួយរយៈ ទុំ សុវត្ថិ បានថតរូបបង្ហោះជាមួយនឹងអតីតបេក្ខនារីក្នុងកម្មវិធីប្រឡងចម្រៀង លំដាប់ថ្នាក់ ពិភពលោក Cambodian Idol រដូវកាលទី ៤ កញ្ញា នួន បូល័ក្ខណ៍ ដែលកំពុងល្បីលើទីកតុក ហើយពោលពាក្យថា «ស្នាមញញឹមដ៏មានន័យជាមួយបងស្រី ជំទាវ និងប្អូនស្រីជាទីស្រឡាញ់» បានធ្វើឲ្យមហាជន មានការចាប់អារម្មណ៍ផងដែរ៕
