កាលពីថ្ងៃទី១ ខែកុម្ភៈ ឆ្នាំ២០២៣កន្លងទៅនេះ កីឡាករ ប៊ូខាវ បានចូលរួមនៅក្នុងពិធីសម្ពោធរឿងMarvel Studios’ Ant-Man and The Wasp: Quantumania ហើយបានផ្ដល់បទសម្ភាសន៍ទៅកាន់អ្នកកាសែត ដោយបង្ហាញអារម្មណ៍របស់ខ្លួន ខណៈកម្ពុជាធ្វើជាម្ចាស់ផ្ទះស៊ីហ្គេម និងដាក់វិញ្ញាសារ គុនខ្មែរ ក្នុងការប្រកួតនោះ។
នៅពេលនោះ អ្នកកាសែតថៃ បានសួរថា តើប៊ូខាវ មានការយល់ឃើញដូចម្ដេច ក្រោយកម្ពុជាធ្វើជាម្ចាស់ផ្ទះកីឡាស៊ីហ្គេម ហើយប្ដូរឈ្មោះវិញ្ញាសាប្រកួត Moay Thaiទៅជាគុនខ្មែរ? ភ្លាមនោះ ប៊ូខាវ ឆ្លើយថា «រឿងកម្ពុជាដាក់គុនខ្មែរ នៅស៊ីហ្គេមជាសិទ្ធិរបស់គេ យើងមិនអាចនិយាយបានទេ ហើយគុនខ្មែរ គឺត្រឹមតែលំដាប់អាស៊ាន យើងកុំទៅខ្វល់អី។ យើងត្រូវនិយាយដល់ក្នុងព្រឹត្តិការណ៍អូឡាំពិក ព្រោះរបស់ថៃយើង Original “ លេខ ១ ” ទៅហើយ»។
ការនិយាយបែបនេះ បានធ្វើឲ្យប្រជាជនកម្ពុជាមានប្រតិកម្មយ៉ាងខ្លាំង។ ងាកមក ប៊ូខាវ ក្រោយនិយាយបែបនេះរួច បែរជាបង្ហោះរូបថតជាច្រើនសន្លឹក ពេលមកប្រកួតនៅកម្ពុជា អមដោយសាររៀបរាប់ថា «លោកខ្លួនឯងមិនមានបញ្ហាអ្វីជាមួយគុនខ្មែរ ឬប្រជាជនខ្មែរទេ។ តែរឿងមួយ ដែលដក់ជាប់ក្នុងចិត្តនោះគឺ ខ្ញុំសូមសំណូមពរដល់គណៈគ្រប់គ្រងប្រដាល់កម្ពុជា ជួយតាមដានថ្លៃប្រដាល់របស់ខ្ញុំនៅស្រុកខ្មែរផង កាលពីចូលរួមប្រកួត World fight tournament លើកចុងក្រោយ គឺនៅខ្វះ 2.2 លានបាតទៀត។ ដូច្នេះក្នុងឱកាសនេះ ជួយអនុគ្រោះផងបាទ»។
ក្រោយពីមានការទទូចបែបនេះ លោក គង់ វិសាល បានធ្វើការបង្ហោះសារបកស្រាយថា «រឿង កីឡាករប៊ួខាវ មកប្រកួតនៅកម្ពុជាកន្លងមកនោះ!! .. គឺជនជាតិថៃគ្នាគាត់ឈ្នោះ . TIPAYA SRISUD កាន់ Passport លេខ: AB2468835 ឈ្មោះ ហៅក្រៅ . Mr Oun ក្រោយមកប្តូរឈ្មោះ Tonny Ann . ជាអ្នកទាក់ទងយកមកប្រកួតទេ រឿងលុយបានចំណាយ ទៅកីឡាករប៊ួខាវ គ្រប់ចំនួន ឬមិនគ្រប់ មិនពាក់ព័ន្ធភាគី កម្ពុជាឡើយ ៕ សូមប្រិយមិត្ត ដែលស្នេហាវិស័យកីឡាប្រដាល់ទាំងក្នុងទាំងក្រៅប្រទេស ព្រមទាំង ភាគី កីឡាករប៊ួខាវ សូមមេត្តាជ្រាប។
ទោះយ៉ាងណា រហូតមកដល់ពេលនេះ គេមិនឃើញកីឡាករប៊ូខាវចេញមុខឆ្លើយតប ឬសុំទោសចំពោះភាគីកម្ពុជា ជាសាធារណៈឡើយ ទើបនៅថ្ងៃទី៧ ខែកុម្ភៈ ឆ្នាំ២០២៣ វេជ្ជបណ្ឌិត សែម រតនា បានបង្ហោះស្ក្រីនសតជាច្រើន អមដោយសាររៀបរាប់ថា «តាមពិតជនជាតិខ្លួនឯងខិលខូចបែរជាប្រកាសចោទជាតិគេជាសាធារណៈ!!!
—————————–
ខ្មែរទូទាំងប្រទេសកំពុងត្រូវបានគេចោទប្រកាន់ទាំងដែលខ្លួនមិនបានធ្វើ តើរឿងមួយនេះគួរទាមទារឲ្យមានការខមោទោសជាសាធារណៈដែលទេ ឬយ៉ាងណា? ដើម្បីកុំឲ្យកើតមានការយល់ច្រទ្បំ ព្រោះប្រជាជនខាងគេជឿ១០០០% ទាំងដែលគ្មានភស្តុតាងច្បាស់លាស់ នាំគ្នាឌឺដងដាក់ខ្មែរដូចទឹកបាក់ទំនុប ដោយសារតែសម្តីបុគ្គលម្នាក់នោះ។
មិនមែនខ្ញុំចង់ដុតកំហឹង ពន្យុះឲ្យប្រទេសទាំងពីរឈ្លោះគ្នានោះទេ អ្វីដែលជារបស់ពិត សាងចេញពីដៃអ្នកខ្ញុំនៅតែកោតសរសើរ ខ្ញុំដឹងថាប្រទេសណាក៏មានមនុស្សល្អ និង មនុស្សមិនល្អដែរ តែលើកនេះគឺវាប៉ះដល់កិត្តិយសខ្មែរទូទាំងប្រទេស ព្រោះអ្នកគឺជាបុគ្គលដែលគេស្គាល់លំដាប់អន្តរជាតិ មិនមែនចេះតែផុសតាមចិត្តខឹងសម្បាររបស់ខ្លួននោះទេ?
ពេលនេះភាគីកម្ពុជាបានស្រាយបំភ្លឺហើយ តែបុគ្គលម្នាក់នោះដូចជាមិនទាន់ឃើញតបតអ្វីនោះទេនៅលើផេកជាសាធារណៈរបស់ខ្លួន តើពេលនេះមានសារព៌តមានទាំងនៅក្នុងស្រុករបស់អ្នក និង អន្តរជាតិប៉ុន្មានដែលបានចុះផ្សាយពីរឿងនេះ? តើកិត្តិយសរបស់សហព័ន្ធកីទ្បាគុនខ្មែរ និងជនជាតិខ្មែរទូទាំងប្រទេសអ្នកណាទទួលខុសត្រូវ? #យុត្តិធ៌មសម្រាប់កម្ពុជា»៕
