នៅមុនទៅប្រកួតលើសង្វៀន Thai Fight នោះ, កីឡាករ ព្រំ សំណាង បានបង្ហាញភាពជឿជាក់ និងប្តេជ្ញាថា នឹងធ្វើឱ្យបានល្អសម្រាប់ការប្រកួតដំបូងរបស់ខ្លួន ពេលត្រូវជួបកីឡាករជនជាតិអង់គ្លេស Thomas Capenter នោះ។
ក្រោយមក គេសង្កេតឃើញថា មានស្នេហាវិស័យកីឡា បានឧបត្ថម្ភដល់កីឡាករគុនខ្មែរជម្រើសជាតិកម្ពុជារូបនេះ ជាបន្តបន្ទាប់ សម្រាប់សោហ៊ុយធ្វើដំណើរទៅប្រកួត។ ក្នុងនោះ អ្នកស្រី ទ្រី ដាណា បានប្រកាសថា «នាងខ្ញុំជួយលើកទឹកចិត្ត កីឡាករ ព្រំ សំណាង 1000$ ដើម្បីជាមធ្យោបាយទៅប្រកួតនៅ Thai Fight លើកដំបូង ថ្ងៃទី៥ ខាងមុខនេះ។ លឺថាគាត់ជាជាងកាត់សក់ តែវាយខ្លាំង នាងខ្ញុំលើកទឹកចិត្តតស៊ូបន្តទៀត ដើម្បីគុនខ្មែរ អរគុណសម្រាប់ការខិតខំកន្លងមក»។
បន្ថែមលើនេះ នៅថ្ងៃទី៥ ខែកុម្ភៈ ឆ្នាំ២០២៣ ពេលទទួលដំណឹងថា ជាងកាត់សក់ដៃឯករូបនេះ បានយកឈ្នះកីឡាករជនជាតិអង់គ្លេស Thomas Capenter ត្រឹមទឹកទី១នោះ អ្នកស្រី ទ្រី ដាណា បានប្រកាសឧបត្ថម្ភបន្ថែមទៀតនូវទឹកប្រាក់រហូតដល់១ពាន់ដុល្លារ។
បង្ហោះភ្ជាប់ជាមួយរូបថត ព្រំ សំណាង ពេលប្រកួត និងទទួលបានជយជម្នះ, ថៅកែហាងពេជ្រចិត្តធម៌រូបនេះ បានប្រកាសដូច្នេះថា «សូមអបអរសាទរ ព្រំ សំណាង ផ្ដួលកីឡាករអង់គ្លេស ទឹកទី១ នៅ Thai Fight។ នាងខ្ញុំជូន 1000$ បន្ថែមទៀត លើកទឹកចិត្ត សរុប 2000$! ពិតជាអស្ចារ្យមែន ដើម្បីគុនខ្មែរ»៕
