ប្រិយមិត្ត បានជ្រាបរួចមកហើយថា កាលពីថ្ងៃទី១ ខែកុម្ភៈ ឆ្នាំ២០២៣កន្លងទៅនេះ កីឡាករ ប៊ូខាវ បានចូលរួមនៅក្នុងពិធីសម្ពោធរឿងMarvel Studios’ Ant-Man and The Wasp: Quantumania ហើយបានផ្ដល់បទសម្ភាសន៍ទៅកាន់អ្នកកាសែត ដោយបង្ហាញអារម្មណ៍របស់ខ្លួន ខណៈកម្ពុជាធ្វើជាម្ចាស់ផ្ទះស៊ីហ្គេម និងដាក់វិញ្ញាសារ គុនខ្មែរ ក្នុងការប្រកួតនោះ។
នៅពេលនោះ អ្នកកាសែតថៃ បានសួរថា តើប៊ូខាវ មានការយល់ឃើញដូចម្ដេច ក្រោយកម្ពុជាធ្វើជាម្ចាស់ផ្ទះកីឡាស៊ីហ្គេម ហើយប្ដូរឈ្មោះវិញ្ញាសាប្រកួត Moay Thaiទៅជាគុនខ្មែរ? ភ្លាមនោះ ប៊ូខាវ ឆ្លើយថា «រឿងកម្ពុជាដាក់គុនខ្មែរ នៅស៊ីហ្គេមជាសិទ្ធិរបស់គេ យើងមិនអាចនិយាយបានទេ ហើយគុនខ្មែរ គឺត្រឹមតែលំដាប់អាស៊ាន យើងកុំទៅខ្វល់អី។ យើងត្រូវនិយាយដល់ក្នុងព្រឹត្តិការណ៍អូឡាំពិក ព្រោះរបស់ថៃយើង Original “ លេខ ១ ” ទៅហើយ»។
ការនិយាយបែបនេះ ធ្វើឲ្យ ឧកញ៉ាស្រី ចាន់ថន មានប្រតិកម្ម ហើយចែករំលែកវីដេអូ និយាយខាងលើនេះ កាលពីថ្ងៃទី២ ខែកុម្ភៈ អមដោយការប្រកាសថា «ជាសំដីចេញពីមាតុប៊ូខាវ មិនអីទេខ្មែរមិនចង់បានលោកប៊ូខាវទេ ក្នុងនាមខ្ញុំបាទជាអនុប្រធាន កិត្តិយសរបស់សហព័ន្ធកីឡាប្រដាល់គុណខ្មែរ
ខ្មែរក៏មានអ្នកខ្លាំងដែរ បើខ្មែរវ៉ៃប៊ូខៅឈ្នះអោយវិឡារមួយឡានមួយ និងថវិកាបន្ថែមប្រចាំរយៈពេល១០ឆ្នាំ នេះជាការលើកទឹកចិត្តដល់កីឡាកខ្មែរ តស៊ូដើម្បីមុនមាតុជាតិរបស់យើង I love Cambodia»។
ដោយឡែក នៅថ្ងៃទី៥ ខែកុម្ភៈ ឆ្នាំ២០២៣ ពេលកីឡាករ ព្រំ សំណាង ទៅប្រកួតនៅសង្វៀនThai Fight ឈ្នះកីឡាករ បរទេសនោះ, លោកជឿន ប៊ុនចក់ ហៅអេដមីន ជីងចក់ បានបង្ហោះសារយ៉ាងចាក់ដោតទទូចឧកញ៉ាៗមួយចំនួនថា «ព្រំ សំណាង ពិតជាធ្វើអោយគុនខ្មែរកាន់តែល្បី និងគេស្គាល់រឹតតែខ្លាំងឡើង បន្ទាប់ពីផ្ដួលដៃគូអោយសន្លប់ក្នុងទឹកទី១ ឧបត្ថម្ភមក លោកឧកញ៉ា អ្នកឧកញ៉ា កុំចាំទាល់តែឈ្នះ ប៊ួខាវបានអោយគ្នា ដូចវាមិនសម!»។
បន្ថែមលើនេះ ពូចក់ បានបញ្ជាក់ក្នុងខំមិនថា «ចាំឈ្នះ បានអោយគ្នា! អាណាក៏ចេះនិយាយដែរ! កីឡាករណាក៏ដោយអោយតែគុនខ្មែរ ឈ្នះឧបត្ថម្ភគ្រប់គ្នា។ មិនបាច់តាឈ្នះ ប៊ួខាវទេ មិនចឹងកនយើង គុនខ្មែរយើង»។
ទោះយ៉ាងណា ឧកញ៉ាស្រី ចាន់ថន បានប្រកាសឧបត្ថម្ភ១០លានរៀលដល់ព្រំ សំណាង រួចហើយ ក្រោយឈ្នះបរទេសនោះ ពោលគឺមុន ពូចក់ បង្ហោះសារទៅទៀត។ បង្ហោះភ្ជាប់ជាមួយវីដេអូ ព្រំ សំណាង វាយជាមួយបរទេស ឧកញ៉ាស្រី ចាន់ថន បានប្រកាសដូច្នេះថា «#ឧបត្ថម្ភថវិការសរុប( 10លានរៀល) សំរាប់លើកទឹកចិត្តដល់ព្រំ សំណាង ដែលបានយកជ័យជម្នះជូនជាតិមាតុភូមិ #អបអរសាទរកីឡាករគុនខ្មែរ ព្រំ សំណាង ដែលបានផ្ដួលដៃគូរឲសន្លប់ទឹកទី១ នៅថៃហ្វៃ។ សាងកេរ្តិ៍ឈ្មោះ និងលើកស្ទួយកិត្តិយសខ្មែរ។
អ្វីដែលសម្រេចបាន ត្រូវតែលើកតម្កើង ហើយអ្វីដែលមិនទាន់សម្រេចយើងនឹងបន្តប្រឹងប្រែង និងគាំទ្រ #សូមទំនាក់ទំនងលេខក្រុមការងារបង 081 43 43 55/ 077 779 799»៕
