ប្រិយមិត្ត បានជ្រាបរួចមកហើយថា កាលពីថ្ងៃទី២៦ ខែវិច្ឆិកា ឆ្នាំ២០២២កន្លងទៅនេះ, អ្នកនិពន្ធ និងដឹកនាំរឿងដ៏ល្បី លោក កៅ សីហា បានប្រកាសយកកូនច្បងរបស់អ្នកនាង សឿ សុធារ៉ា និង តារាចម្រៀង សាពូន មីដាដា យកមកកែច្នៃឲ្យមានពន្លឺចែងចាំង ធ្វើឲ្យមហាជនសាទរយ៉ាងខ្លាំង។
ងាកមក លោក សាពូន មីដាដា នៅយប់ថ្ងៃដដែលនោះ បានបង្ហាញអារម្មណ៍ពោរពេញដោយក្ដីស្រឡាញ់ នៅពេលកូនស្រីច្បង ច្រៀងចម្រៀងផ្ញើឲ្យលោកស្ដាប់។ ទោះយ៉ាងណា លោក មិនចង់ឲ្យកូនស្រីដើរលើវិថីសិល្បៈដូចលោកនោះឡើយ។
ក្រោយមក, តារាចម្រៀង សាពូន មីដាដា ទំនងជាផ្លាស់ប្ដូរគំនិតរបស់ខ្លួនវិញ ដោយលោក បានបង្ហោះរូបថត១សន្លឹកបង្ហាញពីសកម្មភាពកូនៗកំពុងដេញហ្គីតា អមដោយសារបញ្ជាក់ប្រាប់ថា «កូនសិស្សថ្មី ចាប់ផ្ដើមរៀនពីពេលនេះទៅហើយ»។
បន្ថែមលើនេះ នៅថ្ងៃទី២៤ ខែធ្នូ ឆ្នាំ២០២២ លោក បានបង្ហោះចម្រៀង១បទ ដែលកូនស្រីច្រៀងផ្ញើមកឲ្យ ហើយរៀបរាប់ថា «កូនស្រីផ្ញើឲ្យពុកទៀតហើយ ស្អែកឯណោះទេបានដល់ថ្ងៃ២៥ តែបង្ហោះឲ្យហើយតាម្រ៉ងទៅ មិនមែនជាបុណ្យប្រពៃណីក្មែរឡើយ តែក៏មិនខុសទាស់អ្វីដែរ សូមឲ្យមនុស្សសត្វទាំងឡាយរស់លើជម្ពូទ្វីប ( ផែនដី ) នេះប្រកបតែ និងសេចក្ដីសុខ»។
ដោយឡែក នៅថ្ងៃទី១ ខែមករា ឆ្នាំ២០២៣ សាពូន មីដាដា បានបន្តបង្ហោះវីដេអូកូនស្រីច្រៀងបទរបស់លោកជាឪពុក ជាមួយនឹងការដេញហ្គីតា ហើយរៀបរាប់ថា «( កូនស្រីដេញហ្គីតា និងច្រៀងបទឪពុក ប្រែមកជាស្រីច្រៀងវិញ នារីម្នាក់ ដែលគិតដល់បង )
កាលពុកអាយុ12 ឆ្នាំប៉ុនកូន ពុកនៅស្រុកឃ្វាលគោតាមវាលស្រែស្រែកច្រៀងខ្វើយៗតែបទ តាស៊ីន ស៊ីសាមុត កែវ សារ៉ាត ទេ ហើយគិតរហូតថាពេលគោមួយនឹមហ្នឹងធំបន្តិចនឹងលក់វាយកប្រាក់មកភ្នំពេញស្វែងរកក្តីស្រមៃ …. សូមបងៗអ៊ំពូមីង សណ្តាប់មុនចូលសំរាន្ត ….»៕
