ឆ្លង​ការ​ហ្វឹកហាត់ ​និង​រៀន​សូត្រ​ពី​ថៅកែ​ជនជាតិ​កូរ៉េ​ជាច្រើន, អ្នក​ឧកញ៉ា ឡេង ណាវ៉ាត្រា លើក​ឡើង​ថា កំហុស​ដ៏​ធំ​របស់ខ្ញុំ…(មាន​វីដេអូ)​

អ្នកឧកញ៉ា ឡេង ណា​វ៉ា​ត្រា ដែល​គេ​ស្គាល់​ស្ទើរ​គ្រប់គ្នា​ថា ជា​អតីត​ពលករ​នៅ​ប្រទេស​កូរ៉េ​នោះ, នៅថ្ងៃទី២៣ ខែមករា ឆ្នាំ២០២៣នេះ បានចែករំលែកបទពិសោធន៍​ពាក់ព័ន្ធនឹងការដឹកនាំក្រុមហ៊ុន ក្នុង​នោះ​ឆ្លៀត​និយាយ​ពី​កំហុស​ដ៏​ធំ​របស់​ខ្លួន​ផង​ដែរ។

បង្ហោះភ្ជាប់ជាមួយវីដេអូ ក្នុង​កម្មវិធី​ជួបជុំ​មហា​សាមគ្គី បុគ្គលិក​តាម​តំបន់ អ្នកឧកញ៉ាចិត្តធម៌រូបនេះ បានលើកឡើងថា « ការដឹកនាំ​ដោយ​គុណធម៌ សច្ចៈ​ធម៌ ម៉ឺងម៉ាត់ និង​ការប្រើ​ភាសា​បេះដូង យុទ្ធសាស្ត្រ​ឈ្នះ​ឈ្នះ ចែកគ្នា​រស់​ទៅតាម​សមត្ថភាព មិន​យក​អ្នកណា​ធ្វើ​សត្រូវ មិន​បង្កបញ្ហា តែបើ​ជួប​បញ្ហា​ត្រូវតែ​ដោះ​បញ្ហា​។

នៅលើ​លោក​នេះ​បច្ចុប្បន្ន យើង​ធ្វើអំពើ​ល្អ​ឬ​ការដឹកនាំ​ល្អ ទាមទារ​ឲ្យ​យើង​ចេះ​និយាយ បើ​ចេះតែធ្វើ​ហើយ​មិនចេះ​និយាយ ពិបាក​ប្រកួតប្រជែង​ជាមួយ​គេ​។ កំហុស​ដ៏​ធំ​របស់ខ្ញុំ គឺ​ចេះ​ធ្វើ​តែ​មិន ចេះ​និយាយ​។​

ការដឹកនាំ​អង្គភាព​ការដឹកនាំ​ក្រុមហ៊ុន មិនអាច​យក ទម្រង់​បែបបទ​តែមួយ​មក​ដឹកនាំ​នោះទេ​។ ព្រោះ​កាលៈទេសៈ​ផ្សេងគ្នា ក្រុមហ៊ុន​ផ្សេងគ្នា រាល់​ការ​ដោះ​បញ្ហា គឺមាន​របៀប​ផ្សេងគ្នា​។ យើង​មិនអាច វាយតម្លៃ​អ្នកណាម្នាក់​ដឹកនាំ​ខុស​ឡើយ បើ​មិនមាន​បទពិសោធន៍​ក្នុង​ការងារ​នោះ​ច្បាស់ ហើយ​មិនទាន់​ឃើញ​លទ្ធផល​។

ការ​ដឹកនាំ​ក្រុមហ៊ុន​អាច​និយាយថា​ខុស​ឬ​ត្រូវ គឺ​មើល​លទ្ធផល​ចុងក្រោយ បើ​គេ​ជា​មនុស្ស​បរាជ័យ នោះ​កា​ដឹកនាំ​របស់គេ​ប្រាកដជា​ខុស​។ ទម្លាប់​របស់ខ្ញុំ​ការដឹកនាំ​បែប​ក្មេងខ្ចី រៀប​ផែន​ការអោយ​ច្បាស់​អោយ​លឿន​អនុវត្ត​អោយ​លឿន ដើរ​មិន​ខ្លាច​ជាន់មីន ជោគជ័យ​មិន​រំភើប​បរាជ័យ​មិន​ស្ដាយ ព្រោះ​ដោយសារតែ​ខ្ញុំ បាន​ឆ្លង​ការហ្វឹកហាត់ និង​រៀនសូត្រ​ពី​ថៅកែ​ជនជាតិ​កូរ៉េ​ជាច្រើន​នាក់»៕​


Related posts