ផ្ដាំតកូន! ខួប​កំណើត​កូន​ស្រី​ច្បង, សាពូន មីដាដា​ ទម្លាយ​រឿង​ទទួល​បាន​លុយ​បន្តបន្ទាប់​ពី​សម្ដេច​ទាំង​ទ្វេ​ តែ​ត្រូវ​រលាយ​អស់​វិញ ដោយសារ​តែ…(មាន​វីដេអូ)​

គេនៅចាំបានថា តារាចម្រៀង សាពូន មីដាដា បានរៀបការបញ្ចប់ភាពនៅលីវជាមួយ អ្នកនាង សឿ សុធារ៉ា ​កាលពីថ្ងៃទី៩ ខែ៩ ឆ្នាំ២០០៩ ដោយគិតរហូតមកដល់ពេលនេះ មានរយៈពេលជាង១០ឆ្នាំហើយ។

ទោះយ៉ាងណា ពេលនេះ ពួកគេ បានលែ,ងលះគ្នាហើយ។ ចំណង​អាពាហ៍ពិពាហ៍​របស់ពួកគេ បន្សល់ទុកនូវកូនប្រុសស្រីចំនួន២នាក់ ទី១ឈ្មោះ សាពូន តារាភិមាន។ កូនទី២ ឈ្មោះ សាពូន ដារ៉ាបុរស។

ដោយឡែកនៅថ្ងៃទី២១ ខែមករា ឆ្នាំ២០២៣ ជាថ្ងៃខួបកំណើតកូនស្រីនោះ សាពូន មីដាដា បង្ហោះរូបថត និងវីដេអូ កូនស្រីកាន់នំខេក អមដោយសាររៀបរាប់ពីរឿងអតីតកាល ដែលទទួលបានលាភសំណាងជាលុយជាបន្តបន្ទាប់ពីសម្ដេច តែត្រូវបានរលាយទ្រព្យអស់ដោយសារការរកស៊ីខុសជំនាញនោះ។

សាពូន មីដាដា បានរៀបរាប់ដូច្នេះថា «កូនស្រី​មាសឪពុក សាពូន ដា​រ៉ា​ពិមាន គម្រប់​12 ឆ្នាំ​គត់ កូន​ជា​កូន ​ដែល​ប្រកបដោយ​កុសលធម៌​ក្រៃលែង​ណាស់ កាល​កូន​កើតមក​មន្ទីរ​ពេទ្យ​មិន​យកប្រាក់​ទេ ដល់​កូន​ចម្រើន​វ័យ​បាន​ជាង 3​ឆ្នាំ ពុក​ជួប​រឿង​យល់សប្ដិ​កំពុងបើក​ភ្នែក​ទាំង​ថ្ងៃ គឺ​សម្តេច​តេ​ជោ​ពុក និង​សម្តេច​ម្តាយ ដ៏​ខ្ពង់​ខ្ពស់បំផុត call មកជា​( លេខ​Private number ) សួរសុខទុក្ខ ហើយក៏​ឲ្យ​គេ​យក​ប្រាក់​មក​ឲ្យ​3​ម៉ឺន $ គ្រា​កន្លងមក​

មួយអាទិត្យ​លោក​ទាំង​ទ្វេ​ក៏​call​មកលេង​រហូតៗ​ ហើយក៏​ឲ្យ​គេ​យក​ប្រាក់ មក​ឲ្យ​ទៀត​ជា​ហូរហែ រហូត​កូន​ចម្រើន​វ័យ​បាន​4 ឆ្នាំ សម្តេច​តេ​ជោ​ពុក​ និង​សម្តេច​ម្តាយ​លោក​បាន​ប្រោះ​ប្រទាន​មហា​កិត្តិយស​ដល់​ពុក​ម៉ែ ​និង​កូន​ឲ្យ​ទៅ​ជួប​លោក​ទាំង​ទ្វេ​នៅ​ភូមិគ្រឹះ​វិមានឯករាជ្យ កូន​ចេះ​ណាស់​គ្រាន់តែ​ឃើញ​ពុក​ម៉ែ​ក្រាប​ថ្វាយបង្គំ សម្តេច​តេ​ជោ​ពុក និង​សម្តេច​ម្តាយ​ភ្លាម កូន​ក៏​បត់ជើង​ថ្វាយបង្គំ​លោក​ទាំង​ទ្វេ​ភ្លាម​ដែរ

ពុក​ម៉ែ​មាន​កំពូល​កិត្តិយស ​និង​មហា​សំណាង​ក្រៃលែង​ណាស់ ដោយ​ទទួល​បានការ​សំណេះសំណាល និង​ខ្សែក​ដាំ​ពេជ្រ​ជិត​ប៉ុន​កូនដៃ ​ព្រមទាំង​ប្រាក់​ដុល្លារ​មួយ​វ៉ា​លី​ធំ ដែលជា​ការប្រទាន​រប​ស់ស​ម្តេច​ទាំង​ទ្វេ បី​អាទិត្យ​ក្រោយមក​ពុក​ម៉ែ​ឡើង​ច្រៀង​កម្មវិធី Bayon TV ច្រៀង​បទ​អក្ខរា​លោហិត លោក​ទាំង​ទ្វេ​ក៏​ប្រទាន​20 ម៉ឺន​$ ទៀត ​

វេលា​កន្លងមក ចូលឆ្នាំ​មហាសង្ក្រាន្ត​នៅ​សៀមរាប លោក​ទាំង​ទ្វេ​បាន​ប្រោះ​ប្រទាន​នូវ​វេលា​មហា​កិត្តិយស​ម្តងទៀត​ដោយ​ហៅ​ពុក​ម៉ែ​ទៅ​ហូបបាយ​នៅ​សណ្ឋាគារ Angkor city លោក​ទាំង​ទ្វេ បាន​ប្រទាន​ប្រាក់​ដុល្លា​រមួយ​កាបូប​ធំ​ទៀត​ដល់​ពុក​ម៉ែ។ ប្រាក់​ដ៏​ច្រើន​ក្រាស់ក្រែល​ទាំងនោះ ពុក​បាន​យកទៅ​ធ្វើ​ជំនួញ​ ដែល​មិនមែនជា​ជំនាញ និង​សេចក្តី​ធ្វេសប្រហែស​របស់​ពុក​ផង​នោះ​ ក៏​ខាតបង់​ជា​បន្តបន្ទាប់​រហូត​អស់ពី​ខ្លួន

ពុក​ពោល​រៀបរាប់​នេះ គឺ​ឲ្យ​កូន​ចូរ​គោរព​ស្មោះត្រង់​ចងចាំ​ជានិច្ច​តបស្នង​នូវ​មហា​គុណ​ ដែល​សម្តេច​តេ​ជោ​តា​ និង​សម្តេច​យាយ ផ្តល់​ឲ្យ​គ្រួសារ​យើង ហើយ​ក្នុង​ដំណើរ​ជីវិត​ចូរ​កូន​កុំ​ធ្វើ​ជំនួញ​អ្វីដែល​យើង​មិនចេះ និង​កុំ​ប្រហែល​ឲ្យ​សោះ ព្រះពុទ្ធ​អង្គ​មុន​បរិ​និព្វាន​បាន​ត្រាស់​ថា ម្នាល​ភិក្ខុ​ទាំងឡាយ​ចូរ​ញាំង​ជីវិត​នេះ​ឲ្យ​ប្រព្រឹត្ត​ទៅ​ដោយ​កុំ​ប្រហែល​ឡើយ»៕


Related posts