ប្រតិកម្មព្រាត! ជាប់​និទ្ទេស​Dពិតមែន តែ​តារា​សម្ដែង​​ អាង សុជាតា បាន​អាហារូបករណ៍​១០០%​ នៅ​សាលា​មួយ​នេះ ​សម្រាប់​ថ្នាក់​បរិញ្ញាបត្រ​ជំនាញ…​

អាង សុជាតា ជា​តារា​សម្ដែង​វ័យក្មេង​មួយរូប ដែល​មាន​ទេពកោសល្យ​ពី​ធម្មជាតិ រួម​នឹង​សម្រស់​ផូរផង់​ផង​នោះ ជាហេតុ​ធ្វើ​ឲ្យ​នាង​ដើរ​តាម​គន្លង​អ្នក​ម្តាយ សឿន ផា​ភួង បាន យ៉ាង​ងាយស្រួល ខណៈ​បច្ចុប្បន្ន មាន​ទីផ្សារ​ការងារ​រីក​ទូលាយ​មិន​ថា​ការ​សម្តែង​រឿង ឬ​ថត​ផ្សាយពាណិជ្ជកម្ម​នោះទេ។

ដោយឡែក​កាលពីថ្ងៃទី៥-៦ ខែធ្នូ ឆ្នាំ២០២២កន្លងទៅនេះ ជាថ្ងៃប្រឡង​សញ្ញាបត្រ​មធ្យមសិក្សា​ទុតិយភូមិ​ នោះ គេឃើញ​ តារា​ស្រីស្ថិតក្នុងវ័យ ១៧​ឆ្នាំ អាង សុជាតា បានបង្ហាញវត្តមានក្នុងការប្រឡងនោះផងដែរ។​

ក្រោយប្រឡងចប់, តារាស្រីវ័យក្មេងរូបនេះ បានផ្តល់កិច្ចសម្ភាសន៍ជាមួយសារព័ត៌មាន «ផ្ទះតារា» ដោយប្រាប់ថា ខ្លួនរៀនអត់សូវបានគ្រប់គ្រាន់ ដេកភ័យបុកពោះ តែ ពេលដល់មណ្ឌលប្រឡងមានអារម្មណ៍រាងបាត់ភ័យដែរ ហើយធ្វើបានរៀងច្រើនដែរ តែលទ្ធផលយ៉ាងណា នាងទទួលយកបាន។

​ក្រៅពីការផ្ដល់បទសម្ភាសន៍នេះ នៅលើបណ្ដាញសង្គមហ្វេសប៊ុកវិញ, តារាស្រីរូបនេះ បានបង្ហោះរូបថត១សន្លឹក បញ្ជាក់ពីការប្រឡងរបស់ខ្លួនបានបញ្ចប់រួចរាល់ ហើយទីបំផុតលទ្ធផលនៃការប្រឡងក៏ត្រូបានក្រសួងប្រកាសរួចហើយនៅថ្ងៃទី២២ ខែធ្នូ ឆ្នាំ២០២២នេះ។

តារាសម្ដែង អាង សុជាតា ជា​សិស្ស​សាលា​ប៊ែលធីអន្តរជាតិសាខាទី៨ ​ប្រឡង​ថ្នាក់​វិទ្យាសាស្ត្រសង្គម ទទួល​បាន​លទ្ធផល​​​មុខវិជ្ជា ភាសាខ្មែរ ​និទ្ទេស​D, គណិត​F, ផែនដីB, ភូមិB, ប្រវត្តិD, សីលធម៌C, ភាសាE សរុប​ជារួម បាន​ប្រឡងជាប់​និទ្ទេសD ដែល​ជា និទ្ទេស​ល្អបង្គួរ។

ទោះជាប់និទ្ទេសDពិតមែន តែ​តារា​ស្រី​វ័យក្មេង​រូបនេះ បានទទួល​អាហារូបករណ៍​១០០ភាគរយ​ពីសាលាមួយនេះថែមទៀតផង។ បង្ហោះភ្ជាប់ជាមួយរូបថតជាច្រើនសន្លឹកកាលពីពេលថ្មីៗនេះ សាកលវិទ្យាល័យ​IU បានបញ្ជាក់ថា «សាកលវិទ្យាល័យអន្តរជាតិ សូមស្វាគមន៍ កញ្ញា អាង សុជាតា ដែលមកទទួលយកអាហារូបករណ៍100% សម្រាប់សិក្សាលើថ្នាក់បរិញ្ញាបត្រជំនាញគ្រប់គ្រង នៅសាកលវិទ្យាល័យអន្តរជាតិ»។

តាមរយៈនេះ មានការលើកឡើង ប្រតិកម្មជាច្រើនថា «យុទ្ធសាស្រ្តទីផ្សារ, និទ្ទេសA 100% B 50 % C 30% D&E 20% តារា100%, ធ្វើបែបនេះវាល្អសម្រាប់មនុស្សម្នាក់ តែវាអាក្រក់មើលសម្រាប់មនុស្សទូទៅ។ វាបង្ហាញពីការបែងចែករវាងអ្នក​ធូរធារ អ្នកមានមុខមានមាត់ និងរវាងអ្នកក្រខ្សត់ អ្នកលំបាកតោកយ៉ាក ដែលគ្មានលទ្ធភាពសឹងតែបោះបង់ការសិក្សាម្តងៗ មកត្រូវបង់ថ្លៃសិក្សាពេញឬបញ្ចុះភាគរយខ្លះៗ ផ្ទុយពីគេអ្នកមានធូរធារទទួលបានការសិក្សាដោយ Free។ មិនបន្ទោសខាងសាលាដែលផ្តល់អាហារូបករណ៍ដល់នរណាទេ តែគួរពិចារណាមុននិងធ្វើអ្វីមួយពីផលវិជ្ជមាននិងអវិជ្ចមាន។ អរគុណ…!, តាមការគិតរបស់ខ្ញុំ អាហារូបករណ៍នេះប្រៀបដូចជាការជួយផ្សព្វផ្សាយឱ្យសាលាកាន់តែល្បីសុះសាយបន្ថែម និងលើកតម្កើងដល់សិល្បករឱ្យខំរៀនសូត្រផង»៕

Related posts