ភ្នំពេញ ៖ គិតមកទល់នឹងពេលនេះ នាយចយ និងភរិយាអ្នកនាងខ្វាន់ឌី បានរៀបការជាមួយគ្នាអស់រយៈពេលលើស៣ឆ្នាំមកហើយ ហើយទទួលបានចំណងដៃកូនប្រុជាទីស្រឡាញ់ម្នាក់១ទៀតផង។
មុនពេលរៀបការនោះ មានការរិះគន់ជាច្រើន មកលើពួកគេ ដោយភាគច្រើនលើកឡើងថា ចំណងស្នេហ៍មួយនេះ កើតឡើងដោយសារតែលុយ បើមិនមែនលុយ ក៏គេមិនយកនាយចយនោះដែរ។ តែអ្វីៗកាន់តែបង្ហាញច្បាស់ថា ចំណងស្នេហ៍មួយនេះ មិនមែនកើតឡើងដោយសារលុយនោះឡើយ ហើយក៏អាចស្រាយមន្ទិលរបស់អ្នករិះគន់ផងដែរ។
ភរិយានាយចយ នាងខ្វាន់ឌី ធ្លាប់លើកឡើងថា «មិនដែលស្រលាញ់អ្នកណាដោយសារឋានៈ ឬលុយកាក់ ប៉ុន្តែបើស្រលាញ់គឺស្រលាញ់ដោយសារទឹកចិត្តស្រលាញ់ ចេះមើលថែយកចិត្តទុកដាក់នឹងគ្នា និងព្រមទទួលយកចរិតពិតរបស់គ្នា លុយកាក់បើខ្វះខាតអាចជួយគ្នារកបាន សុំត្រឹមតែស្មោះត្រង់ទាំងនៅមុខ និងក្រោយខ្នងក៏គ្រប់គ្រាន់…….»។
ដោយឡែក ថ្មីៗនេះ ពួកគេទើបតែបង្ហាញក្ដីនឹករំលឹក ការបារម្ភ ចំពោះគ្នាប៉ុណ្ណោះ ខណៈនាយ ចយ ត្រូវចេញទៅខាងក្រៅដើម្បីបំពេញកិច្ចការងារនោះ។
គួរបញ្ជាក់ថា នាយ សែ ភិន ហៅ នាយចយ និង ភរិយា ប៉ិន ក្វាន់ឌី បានរៀបអាពាហ៍ពិពាហ៍ កាលពីថ្ងៃ ២៧ ខែកុម្ភៈ ឆ្នាំ២០១៨ នៅវិមានពិភពថ្មីសែនសុខ។ ពិធីរៀបមង្គលការនេះ ត្រូវបានរៀបចំយ៉ាងអាធិកអាធម អមដោយតារាកំប្លែងល្បីៗជាច្រើននាក់ ហើយជាពិសេស វត្តមានកូនប្រុសទាំងពីររបស់លោកនាយករដ្ឋមន្ត្រី ជាហេតុធ្វើឲ្យតារាកំប្លែងអភ័ព្វរូបសម្បត្តិ នាយ ចយ រំភើបទប់ទឹកភ្នែកមិនបាន ពេលនាយឈរក្បែរភរិយាលើកឆាក នាឱកាសថ្លែងទៅកាន់ភ្ញៀវកិត្តិយស។
រាត្រីនោះ មានសិល្បករ-ការិនីរួមអាជីពដូចជា នាយក្រឹម នាយព្រែក យាយ យ៉យ យាយ អឿន កាតុ នាយ ចាបចៀន ស្រីលាភ ប្រិមប្រិយ ពៅពៅ និងលោក អ៊ឹម ជីវ៉ា ព្រមទាំងភ្ញៀវកិត្តិយសយ៉ាងច្រើនកុះករ។
ក្រោយមក នាយ ចយ រួមនឹងភរិយាជាទីស្រឡាញ់ ក៏ទទួលបានសមាជិកថ្មី ជាកូនដំបូងរបស់ខ្លួនកាលពីថ្ងៃទី១៤ ខែកញ្ញា ឆ្នាំ២០១៩ ក្រោមការសាទរពីអ្នកសិល្បៈ និងអ្នកគាំទ្រជាច្រើនទៀត៕
