អ្នកគាំទ្រ ដែលកំពុងទស្សនាខ្សែភាពយន្តភាគខ្មែរប្រាកដជា បានស្គាល់ហើយ នូវរឿង «នគរមាស» ដែលចាក់ផ្សាយនៅលើស្ថានីយទូរទស្សន៍ក្នុងស្រុកមួយ ខណ:ដែលភាពយន្តនេះ ក៏ទទួលបានការគាំទ្រយ៉ាងខ្លាំងពីសំណាក់ទស្សនិកជនផងដែរ។
សន្ទុះនៃការគាំទ្រនេះ ដោយសារតែសាច់រឿង បានឆ្លុះបញ្ចាំងពីអតីតកាលក្នុងសម័យក្រុងលង្វែកជា ពិសេសគឺមានវត្តមានតារាសម្ដែងប្រុស-ស្រីល្បីៗ ជាច្រើនដួងចូលរួមសម្ដែងពិសេសគឺវត្តមានរបស់ព្រះនាងតូច នរោត្តម ជេនណា ផងដែរ។
ទន្ទឹមគ្នានោះ ក៏មានការទម្លាយពីម្ចាស់គណនីហ្វេសប៊ុកឈ្មោះភិក្ខុ ហុងចាន់សារ៉ុនដោយបានបង្ហោះ រូបភាពជាច្រើនសន្លឹកភ្ជាប់ជាមួយការរៀបរាប់ទម្លាយអត្តសញ្ញាណ និងជីវប្រវត្តិយ៉ាងកម្សត់របស់តួអង្គមួយក្នុងរឿង នគរមាស ពោលគឺជាក្មេងប្រុសម្នាក់ដែលសម្ដែងជាតួអង្គឯកឈ្មោះរាមកាលពីវ័យកុមារ ។
យោងតាមការទម្លាយប្រវត្តិកម្សត់និងការតស៊ូពីទឹកចិត្តស្រឡាញ់វិស័យសិល្បៈរបស់ក្មេងប្រុសអាយុ ១៣ឆ្នាំឈ្មោះ វី សុវណ្ណា ត្រូវបានប្រភពបញ្ជាក់ដូច្នេះថា «ជួបជាមួយតួអង្គឈ្មោះរាមសម្តែងក្នុងរឿង នគរមាសជារឿងឆ្លុះបញ្ចាំងពីអតីតកាលក្នុងសម័យក្រុងលង្វែក។
ប្រភពបន្ថែមទៀតថា កុមារា វី សុវណ្ណា អាយុ១៣ឆ្នាំ ជាកូនកំព្រាឪពុកមានទេពកោសល្យសម្តែងបានល្អ។ សព្វថ្ងៃរស់នៅភូមិវត្ត ឃុំខ្នាឆ្មារស្រុកសាមគ្គីមានជ័យ ខេត្តកំពង់ឆ្នាំង។ សូមជូនពរអោយកូនប្រុសវី សុវណ្ណា មានអនាគតល្អ បើបុណ្យកុសលកូនធ្វើមកពីមុនល្អកូននឹងចម្រើន៕
