តារាសម្តែង និងជាតារាចម្រៀង ដែលទស្សនិកជននិយមហៅតារាសក់សំពោង លោក វី ជីវ័ន្ត កាលពីពេលថ្មីៗកន្លងទៅនេះ បានធ្វើឲ្យមហាជនចាប់អារម្មណ៍ម្ដងរួចមកហើយ ក្រោយពីលោកបានផ្លាស់ប្តូរស្ទីលថ្មី ដោយដាច់ចិត្តកាត់សក់សំពោងចោល បន្ទាប់ពីរក្សាបានជិត២០ឆ្នាំនោះ។
ដោយឡែក កាលពីថ្ងៃទី១៥ ខែសីហា ឆ្នាំ២០២១ម្សិលមិញនេះ លោក ជីវ័ន្ត បានធ្វើឲ្យអ្នកគាំទ្រមានការចាប់អារម្មណ៍ម្ដងទៀត ក្រោយពីគេប្រទះឃើញទំព័រហ្វេសប៊ុកមួយចំនួន បានបង្ហោះរូបថតជាច្រើនសន្លឹករបស់លោកជីវ័ន្ត និងគូដណ្ដឹង ក្នុងឈុតប្រពៃណីនោះ។ ចំណែក នៅលើគណនីហ្វេសប៊ុក ពួកគេទាំង២ ក៏មានការបង្ហោះសារអបអរសាទរជាច្រើន ពីសំណាក់មិត្តភក្ដិ ផងដែរ។
លោក វី ជីវ័ន្ត បានភ្ជាប់ពាក្យ ជាមួយគូដណ្តឹងឈ្មោះ ខួចវណ្ណឌី ដែលមានស្រុកកំណើតនៅខេត្តតាកែវ ក្រោយពីពួកគេទាំង២នាក់ បានស្វែងយល់ចិត្តគ្នាអស់រយៈពេល៨ខែមកនោះ។ ចំពោះពិធីមង្គលការរបស់ពួកគេ អាចនឹងរៀបចំធ្វើនៅឆ្នាំ២០២៣ឯណោះ ព្រោះពួកគេរំពឹងថា ពេលនោះ កូវីដនឹងស្ងប់។
គួរបញ្ជាក់ថា ក្នុងបទសម្ភាសន៍ជាមួយគេហទំព័រក្នុងស្រុកដ៏ល្បីមួយ នាពេលកន្លងមក ជុំវិញការកាត់សក់សំពោងរបស់លោក ដែលរក្សាទុករយៈពេលជិត២០ចោលនោះ លោក បានបញ្ជាក់ពីមូលហេតុថា ដោយសារចង់ផ្លាស់ប្តូរស្ទីលសក់ថ្មី ដើម្បីឲ្យមហាជន និងអ្នកគាំទ្រចាប់អារម្មណ៍។ ម្យ៉ាងដោយសារបញ្ហាជំងឺរាតត្បាតកូវីដ-១៩ ផងនោះ ទើបជំរុញឲ្យលោកសម្រេចចិត្តកាត់សក់ចោលតែម្តង។
ដោយឡែកនៅក្នុងបទសម្ភាសន៍មួយទៀត ជាមួយអ្នកសារព័ត៌មានក្នុងស្រុក ក្រោយពេលលោកភ្ជាប់ពាក្យជាមួយគូដណ្ដឹងដ៏ស្រស់ស្អាតរួចមកនោះ លោក បានបញ្ជាក់ថា ការប្ដូរមកម៉ូដសក់សំពោងមកខ្លូ ធម្មតានោះដើម្បីថ្ងៃពិសេសរបស់លោកតម្រូវតាមឪពុកម្ដាយ ដែលចង់ បាន៕
