ភ្នំពេញ ៖ នៅព្រឹកមិញនេះមានការភ្ញាក់ផ្អើលក្រោយបែកធ្លាយវីដេអូ និងរូបភាពបង្ហាញឲ្យឃើញពីសត្វតោ ហ៊ីម៉ា ដែលរួចចេញពីក្នុងផ្ទះដើរតាមផ្លូវនៅម្តុំបឹងកេងកង។ ប៉ុន្តែភ្លាមៗនេះម្ចាស់ក៏បានចេញមកសុំទោសផងដែរ។
តួយ៉ាងបន្ទាប់ពីកើតមានរឿងរ៉ាវភ្ញាក់ផ្អើលគេឃើញបុរសជាជនជាតិចិនដែលជាម្ចាស់តោ ហ៊ីម៉ាបានចេញមុខបកស្រាយ និងសុំទោសមហាជនជាសាធារណ:ផងដែរ ដែលបណ្តោយឲ្យ ហ៊ីម៉ា ចេញមកក្រៅផ្ទះ។
យោងតាមទំព័រហ្វេសប៊ុកម្ចាស់តោ ហ៊ីម៉ាបានរៀបរាប់ថា ថ្ងៃនេះដោយសារតែពេលយកសំរាមទៅចោលតោវាតាមចេញទៅ ហើយតាមចូលមកវិញ បង្កឲ្យមានរឿងនេះកើតឡើងសុំទោសផងដែលបង្ករឿងនេះដល់អ្នកទាំងអស់គ្នា។
ម្ចាស់សត្វតោរូបនេះនិយាយទៀតថា ខ្ញុំក៏កំពុងឲ្យគេធ្វើរបងហើយ ហើយថ្ងៃក្រោយខ្ញុំនឹងបង្កើនការមើលវាមិនឲ្យចេញទៅក្រៅទៀតនោះទេ។ សូមអភ័យទោសផង។ សូមបញ្ជាក់ដែរថា សត្វតោមួយក្បាលដែលជនជាតិចិន យកធ្វើជាសត្វចិញ្ចឹម បានរួចចេញពីផ្ទះវីឡារ។
សត្វតោឈ្មោះ ហ៊ីម៉ា ត្រូវបានពលរដ្ឋប្រទះឃើញដើរនៅតាមផ្លូវលេខ៣០៦ ម្តុំបឹងកេងកងមិនឆ្ងាយប៉ុន្មានពីផ្ទះរបស់ម្ចាស់វានោះទេ។ មើលតាមរូបភាពបង្ហោះនៅលើប្រព័ន្ធបណ្តាញសង្គមTwitter បានបង្ហាញថា សត្វតោរបស់ជនជាតិចិននោះ ត្រូវបានម្ចាស់ចាប់យកចូលទៅក្នុងផ្ទះវីឡារនៅបឹង កេងកង វិញហើយ បន្ទាប់ពីរួចចេញមកក្រៅ៕
