វីរៈ និច្ច មុននឹងក្លាយជាតារាចម្រៀងមានឈ្មោះបោះសំឡេងរហូតមកដល់បច្ចុប្បន្ននេះ រូបនាងក៏ធ្លាប់សម្ដែងក្នុងបទចម្រៀងផងដែរ ដូចជាបទ ជម្រើសទី២ របស់លោកឆាយ វីរៈយុទ្ធ ដែលជាហេតុធ្វើឲ្យគេស្គាល់នាងកាន់តែច្រើន នាពេលនោះ។
ក្រោយមកពេលនាង មានឱកាសចេញបទចម្រៀងជាបន្តបន្ទាប់ រួមនឹងទឹកដើមសំឡេងរបស់នាងពីរោះផងនោះ កាន់តែធ្វើឲ្យកេរ្តិ៍ឈ្មោះរបស់នាងល្បីល្បាញ ដោយពេលចេញបទម្ដងៗ តែងតែមានចំនួនអ្នកទស្សនាច្រើន។
អ្វីដែលកាន់តែពិសេស, តារាតារាចម្រៀងវីរៈនិច្ច ក្រៅពីមានសំឡេងពីរោះ និងទទួលបានការពេញចិត្តពេញថ្លើមពីទស្សនិកជនហើយនោះ នាងនៅមានចំណុចមួយទៀត គឺរូបសម្រស់នេះតែម្តង។
ទោះជាមានសម្រស់ស្អាតបែបនេះក៏ដោយ ក៏កន្លងមក គេមិនធ្លាប់លេចឮថា រូបនាង មានសម្ព័ន្ធភាពស្នេហារួមបុរសរូបណានោះទេ។ តែកាលពីថ្ងៃទី៤ ខែសីហា ឆ្នាំ២០២១កន្លងទៅ តារាស្រីរូបនេះ បានធ្វើឲ្យអ្នកគាំទ្រភ្ញាក់ផ្អើល ខណៈទទួលដំណឹងថា នាង ភ្ជាប់ពាក្យជាមួយបុរសសង្ហាម្នាក់យ៉ាងស្ងាត់ៗនោះ។
ក្រោយភ្ជាប់ពាក្យបានប៉ុន្មានថ្ងៃរួចមក នៅថ្ងៃទី១៣ ខែសីហា ឆ្នាំ២០២១នេះ ស្រាប់តែតារាចម្រៀងស្រីជាទីពេញនិយមពីសំណាក់យុវវ័យរូបនេះ បានធ្វើការត្អូញត្អែរនូវរឿងមួយនេះថា «លែងមានរូបម្នាក់ឯងហើយ មានតែ couple pictures ទេឥលូវ ម្នាក់ហ្នឹងចូលគ្រប់ប៉ុស»។
ដោយឃើញ វីរៈ និច្ច បង្ហោះរូបថតជាមួយគូដណ្ដឹងដ៏ផ្អែមល្ហែម ជាមួយសារដ៏ចាក់ដោតខាងលើនេះ អ្នកគាំទ្រ ក៏បានបញ្ចេញយោបល់ម្នាក់មួយម៉ាត់ថា «គេមានគូហើយ, សមគ្នាខ្លាំងណាស់អាយដល, ពិតជាសមគ្នាណាស់បងនិច, ហេតុតែគូ គេរកដល់ឃើញ។ សំខាន់ចៃដន្យសាហាវ, ចង់មាន Couple pictures ដែរ, អ្នកថត ស្អាត»៕
