ដំណឹងដ៏ក្តៅគគុកមួយនេះ ត្រូវបានទម្លាយចេញនៅថ្ងៃទី ០២ ខែមីនា ឆ្នាំ២០២២ ដែលក្នុងអត្ថបទចុះផ្សាយបានលាតត្រដាងថា អ្នកដែលទទួលបានប្រាក់ធានារ៉ាប់រងជាកញ្ចប់ធំពី Tangmo Nida បន្ទាប់ពីការស្លាប់របស់នាង គឺជានាងតូច Easter ជាកូនស្រីធម៌របស់ Tangmo ដែលជាកូនស្រីបង្កើតរបស់ Gratick ជាអ្នកចាត់ការផ្ទាល់ខ្លួន ព្រោះមុនពេលមានរឿងអាក្រក់មកលើនាង Tangmo មានការធានារ៉ាប់រងជាកញ្ចប់ដែលមានតម្លៃ ១ លានបាត ដោយមានឈ្មោះអ្នកទទួលផលសំខាន់គឺជា Easter។
យោងតាមប្រភពចេញពី Thairath បានឱ្យដឹងថា អ្នកស្រី Panida បានទៅកាន់ប៉ុស្តិ៍ប៉ូលិស ដើម្បីធ្វើនីតិវិធីមួយចំនួន និង និយាយជាមួយអ្នកសារព័ត៌មានអំពីប្រាក់ធានារ៉ាប់រងនេះដែរ។ ក្នុងនោះ អ្នកស្រីថា នៅពេលនេះមិនទាន់អាចឆ្លើយថា អ្នកណានឹងទទួលផលនោះទេ។ ដោយអ្នកស្រីបានបញ្ជាក់ត្រង់ថា មកទល់ពេលនេះ Tangmo មិនទាន់មានឯកសារស្នើសុំកូនចិញ្ចឹមស្របច្បាប់នៅឡើយទេ។
ក្រោយបានទទួលព័ត៌មានអំពីការធានារ៉ាប់រងរបស់កូនស្រីរបស់គាត់ភ្លាម ម្ដាយ Tangmo បានរៀបចំដើម្បីពិគ្រោះជាមួយមេធាវីអំពីបញ្ហានៃការដកអ្នកទទួលផលពីការធានារ៉ាប់រង ដែលមានតម្លៃ ១ លានបាតនេះចេញ។ អាចនិយាយបានថា នេះជាទង្វើបង្ហាញឱ្យឃើញពីភាពហួសចិត្តរបស់ម្ដាយតារាស្រីរូបនេះ មុនពេលមានព័ត៌មានអំពីកូនស្រីគាត់ ទាក់ទងនឹង Gratick ដែលជាអ្នកចាត់ការផ្ទាល់ គួរឱ្យសង្ស័យ។
ជាមួយគ្នានោះដែរ អ្នកស្រី Panida បានបន្ថែមថា នៅពេលដែល Tangmo នៅមានជីវិត ប្រសិនបើនាងចង់ទិញរបស់ថ្លៃៗឱ្យ Easter នោះ គឺនាងនឹងពិគ្រោះជាមួយម្ដាយនាង។ យ៉ាងណាក៏ដោយ ម្ដាយរបស់នាង មិនបានដឹងអ្វីទាំងអស់ពីកញ្ចប់ធានារ៉ាប់រងដែល Tangmo បានទិញនោះទេ គឺអាចថាតារាស្រីរូបនេះ បានចុះហត្ថលេខាលើឯកសារពាក់ព័ន្ធខ្លួនឯង៕
