បើក្រឡេកទៅមើលប្រមាណជាង ១១ ឆ្នាំ មុន ផលិតកម្ម Spark Music គឺជាផលិតកម្មពេញនិយមមួយមានការគាំទ្រខ្លាំងពីសំណាក់មហាជន ដោយក្នុងនោះមានតារាចម្រៀងល្បីៗជាច្រើន ក៏បានស្ថិតនៅក្នុងទ្រនំនោះដូចគ្នាដែរ ដូចជា អ្នកនាង សុគន្ធ និសា អ្នកនាង យក់ ឋិតរដ្ឋា លោក ឃុំ ប៉ុណ្ណាដែត លោក ហេង ពិទូ អ្នកនាង ហង្ស សុជាតា លោក សាន រ័ត្នបញ្ញាស័ក្ត អ្នកនាង វ៉ាឌី ភាលីង និង ក្រុម Coconut ជាដើម ។
ក្នុងនោះ ក្រោយពីផលិតកម្ម Spark Music បានបិទទ្វារ តារាចម្រៀងប្រុសស្រីជាច្រើន ក៏បានបន្តលើអាជីពសិល្បៈដូចដើមរហូតមកដល់ពេលបច្ចុប្បន្ន លើកលែងតែតារាចម្រៀង វ៉ាឌី ភាលីង ម្ចាស់បទ «ចង់ស្នេហ៍ឮតុកកែយំ» តែប៉ុណ្ណោះ ដែលអ្នកនាងបានបញ្ចប់អាជីពសិល្បៈប្រមាណជា ៦ ឆ្នាំហើយ បើគិតមកទល់ពេលនេះ ។
សូមរំលឹកថា ក្រោយពីផលិតកម្ម Spark Musix បានបិទ ភ្លាមៗនោះ អ្នកនាង វ៉ាឌី ភាលីង បានបន្តអាជីពក្លាយជាតារាចម្រៀងក្នុងផលិតកម្ម Diamond និង សាងកេរ្តិ៍ឈ្មោះល្បីខ្លាំងលើវិថីសិល្បៈ តែក្រោយមកមិនបានប៉ុន្មានអ្នកនាងក៏បានចាកចេញពីអាជីពជាតារាចម្រៀង ដោយសម្រេចចិត្តចូលរោងការ សាងគ្រួសារយ៉ាងមានសុភមង្គល ។
ជាក់ស្តែង បច្ចុប្បន្ន អតីតតារាចម្រៀង វ៉ាឌី ភាលីង បានធ្វើឱ្យមហាជនអ្នកគាំទ្រ ជាពិសេសអ្នកលេងបណ្តាញសង្គមហ្វេសប៊ុកជារឿយៗ បានបើកភ្នែកធំៗ សម្លឹងមើលពីជីវិតរស់នៅឯកជន យ៉ាងស៊ីវីល័យរបស់អ្នកនាង ពោលគឺអ្នកនាង វ៉ាឌី ភាលីង កំពុងរស់នៅលើទ្រព្យស្តុក ក្នុងផ្ទះវីឡាដ៏ធំសម្បើម និង ឡានទំនើបជាច្រើនគ្រឿង ដែលក្នុងនោះមានទាំងឡាន Rolls-Royce ទៀតផង៕
