ម្ចាស់ និងអ្នកបើកទូកល្បឿនលឿន ដែលដឹកតារាស្រី Nida “Tangmo” Patcharaveerapong បណ្ដាលឲ្យស្លា.ប់នៅទន្លេ Chao Phraya ក្នុងទីក្រុងបាងកក កាលពីថ្ងៃព្រហស្បតិ៍ ត្រូវបានចោទប្រកាន់ពីបទធ្វេសប្រហែស និងប្រតិបត្តិការទូកគ្មានការអនុញ្ញាត។
លោក Pol Lt Col Uthen Hongthong ដែលជាប្រធានសួរចម្លើយនៅស្ថានីយប៉ូលីស Muang ក្នុងខេត្ត Nonthaburi បាននិយាយកាលពីថ្ងៃអាទិត្យថា ប៉ូលីសកាលពីយប់ថ្ងៃសៅរ៍ បានធ្វើការចោទប្រកាន់ជាផ្លូវការលើ Tanupat “Por” Lerttaweewit ដែលជាម្ចាស់ទូកល្បឿនលឿន និង Phaiboon “Robert” Trikanjananun ដែលជាអ្នកបើកបរទូក ដែលNida បានធ្លាក់ស្លាប់កាលពីថ្ងៃព្រហស្បតិ៍។
បុរសទាំងពីរនាក់ ដែលត្រូវបានតុលាការខេត្តNonthaburi ចេញដីកាចាប់ខ្លួននោះ ត្រូវបានចោទប្រកាន់ចំនួនពីរបទល្មើស គឺទី១ បើកកប៉ាល់គ្មានច្បាប់អនុញ្ញាត និងទី២ ចោទប្រកាន់ធ្ងន់ធ្ងរជាងនេះពីបទធ្វេសប្រហែសបណ្ដាលឲ្យមនុស្សស្លាប់។
យោងតាមការផ្សាយរបស់បាងកកប៉ុស្ដិ៍, រហូតមកដល់ពេលនេះ ប៉ូលីសបានសាកសួរមនុស្សយ៉ាងតិចប្រាំបីនាក់ ដែលក្នុងនោះមាន៥ នាក់នៅលើទូក, ម្ចាស់ឃ្លាំងទូកពីរ និងមនុស្សម្នាក់ទៀតដែលមិនបញ្ចេញឈ្មោះ។
ម្ចាស់ទូក បានប្រាប់ក្រុមអ្នកយកព័ត៌មានកាលពីថ្ងៃសៅរ៍ថា ទោះបីជាគាត់ និងអ្នកផ្សេងទៀតមិនបានពាក់អាវជីវិតក៏ដោយ ប៉ុន្តែទូកនេះ មានឧបករណ៍សង្គ្រោះក្នុងករណីមានអាសន្ន។
លោក Tanupat បាននិយាយថា លោកស្រី Wisapat នៅខាងក្រោយទូក នៅពេលដែល Tangmo បានធ្លាក់ចូលទៅក្នុងទន្លេ។
តារាស្រីរូបនេះ ត្រូវបានគេរាយការណ៍ថាបានទៅក្រោយទូកដើម្បីបន្ធូរអារម្មណ៍ខ្លួនឯង។
នាង Wisapat បាននិយាយថា នាងកំពុងមើលទូរស័ព្ទដៃរបស់នាង ខណៈដែល Tangmo កាន់ជើងរបស់នាងនៅខាងក្រោយទូក មុនពេលរអិលចូលទៅក្នុងទន្លេ។
កញ្ញា Idsarin អ្នកគ្រប់គ្រង Tangmo បាននិយាយថា នាងកំពុងសម្លឹងមើលទៅមាត់ទន្លេ នៅពេលដែលគ្រោះថ្នាក់បានកើតឡើង ហើយនាងមិនចង់ពាក់អាវជីវិតទេ ខណៈដែលនាងថតរូបក្នុងឈុតសម្លៀកបំពាក់របស់នាង។
ជុំវិញរឿងនេះ មហាជន ក៏ដូចម្ដាយរបស់ Tangmoផ្ទាល់ ជឿថា ការស្លាប់របស់កូនខ្លួន មិនមែនជារឿងឧប្បត្តិហេតុនោះទេ ហើយគេកំពុងដាក់ការសង្ស័យខ្លាំងទៅលើសម្ដីរបស់អ្នកចាត់ការរបស់នាង និងនារីឈ្មោះ Sand ដែលបានរួមដំណើរនៅលើទូកជាមួយ ដែលបានប្រាប់មហាជនថា Tangmo បានទៅបត់ជើងតូចនៅចុងទូក រួចក៏ធ្លាក់ចូលទៅក្នុងទឹក។
ជាមួយគ្នានេះ ក៏មានមេធាវីថៃល្បីម្នាក់ ចេញមុខមកទម្លាយអារម្មណ៍ពិត និងមានការបារម្ភផងដែរថា ការសម្ភាសន៍របស់សាក្សី ដែលនៅលើទូក មើលទៅមិនមានប្រយោជន៍ដល់រឿងក្តីរបស់ Tangmo ឡើយ ព្រោះមិនបាននិយាយទាក់ទងជាមួយនឹងអ្នកបើកទូក ដែលជាអ្នកត្រូវបានតុលាការចេញដីការចាប់ខ្លួន ហើយអាចនឹងត្រូវតុលាការលើកលែងឱ្យទៀត ដោយសារតែគ្មានការសង្ស័យគ្រប់គ្រាន់។
លោកបន្តទៀតថា ក្នុងក្តីនេះ ជនសង្ស័យជាអ្នកមានឋានៈ មានមុខមាត់ មានអ្នកប្រឹក្សា ដែលជាមេធាវីមានបទពិសោធន៍ខ្ពស់ ដូច្នេះ ខាងប៉ូលិសត្រូវធ្វើការឱ្យពេញទី បើមិនមិនអ៊ីចឹងទេ Tangmo ប្រាកដជាស្លាប់ដោយអយុត្តិធម៌ជាក់ជាមិនខាន៕
