កាលពីថ្ងៃទី២៤ ខែកុម្ភៈ ឆ្នាំ២០២២កន្លងទៅនេះ, យុវជនខ្មែរម្នាក់ បានចែករំលែកចំណេះដឹងខ្លះៗពាក់ព័ន្ធនឹងវិបត្តិអ៊ុយក្រែន នាពេលបច្ចុប្បន្ន នៅលើគណនីហ្វេសប៊ុករបស់ខ្លួនឈ្មោះ «Veasna Chea» ដោយទទួលបានការចាប់អារម្មណ៍ជាខ្លាំង។
បង្ហោះភ្ជាប់ជាមួយរូបភាព និងផែនទីជាច្រើនសន្លឹក យុវជនខាងលើ បានរៀបរាប់ដូច្នេះថា «ខ្ញុំ វាសនា សូមចែករំលែកចំណេះដឹងបន្តិចបន្តួចដល់បងប្អូន ដែលមានបំណងចង់ដឹងអំពីបញ្ហាវិបត្តិអ៊ុយក្រែននាពេលបច្ចុប្បន្ន។ ជាដំបូងដើម្បីយល់ដឹងពីបញ្ហាភាពតានតឹងរវាងរុស្ស៊ី និងលោក ខាងលិច លើបញ្ហាអ៊ុយក្រែន យើងគប្បីយល់ដឹងពីប្រវត្តិសង្ខេបនៃវិបត្តិ និងបញ្ហាក្រោយខ្នងនៃវិបត្តិនេះសិន។
វិបត្តិអ៊ុយក្រែន (ភាគ០១) បញ្ហាវិបត្តិនៅប្រទេសអ៊ុយក្រែនចាប់ផ្តើមពីការតវ៉ានៅរដ្ឋធានីគៀវ (Kiev) ប្រទេសអ៊ុយក្រែននៅខែវិច្ឆិកា ឆ្នាំ២០១៣ ប្រឆាំងនឹងអតីតប្រធានាធិបតីរបស់ខ្លួន លោក Victor Yanukovych ដែលសម្រេចចិត្តលុបចោលការចុះកិច្ចព្រមព្រៀងសមាហរណកម្មសេដ្ឋកិច្ចជាមួយសហគមន៍អឺរ៉ុប ដោយសារលោកទទួលរងការគាបសង្កត់ពីវិមានគ្រីមឡាំង ក្រោមបញ្ជារបស់លោកប្រធានធាបតីរុស្ស៊ី វ្លាដេមៀ ពូទីន (Vlademir Putin) ហើយលោកក៏ជាមនុស្សស្និទ្ធនឹងលោកពូទីនផងដែរ។
ការតវ៉ានេះ បានរីករាលដាលកាន់តែខ្លាំងឡើង និងបង្កឱ្យមានការបង្ក្រាបយ៉ាងខ្លាំងពីកម្លាំងសន្តិសុខអ៊ុយក្រែនមកលើហ្វូងប៉ាតុករ និងបានអូសបន្លាយមកដល់ខែកុម្ភៈ ឆ្នាំ២០១៤ បង្កឱ្យមានការតវ៉ាកាន់តែច្រើនឡើងក្នុងទ្រង់ទ្រាយធំ និងបានធ្វើឱ្យលោក Victor Yanukovych រត់ភៀសខ្លួនចេញពីអ៊ុយក្រែនទៅជ្រកកោននៅរុស្ស៊ី ក្រោមការធានាសន្តិសុខពីរុស្ស៊ី។
នៅខែមីនា ឆ្នាំ២០១៤ កងទ័ពរុស្ស៊ីបានលើកទ័ពចូលកាន់កាប់ឧបទ្វីបគ្រីមៀ (Crimea) ដោយសម្អាងលេសថាជាសិទ្ធិក្នុងការការពារប្រជាពលរដ្ឋដើមកំណើតរុស្ស៊ីរបស់ខ្លួន (R2P-Rights to Protect) ដែលរស់នៅតំបន់នោះពីការធ្វើទុក្ខបុកម្នេញណាមួយពីអ៊ុយក្រែន។
ក្រោយពីបានកាន់កាប់តំបន់គ្រីមៀរួចមក ប្រជាជននៅក្នុងតំបន់នេះដែលភាគច្រើនជាពលរដ្ឋរុស្ស៊ី និងនិយាយភាសារុស្ស៊ីបានប្រកាសផ្តាច់ខ្លួនពីអ៊ុយក្រែន និងដោយមានការគាំទ្រពីរុស្ស៊ីក៏បានរៀបចំការធ្វើប្រជាមតិ(Referendum)របស់ប្រជាជននៅគ្រីមៀ ដើម្បីចូលជាផ្នែកមួយនៃដែនដីរុស្ស៊ី ដោយជាលទ្ធផលប្រជាជនភាគច្រើនបានគាំទ្រការចូលជាផ្នែកមួយនៃដែនដីរុស្ស៊ី។
វិបត្តិនេះនៅតែបន្តកើនឡើង និងរីកសាយភាយ ថ្វីបើតំបន់គ្រីមៀបានក្លាយជាផ្នែកមួយនៃដែនដីរុស្ស៊ីក៏ដោយ ដោយ ០២ខែក្រោយមក ក៏បានរីករាលដាលទៅដល់តំបន់ Donetsk និង Luhansk ដែលតំបន់ទាំងពីរនេះនៅក្នុតំបន់ Donbass ភាគខាងកើតរបស់ប្រទេសអ៊ុយក្រែន និងដោយមានការគាំទ្រពីរុស្ស៊ីទៅលើក្រុមបំបែកខ្លួននៅតំបន់ទាំងពីរក៏បង្កឱ្យមានការប្រយុទ្ធគ្នារវាងកងទ័ពអ៊ុយក្រែន និងក្រុមបំបែកខ្លួននៅតំបន់ទាំងពីរដែលគាំទ្រដោយរុស្ស៊ីហើយក្រុមទាំងនេះបានបន្តកាន់កាប់តំបន់ទាំងពីរ ដោយផ្តាច់ចេញពីអ៊ុយក្រែន និងប្រកាសឯករាជ្យពីអ៊ុយក្រែនជាសាធារណរដ្ឋ Donetsk និង Luhansk (Donbass Region) ជាពីរដាច់ដោយឡែក។
ជម្លោះនៅតំបន់ Donetsk និង Luhansk ឬវិបត្តិនៅអ៊ុយក្រែនបានបន្តរហូតមកដល់បច្ចុប្បន្នដែលកន្លងមកមានការប្រយុទ្ធគ្នារវាងកងទ័ពអ៊ុយក្រែន និងក្រុមផ្តាច់ខ្លួននៅតំបន់ Donetsk និង Luhansk ដែលគាំទ្រដោយរុស្ស៊ី។ មកដល់ពេលនេះ គិតចាប់ពីឆ្នាំ២០១៤មក ជម្លោះនៅប្រទេសអ៊ុយក្រែន បានសម្លាប់មនុស្សប្រមាណ ១៤,០០០ នាក់ រងរបួសរាប់សែននាក់ និងមនុស្សរាប់លាននាក់ត្រូវជម្លៀសខ្លួនពីលំនៅឋាន ព្រមទាំងបង្កឱ្យមានការខូចខាតហេដ្ឋារចនាសម្ព័ន្ធ និងប៉ះពាល់ដល់សេដ្ឋកិច្ចយ៉ាងខ្លាំង។ ជាការឆ្លើយតបទៅនឹងការចូលកាន់កាប់ និងកាត់តំបន់គ្រីមៀជាដែនដីរបស់រុស្ស៊ី និងការគាំទ្រក្រុមបំបែកខ្លួននៅតំបន់ Donetsk និង Luhank សហរដ្ឋអាមេរិក និងសហគមន៍អឺរ៉ុបបានដាក់ទណ្ឌកម្មជាច្រើនលើកទៅលើរុស្ស៊ី ប៉ុន្តែការដាក់ទណ្ឌកម្មនេះហាក់ដូចជាមិនបានធ្វើឱ្យប៉ះពាល់ដល់មេដឹកនាំ ឬមន្ត្រីធំៗរបស់រុស្ស៊ីឡើយ ប៉ុន្តែធ្វើឱ្យរូបិយវត្ថុរុស្ស៊ី Ruble ធ្លាក់ចុះ រួមទាំងសេដ្ឋកិច្ចជាតិធ្លាក់ចុះ និងប៉ះពាល់ដល់ជីវភាពរស់នៅប្រជាជនរុស្ស៊ី។
នៅខែកក្កដា ឆ្នាំ២០១៤ យន្តហោះមួយគ្រឿងរបស់ក្រុមហ៊ុនអាកាសចរម៉ាលេស៊ី (Malaysian Airlines) ហោះចេញពីទីក្រុងអាំងស្ទែរដាំ (រដ្ឋធានីរបស់ប្រទេសហូឡង់) ឆ្ពោះមកប្រទេសម៉ាលេស៊ី ត្រូវបានបាញ់ទម្លាក់នៅតំបន់ភាគខាងកើតអ៊ុយក្រែន ដែលគ្រប់គ្រងដោយក្រុមផ្តាច់ខ្លួននៅតំបន់ Luhanks និង Donetsk បណ្តាឱ្យមនុស្សទាំងអស់ ២៩៨នាក់ ស្លាប់បាត់បង់ជីវិត។
អ្នកស៊ើបអង្កេតមកពីប្រទេសហូឡង់បានបើកការស៊ើបអង្កេត និងបានសន្មត់ នៅថ្ងៃទី១៥ ខែតុលា ថាយន្តហោះនេះត្រូវបានបាញ់ទម្លាក់ដោយដោយគ្រាប់មីស៊ីល ផលិតដោយរុស្ស៊ី និងនៅឆ្នាំ២០១៦ បានសន្មត់ថាគ្រាប់មីស៊ីលនេះត្រូវបានផ្គត់ផ្គង់ដោយរុស្ស៊ី។ ចាប់តាំងពីឆ្នាំ២០១៥មក ប្រទេសបារាំង រុស្ស៊ី អាល្លឺម៉ង់ និងអ៊ុយក្រែនបានព្យាយាមដោះស្រាយវិបត្តិនេះ និងបញ្ចប់បទឈប់បាញ់ រហូតឈានដល់កិច្ចព្រមព្រៀងឈប់បាញ់ ដែលគេហៅថា Mink Accords II ដែលធ្វើឡើងនៅរដ្ឋធានី Mink ប្រទេសបេឡារុស ប៉ុន្តែកិច្ចព្រមព្រៀងនេះមិនទទួលបានជោគជ័យឡើយ ដោយបន្តបន្ទាប់មកមានការបាញ់ដាក់គ្នារវាងកងកម្លាំងអ៊ុយក្រែន និងក្រុមបំបែកខ្លួននៅតំបន់ Donbass។
នៅខែមីនា ឆ្នាំ២០១៨ សហរដ្ឋអាមេរិក ក្រោមរដ្ឋបាលលោក Donald Trump បានអនុម័តលក់សព្វាអាវុធប្រឆាំងរថក្រោះទៅឱ្យអ៊ុយក្រែន ជាលើកដំបូង។ នៅខែតុលា ឆ្នាំ២០១៨ អ៊ុយក្រែនបានចូលរួមជាមួយសហរដ្ឋអាមេរិក និងប្រទេស ០៧ផ្សេងទៀត ដែលជាសមាជិកអង្គការណាតូ ឬអូតង់ (NATO) ក្នុងលំហាត់សមយុទ្ធតាមដែនអាកាសនៅភាគខាងលិច ប្រទេសអ៊ុយក្រែន។ លំហាត់យោធាននេះធ្វើឡើងក្រោយរុស្ស៊ីធ្វើសមយុទ្ធយោធាធំបំផុតមិនធ្លាប់មានពីមុនមក ចាប់តាំងពីការដួលរំលំនៃសហភាពសូវៀត។
បញ្ហាជម្លោះនៅប្រទេសអ៊ុយក្រែនបានបង្កឱ្យប៉ះពាល់ដល់ទំនាក់ទំនងទ្វេភាគីរវាងសហរដ្ឋអាមេរិក រួមទាំងអឺរ៉ុប ជាមួយនឹងរុស្ស៊ី។ សូមជម្រាបដែរថា ពាក់ព័ន្ធនឹងតំបន់គ្រីមៀវិញ ដែលរុស្ស៊ីបានបញ្ចូលជាដែនដីរបស់ខ្លួន រុស្ស៊ីបានកសាងស្ពានមួយហៅថា ស្ពានគ្រីមៀ ឬហៅថាស្ពាន Kerch ដែលភ្ជាប់ពីដែនដីគោករបស់រុស្ស៊ីមកតំបន់គ្រីមៀ ដែលឆ្លងសមុទ្រ ឬច្រក Kerch មានប្រវែង ១៩គម និងជាស្ពានដំបូងដែលវែងជាងគេសម្រាប់ការសាងសង់របស់រុស្ស៊ី និងវែងជាគេនៅអឺរ៉ុប ហើយការសាងសង់នេះគឺអស់ទឹកប្រាក់ក្នុងទំហំប្រមាណ ២២៧ ពាន់លានរូបលរុស្ស៊ី ឬស្មើនឹង ២ ពាន់ ៦៩៦ លានដុល្លារសហរដ្ឋអាមេរិក និងត្រូវបានសម្ភោធដាក់ឱ្យប្រាស់នៅខែធ្នូ ឆ្នាំ២០១៩។
ចាប់តាំងពីរុស្ស៊ីបានកាន់កាប់ និងកាត់បញ្ចូលតំបន់គ្រីមៀ ជាដែនដីខ្លួនក៏ដូចជាគាំទ្រទៅដល់ក្រុមផ្តាច់ខ្លួននៅតំបន់ Donetsk និង Luhanks នៅភាគខាងកើតអ៊ុយក្រែនមក សហរដ្ឋអាមេរិគ ក៏ដូចជាអង្គការណាតូ និងសហគមន៍អឺរ៉ុបបានពង្រឹងទំនាក់ទំនងយ៉ាងខ្លាំងក្នុងលក្ខណៈផ្លូវការ និងមិនផ្លូវការ ថ្វីបើអ៊ុយក្រែនមិនមែនជាសមាជិកអង្គការណាតូ ឬសហភាពអឺរ៉ុបក៏ដោយ។
ជំនួយផ្នែកហិរញ្ញវត្តុ និងយោធាជាច្រើនបន្តហូរចូលអ៊ុយក្រែន រួមទាំងការលក់សព្វាវុធ ដែលនេះបានបង្កឱ្យលោកប្រធានាធិបតីរុស្ស៊ី វ្លាដេមៀ ពូទីន មានការខឹងសម្បារយ៉ាងខ្លាំង ដោយចោទសហរដ្ឋអាមេរិក និងអង្គការណាតូថាមានបំណងពង្រីកឥទ្ធិពលមកកាន់តំបន់អឺរ៉ុបខាងកើត ការឡោមព័ទ្ធប្រទេសរុស្ស៊ីទាំងសេដ្ឋកិច្ច យោធា និងការទូត ព្រមទាំងមានបំណងបញ្ចូលប្រទេសអ៊ុយក្រែនជាសមាជិកអង្គការណាតូ និងសហភាពអឺរ៉ុប (European Union) ។
លោក ពូទីន ប្រឆាំងដាច់ខាតនៅផែនការរបស់ណាតូ ក្នុងការពង្រីកឥទ្ធិពលមកតំបន់អឺរ៉ុបខាងកើត ជាពិសេសនៅប្រទេសអ៊ុយក្រែន ដែលមានព្រំដែនជាប់រុស្ស៊ី និងជាតំបន់យុទ្ធសាស្ត្រភូមិសាស្ត្រនយោបាយ ដ៏សំខាន់បំផុតរបស់រុស្ស៊ី ដែលរុស្ស៊ីមិនអាចឈរមើល ឬលើកលែងឱ្យផែនការនេះសម្រេចបានឡើយ។ អ៊ុយក្រែនជាដែនដីភូមិសាស្ត្រនយោបាយដ៏សំខាន់សម្រាប់រុស្ស៊ី ដូចគ្នានឹងប្រទេសហ្សុកហ្ស៊ី ( Georgia) ដែរ។ ជាក់ស្តែង នៅឆ្នាំ២០០៨ រុស្ស៊ីក្រោមការដឹកនាំពីលោក Dmitry Medvedev ដែលជាប្រធានាធិបតិ និងលោកពូទីន ជានាយករដ្ឋមន្ត្រីបានឈ្លានពាន និងបង្កសង្គ្រាមជាមួយហ្សុកហ្ស៊ី ក្រោយប្រទេសនេះ មានបំណងចូលជាសមាជិកអង្គការណាតូ និងសហគមន៍អឺរ៉ុប។
ភាពតានតឹងសាជាថ្មីនៃវិបត្តិអ៊ុយក្រែន, វិបត្តិនៅអ៊ុយក្រែនចាប់ផ្តើមមានភាពតានតឹងឡើងវិញនៅខែតុលា ឆ្នាំ២០២១ នៅពេលកងទ័ពរុស្ស៊ីត្រូប្រមាណជាង១០០,០០០ នាក់ ត្រូវបានដាក់ពង្រាយនៅតាមព្រំដែនជាប់ប្រទេសអ៊ុយក្រែន នៅបីផ្នែក ឡោមព័ទ្ធអ៊ុយក្រែន។ មកដល់ពេលនេះ យោងតាមរបាយការណ៍ចារកម្មរបស់សហរដ្ឋអាមេរិក កងទ័ពរុស្ស៊ីប្រមាណ ១៩០,000នាក់ ត្រូវបានពង្រាយនៅជុំវិញអ៊ុយក្រែន តាមបណ្តោយព្រំដែនរុស្ស៊ី និងបេឡារុស ជាមួយអ៊ុយក្រែន។ តើលោក វ្លាដេមៀ ពូទីន ចង់បាអ្វីទើបបានពង្រាយទ័ពជាង ១០ម៉ឺននាក់ នៅតាមព្រំដែនជាប់អ៊ុយក្រែន?
នៅខែធ្នូ ឆ្នាំ២០២១ រុស្ស៊ីធ្វើសេចក្តីព្រាងសន្ធិសញ្ញាចំនួនពីរ ដែលបានចែងអំពីសំណើឱ្យសហរដ្ឋអាមេរិក ក៏ដូចជាអង្គការណាតូធ្វើការយល់ព្រមជាលាយលក្ខអក្សរដែលមានការចងក្នុងក្របខណ្ឌគតិយុត្តិ លើការធានាសន្តិសុខមកលើខ្លួន ដូចមានខាងក្រោម៖
១. ធានាថាប្រទេសអ៊ុយក្រែននឹងមិនចូលជាសមាជិកអង្គការណាតូ និងសហភាពអឺរ៉ុប ២. ស្នើដកអាវុធនុយក្លេអ៊ែរចេញពីអឺរ៉ុប និងកាត់បន្ថយកងទ័ពណាតូចេញពីតំបន់អឺរ៉ុបខាងកើត ៣. ធានាថាអង្គការណាតូនឹងឈប់ពង្រីកឥទ្ធិពលរបស់ខ្លួននៅតំបន់អឺរ៉ុបខាងកើត។
ជាការឆ្លើយតប ប្រធានាធិបតីសហរដ្ឋអាមេរិក លោក ចូ បៃដិន ( Joe Biden) ឆ្លើយតបបដិសេដលើសំណើខាងលើ ព្រោះសំណើខាងលើមិនអាចទៅរួច និងជាសំណើក្នុងន័យមិនឱ្យណាតូ និងសហរដ្ឋអាមេរិកឯកភាពបាន ព្រោះរុស្ស៊ីមានបំណងឈ្លានពានអ៊ុយក្រែនស្រាប់ ហើយបើណាតូយល់ព្រមនឹងសំណើនេះ ក៏រុស្ស៊ីនឹងពង្រីកឥទ្ធិពលខ្លួនឡើងវិញនៅតំបន់អឺរ៉ុបដែរ ហើយលោកបានអះអាងថាអ៊ុយក្រែនជារដ្ឋអធិបតេយ្យ និងមានសិទ្ធលើការចូលរួម ប៉ុន្តែលោកគូសបញ្ជាក់ថាការចូលជាសមាជិកភាពរបស់អ៊ុយក្រែនក្នុងអង្គការណាតូនឹងមិនធ្វើឡើងនាពេលភ្លាមៗនាពេលខាងមុខឡើយ។ វិបត្តិនេះនៅតែងបន្តភាពតានតឹងដោយកន្លងមកភាគីរុស្ស៊ី ដែលមានរដ្ឋមន្ត្រីការបរទេស លោក Sergei Larov បន្តពិភាក្សាទ្វេភាគីជាមួយសមភាគី លោក Anthony Blinken រដ្ឋមន្ត្រីការបរទេសសហរដ្ឋអាមេរិក លោកស្រី Liz Truss រដ្ឋមន្ត្រីការបរទេសអង់គ្លេស ជំនួបរវាងលោក Vlademir Putin ជាមួយប្រធានាធិបតីបារាំង លោក Emmauel Macron និងអធិការបតីអាល្លឺម៉ង់ទើបឡើងកាន់តំណែង លោក Olaf Scholz ប៉ុន្តែមិនទទួលបានលទ្ធផលផ្នែកតាមមធ្យោបាយពិភាក្សាការទូតឡើយ។
ហេតុអ្វីលោក ពូទីន ប្រឆាំងដាច់ខាតទៅលើសមាជិកភាពរបស់អ៊ុយក្រែននៅក្នុងអង្គការណាតូ ឬសហភាពអឺរ៉ុប?
មានកត្តាពីរយ៉ាង៖ ជាដំបូង រុស្ស៊ីមិនខ្លាចផែនការផ្តួលរំលំរដ្ឋាភិបាលរបស់ខ្លួន ការឈ្លានពានរុស្ស៊ី និងការទម្លាក់រូបលោកពីសំណាក់សហរដ្ឋអាមេរិក និងលោកខាងលិចឡើយ តែរុស្ស៊ីខ្លាចអ៊ុយក្រែនក្លាយជាប្រទេសប្រជាធិបតេយ្យពេញលេញដូចលោកខាងលិច នៅពេលប្រទេសនេះចូលជាសមាជិកណាតូ ឬសហភាពអឺរ៉ុប ព្រមទាំងចំណងជិតស្និទ្ធជាមួយលោកខាងលិច ពីព្រោះនៅពេលអ៊ុយក្រែនមានការរីកចម្រើនផ្នែកសេដ្ឋកិច្ច យោធា ការទូតជិតស្និទ្ធជាមួយលោកខាងលិច នោះនឹងធ្វើឱ្យមានអស្ថិរភាព និងជះឥទ្ធិពលដល់ប្រជាជនរុស្ស៊ីនៅក្នុងប្រទេសខ្លួន នៅពេលឃើញអ៊ុយក្រែនមានការរីកចម្រើន ហើយនឹងទាមទារអោយរុស្ស៊ីធ្វើប្រជាធិតេយ្យ កំណែទម្រង់សេដ្ឋកិច្ចដូចលោកខាងលិច និងប្រឆាំងរបបផ្តាច់ការលើលោកពូទីន ដែលនេះនឹងនាំឱ្យមានអស្ថិរភាពកាន់តែខ្លាំងនៅរុស្ស៊ីនាពេលអនាគត និងអាចធ្វើឱ្យប៉ះពាល់ដល់ការដឹកនាំរបស់លោកពូទីនប្រសិនបើរឿងនេះកើតឡើង។
កត្តាទីពីរគឺពូទីនមានការឈឺចាប់ និងគុំគួន នឹងប្រទេសលោកខាងលិច មានអង្គការណាតូជាដើមដែលនៅតែបន្តពង្រីកឥទ្ធិពលរបស់ខ្លួនមកតំបន់អឺរ៉ុបខាងកើត ជាពិសេសគឺមានបំណងបញ្ចូលអ៊ុយក្រែនជាសមាជិកភាព ដែលនេះជាបញ្ហាលោកពូទីន បានបញ្ជាក់ថាមិនអាចទទួលយកបាន និងថាអ៊ុយក្រែន និងលោកខាងលិចបានឆ្លងចូលបន្ទាត់ក្រហមរបស់ខ្លួន ដែលធ្វើឱ្យប៉ះពាលយ៉ាងធ្ងន់ធ្ងរលើសន្តិសុខខ្លួន។ ជាពិសេសទៅនោះ ដូចយើងដឹងស្រាប់ អង្គការណាតូត្រូវបានបង្កើតឡើងនៅឆ្នាំ១៩៤៩ ក្នុងគោលបំណងទប់ស្កាត់លទ្ធិកុម្មុយនីស្ត និងការពារប្រទេសនៅអឺរ៉ុបពីការធ្លាក់ចូលរបបកុម្មុយនីស្តដែលមានសហភាពសូវៀតជាអ្នកដឹកនាំ។
នៅឆ្នាំ១៩៩១ ក្រោយពីសហភាពសូវៀតបានដួលរំលំមក រដ្ឋអតីតចំណុះរដ្ឋរបស់សហភាពសូវៀត ១៥ បានប្រកាសឯករាជ្យចេញពីសហភាពសូវៀត រួមទាំងអ៊ុយក្រែនផងដែរ ហើយក្រោយមកដែនដីនៅសល់ក៏ប្រែក្លាយជាប្រទេសរុស្ស៊ី។ ក្រោយឆ្នាំ១៩៩១ សហរដ្ឋអាមេរិក ដែលមានប្រធានាធិបតីអាមេរិក លោក Bill Clinton និងណាតូ បានគូសបញ្ជាក់ធានាដល់រុស្ស៊ី ដែលពេលនោះលោក Boris Yelsin ជាប្រធានាធិបតីទីមួយរបស់រុស្ស៊ី ថាណាតូនឹងមិនពង្រីកសមាជិកភាពរបស់ខ្លួននៅអឺរ៉ុប ក៏ដូចជាប្រទេសអតីតក្រោមចំណុះសហភាពសូវៀតឡើយ។ ប៉ុន្តែណាតូ និងសហរដ្ឋអាមេរិកមិនបានគោរពតាមអ្វីដែលខ្លួនសន្យានោះឡើយ រួចចាប់តាំងពីពេលនោះមក ណាតូបានបញ្ចូលសមាជិកភាពប្រទេសជាច្រើននៅអឺរ៉ុប រួមទាំងប្រទេសនៅក្រោមអតីតសហភាពសូវៀត ដោយគិតមកដល់ពេលនេះសមាជិកណាតូមានចំនួន ៣០ ប្រទេស ដោយចុងក្រោយគឺប្រទេសសាធារណរដ្ឋម៉ាសេដូនីខាងជើង នៅឆ្នាំ២០២០។
សរុបមកគោលនយោបាយរបស់ណាតូបានផ្លាស់ប្តូរពីបង្កើតឡើងដើម្បីទប់ស្កាត់លទ្ធិកុម្មុយនីស្ត្ត មកជាហ៊ុមព័ទ្ធរុស្ស៊ីវិញ។ នៅឆ្នាំ១៩៩៩ លោក ពូទីន អតីតទីភ្នាក់ងារស៊ើបការសម្ងាត់របស់រុស្ស៊ី KGB ដែលធ្លាប់បានបំពេញការងារនៅអាល្លឺម៉ង់ខាងកើត បានឡើងកាន់តំណែងស្នងពីលោក Boris Yelsin ជាប្រធានាធិបតីរុស្ស៊ី។ លោកពូទីនបានប្រាកសថាលោកនឹងធ្វើឱ្យរុស្ស៊ីមានអំណាច និងមុខមាត់នៅលើឆាកអន្តរជាតិឡើងវិញ។
កត្តាទីបីគឺកត្តាភូមិសាស្ត្រនយោបាយ ដែលអ៊ុយក្រែនជាតំបន់ភូមិសាស្ត្រនយោបាយដ៏សំខាន់សម្រាប់រុស្ស៊ី ក៏ដូចជាសម្រាប់លោកខាងលិចក្នុងការហ៊ុំព័ទ្ធរុស្ស៊ីលើផ្នែក សេដ្ឋកិច្ច និងយោធា (ចំណុចនេះនឹងបកស្រាយបន្ថែមនៅ ភាគ២ នាពេលក្រោយ)។ រៀបរៀងដោយខ្ញុំបាទ៖ ជា វាសនា»៕
