បន្ទាប់ពីប្រកាសរំសាយមង្គលការ និងរង់ចាំអស់រយៈពេលជាង៣ឆ្នាំ តារាកំប្លែងCTNកញ្ញា នីឡា កូនស្រីអ្នកដឹកនាំកម្មវិធីសិល្បៈកម្សាន្ដដ៏ល្បី លោក សុវណ្ណ ឬទ្ធី ហៅតាវ៉ិចទ័រ បានទម្លាយដំណឹងថា នឹងចូលរោងការក្នុងខែមីនាខាងមុខនេះ ។
តាមគម្រោង នីឡា និងគូដណ្ដឹង ត្រូវចូលរោងការតាំងពីខែឧសភា ឆ្នាំ២០២០ មកម៉្លេះ ប៉ុន្តែដោយសារតែការរីករាលដាលនៃជំងឺកូវីដ-១៩ ទើបធ្វើឱ្យពួកគេត្រូវសម្រេចព្យាពេល និងបានប្រកាសរំសាយ ។ បើទោះជាយ៉ាងណានៅថ្មីៗនេះ វ៉ាន់ នីឡា បានបញ្ជាក់យ៉ាងច្បាស់ៗថា នឹងចូលរោងការនៅក្នុងខែមីនា ឆ្នាំ២០២២ខាងមុខនេះ បន្ទាប់ពីបានលើកពេលជិត៣ឆ្នាំ ។
នីឡា អតីតដៃគូចាស់នាយ ចឺម បានបញ្ជាក់ថា៖ «អ្នកណាជំពាក់ចំណងដៃ នីឡា ខ្លះចេញមុខមក លើក៣ឆ្នាំហើយ សុំប្រាកដខែក្រោយនេះហើយ» ។ ដូចគ្នាកន្លងមក តារាកំប្លែងដែលពោរពេញដោយសមត្ថភាព និងរូបសម្រស់រូបនេះធ្លាប់អះអាងប្រាប់ តារាញូស៍ម្ដងរួចមកហើយថា មង្គលការរបស់នាង និងគូដណ្ដឹងនឹងប្រារពធ្វើនៅកំឡុងខែ៣ ឆ្នាំ២០២២នេះ ។ ហើយដំណឹងចូលរោងការជាលើកទី២របស់កញ្ញា វ៉ាន់ នីឡា នេះ បានធ្វើឱ្យអ្នកគាំទ្រជាច្រើននៅលើបណ្ដាញសង្គម នាំគ្នាសាទរ និងជូនពរជាហូរហែ ។
ជាមួយគ្នានេះក៏មានអ្នកគាំទ្រមួយចំនួនបានបង្ហាញនូវក្ដីបារម្ភចំពោះ នីឡា អំពីស្ថានភាពបច្ចុប្បន្ននៃការរីករាលដាលនៃជំងឺកូវីដ១៩ ប្រភេទថ្មីអូមីក្រុង ដែលក្នុងថ្ងៃទី១៤ ខែកម្ភៈ ឆ្នាំ២០២២នេះ តួលេខឆ្លងដែលក្រសួងសុខាភិបាលបានចេញផ្សាយ មានចំនួនជាង៥០០នាក់ហើយ ។ យ៉ាងណាពាក់ព័ន្ធនឹងចំណុចនេះ តារាញូស៍ នៅមិនអាចសុំការបញ្ជាក់ពីកញ្ញា នីឡា បានឡើយ ដោយនាងថា កំពុងជាប់រវល់ត្រៀមថត ។
គួររំលឹកថា តារាកំប្លែងកញ្ញា វ៉ាន់ នីឡា កូនស្រីលោកតាវ៉ិចទ័រ ហៅ សុវណ្ណ រិទ្ធី បានប្រកាសរៀបអាពាហ៍ពិពាហ៍នាពេលកន្លងម្ដងរួចមកហើយ ប៉ុន្តែក៏ត្រូវពន្យារពេលវិញដោយគោរពតាមវិធានការសុខាភិបាលរបស់រាជរដ្ឋាភិបាលកម្ពុជា ។ បើទោះបីជា នីឡា និងគូដណ្ដឹងទើបតែស្រឡាញ់ និងស្វែងយល់ចិត្តគ្នាក្ដី តែនាងតែងតែបង្ហាញអារម្មណ៍ជារឿយៗ ដោយពោលសរសើរអនាគតស្វាមីរបស់ខ្លួន ដែលតែងតែបង្ហាញក្ដីព្រួយបារម្មណ៍ និងយកចិត្តទុកដាក់មើលថែ នីឡា គ្រប់ពេលវេលាតែម្ដង ៕
ប្រភពពីតារាញូស៍
