ក្រោយក្លាយជាម្ចាស់មកុដក្នុងកម្មវិធី បវរកញ្ញាយុវវ័យកម្ពុជា Miss Teen International Cambodia ២០២១ (MTIC) រួចមក កញ្ញា ឌី បញ្ញាវិមាលា កំពុងត្រៀមខ្លួនទៅប្រកួតនៅលើឆាកអន្តរជាតិ នាពេលខាងមុខនេះ ។
វិមាលា បានចាត់ទុកថា នេះជាកិត្តិយសដ៏ធំបំផុតដែលនាងបានក្លាយជាតំណាងឲ្យប្រទេសកម្ពុជា ក៏ដូចជាតំណាងឲ្យយុវតីកម្ពុជាជាលើកដំបូងក្នុងការចូលរួមប្រកួតកម្មវិធីថ្នាក់ជាតិ ទៅចូលរួមប្រកួតកម្មវិធីបវរកញ្ញាយុវវ័យអន្តរជាតិ Miss Teen International 2021 នាពេលខាងមុខនេះ។
វិមាលា ប្ដេជ្ញាយ៉ាងដូច្នេះថា ៖” នាងខ្ញុំនឹងនាំយកប្រទេសកម្ពុជា ទង់ជាតិរបស់កម្ពុជា វប្បធម៌ និងអរិយ្យធម៌ដ៏ស្រស់ផូរផង់របស់កម្ពុជាយើងទៅបង្ហាញនៅលើឆាកអន្តរជាតិ។ នាងខ្ញុំស្រឡាញ់ប្រទេសកម្ពុជា និងប្រជាជនកម្ពុជា” ។
សូមបញ្ជាក់ថា បវរកញ្ញាយុវវ័យកម្ពុជា MTIC២០២១ កញ្ញា ឌី បញ្ញាវិមាលា សព្វថ្ងៃជាសិស្សថ្នាក់ទី៩នៃសាលាប៊ែលធីអន្តរជាតិសាខាស្ទឹងមានជ័យ មានស្រុកកំណើតនៅខេត្តកំពង់ឆ្នាំង។ ក្រោយក្លាយជាម្ចាស់មកុដក្នុងកម្មវិធី បវរកញ្ញាយុវវ័យ MTIC ២០២១ រួចមក នាងត្រូវចេញទៅប្រកួតនៅលើឆាកអន្តរជាតិនៅឯប្រទេស ហ្វីលីពីន នាអំឡុងខែមេសាខាងមុខ។
នាងកំពុងត្រៀមលក្ខណៈទាំងការដើរម៉ូដ ភាសា និងចំណេះដឹងទូទៅផ្សេងទៀត ដើម្បីកសាងទំនុកចិត្ត និងភាពជឿជាក់លើខ្លួនឯង មិនឲ្យអ្នកគាំទ្រខកបំណងឡើយ។
គួរបញ្ជាក់ថា កម្មវិធីប្រឡងបវរកញ្ញាយុវវ័យកម្ពុជា Miss Teen International Cambodia ២០២១ (MTIC) គឺជាកម្មវិធីដំបូងគេបង្អស់នៅកម្ពុជា បានរកឃើញម្ចាស់មកុដដល់ទៅ២រូប ក្នុងចំណោមបេក្ខនារី២៤រូប ក្នុងនោះបេក្ខនារី ឌី បញ្ញាវិមាលា ក្លាយជាម្ចាស់មកុដ MTIC ២០២១ និងត្រៀមចេញទៅប្រកួតលើឆាកអន្តរជាតិ៕ ប្រភព ៖ តារាញូស៍
