គេនៅចាំបានថា នាយ សែ ភិន ហៅ នាយចយ និង ភរិយា ប៉ិន ក្វាន់ឌី បានរៀបអាពាហ៍ពិពាហ៍ កាលពីថ្ងៃ ២៧ ខែកុម្ភៈ ឆ្នាំ២០១៨ នៅវិមានពិភពថ្មីសែនសុខ។ ពិធីរៀបមង្គលការនេះ ត្រូវបានរៀបចំយ៉ាងអធិកអធម អមដោយតារាកំប្លែងល្បីៗជាច្រើននាក់។
ក្រោយរៀបការ នាយ ចយ រួមនឹងភរិយាជាទីស្រឡាញ់ ក៏ទទួលបានសមាជិកថ្មី ជាកូនដំបូងរបស់ពួកគេ ដោយកើត កាលពីថ្ងៃទី១៤ ខែកញ្ញា ឆ្នាំ២០១៩ ក្រោមការសាទរពីអ្នកសិល្បៈ និងអ្នកគាំទ្រជាច្រើនទៀត។
គិតមកទល់នឹងពេលនេះ នាយចយ និងភរិយាអ្នកនាងខ្វាន់ឌី បានរៀបការជាមួយគ្នាអស់រយៈពេលប្រមាណ៤ឆ្នាំមកហើយ ហើយកូនប្រុសរបស់ពួកគេ មានអាយុប្រមាណជាង២ឆ្នាំ។ ក្នុងរយៈពេលនេះ ពួកគេ បានចាប់ដៃគ្នារកស៊ី ហើយកាន់តែស្រឡាញ់គ្នាទ្វេដង ខុសពីមតិរិះគន់ដំបូងថា ភរិយានាយចយ ស្រឡាញ់នាយ ដោយសារតែលុយនោះ។
ទោះជាស្នេហាពួកគេនៅតែផ្អែមល្ហែមក៏ដោយ ក៏នៅយប់ថ្ងៃទី៩ ខែកុម្ភៈ ឆ្នាំ២០២២ ភរិយា នាយចយ បានបង្ហោះរូបថត២សន្លឹក និងសារដាស់តឿនស្វាមីរបស់ខ្លួនថា «ថើបប្តីមួយខ្សឺត រួចប្រាប់ប្តីថា : ចាំទុកណាប្តី ថ្ងៃដែលបងមានស្រី គឺជាថ្ងៃដែលបងបាត់បង់ប្រពន្ធកូន ក៏ដូចជាបើកឱកាសអោយប្រុសដទៃមកមើលថែប្រពន្ធកូនបងជំនួសបង
សាកស្រមៃមើលថាបើកូនបងទៅហៅប្រុសដទៃថា ប៉ា បងឈឺចាប់ទេ? សាកស្រមៃមើលថា បើប្រពន្ធបង ធ្លាប់គេងអោបរាល់ថ្ងៃ ទៅអោបប្រុសផ្សេងបងឈឺចាប់ទេ? ពេលប្រពន្ធធ្វើល្អ ស្រលាញ់បង បារម្ភបង បងមើលមិនឃើញ ចុះបើប្រពន្ធទៅធ្វើទង្វើទាំងអស់នេះជាមួយប្រុសផ្សេងបងស្តាយក្រោយទេ? ដូច្នេះ ! កុំក្បត់ចិត្តគេ បើមិនចង់អោយខ្លួនឯងឈឺចាប់លឺនៅប៊េប៊ី»។
តាមរយៈនេះ មានការលើកឡើងថា «អីយ៉ាស់ ពិតជាចាក់ទម្លុះបេះដូងបុរសមែន, ត្រូវហើយប្អូនស្រី, និយាយផ្អែមបែបគំរាម, caption នេះទោះអត់ប្រពន្ធក៏អាញ់ចុកដែរ, ដាច់ចង្កេះហើយចែ»។ ចំពោះCaptionខាងលើនេះ ភរិយានាយចយ បានយកពីគេ មកបង្ហោះបន្តដែរទេ តែទំនងត្រូវចិត្ត ទើបបង្ហោះរូបថតខ្លួនឯងជាមួយប្ដី ភ្ជាប់នឹងសារដូច្នោះតែម្ដង៕
