បើគិតមកដល់ពេលនេះអស់រយៈពេលប្រមាណជាង៨ខែមកហើយ ដែលតារាកំប្លែងល្បីឈ្មោះលោក ចែម ចាន់រ៉ា ហៅនាយ ពាក់មី បានរៀបចំសាងសង់ផ្ទះថ្មីជូនឪពុកម្ដាយក្មេក នៅភូមិកោះចម្រើន ឃុំកំពង់ភ្នំ ស្រុកលើកដែក ខេត្តកណ្ដាល។
ផ្ទះរចនាបថខ្មែរនេះ មានតម្លៃខ្ទង់ជិត១០ម៉ឺនដុល្លារ និងបានចាប់ផ្ដើមបុកគ្រឹះសាងសង់កាលពីកំឡុងខែមិថុនា ឆ្នាំ២០២១ ដោយយករចនាបថ ឬម៉ូតស្រដៀងគ្នានឹងផ្ទះឪពុកម្ដាយបង្កើតរបស់លោក នៅឯខេត្តស្វាយរៀងដែរ។
យ៉ាងណាបន្ទាប់ពីបានចំណាយពេលនៃការសាងសង់ជាង៨ខែ ម្សិលមិញនេះ នាយពាក់មី ក៏បានបង្ហាញនូវសមិទ្ធផលមួយចំនួន ដែលមើលទៅសម្រេចបានប្រមាណជា៨០ភាគរយហើយ ។
បើទោះជាយ៉ាងជាមួយគ្នានឹងរូបភាពជាច្រើនសន្លឹកនោះ នាយពាក់មី ក៏មិនបានបញ្ជាក់អ្វីច្រើនពាក់ព័ន្ធនឹងការសាងសង់ ឬបញ្ចប់ការសាងសង់នៅខែណានោះឡើយ តែបើតាមការសង្កេតជាក់ស្ដែងផ្ទះដ៏ប្រណិតមួយនេះអាចនឹងរួចរាល់នៅពេលឆាប់ៗខាងមុខនេះ ។ ដូចគ្នាមហាជនអ្នកនិយមប្រើប្រាស់បណ្ដាញសង្គមជាច្រើន ក៏បានសម្ដែងការសរសើរថា ផ្ទះថ្មីដែល នាយពាក់មី សាងសង់ជូនឪពុកម្ដាយក្មេកនេះពិតជាស្រស់ស្អាតខ្លាំង។
សូមរំលឹកថា សម្រាប់ការសាងសង់ផ្ទះថ្មីជូនឪពុកម្ដាយក្មេកនេះដែរ នាយពាក់មី ធ្លាប់បានបញ្ជាក់ថា លោកមានគម្រោងសាងសង់ជូនពួកគាត់យូរឆ្នាំណាស់មកហើយ ប៉ុន្តែគ្រាន់តែត្រូវរង់ចាំមានថវិកាគ្រប់គ្រាន់សិន ឥឡូវនេះទើបមានឱកាស ។
ប៉ុន្មានឆ្នាំកន្លងទៅ តារាកំប្លែងដែលមានប្រវត្តិជាកម្មករសំណង់ ភរិយាជាកម្មកររោងចក្រកាត់ដេររូបនេះ បានចំណាយថវិកាផ្ទាល់ខ្លួនប្រមាណ១៤ម៉ឺនដុល្លារសាងសង់ផ្ទះបែបបុរាណដ៏ស្កឹមស្កៃជូនឪពុកម្ដាយបង្កើតនៅស្រុកកំណើតផងដែរ ។ លោកត្រូវបានមហាជនពោលសរសើរថា ពិតជាកូនកត្តញ្ញូជាគម្រូល្អក្នុងសង្គម ដោយចេះនឹករលឹក និងសងគុណឪពុកម្ដាយវិញ។
ជាពិសេសក្រោយសាងភាពល្បីល្បាញ ក្រៅពីការតបស្នងសងគុណដល់ឪពុកម្ដាយ នាយ ពាក់មី ក៏បានបំពេញតួនាទីជាបងជួយជ្រុំជ្រែងប្អូនបង្កើតចំនួនពីរនាក់ គឺនាយគ្រឿន និងនាយក្រាន់ ឱ្យមានភាពល្បាញល្បីនៅលើវិស័យសិល្បៈ មានមុខមាត់នៅក្នុងសង្គម និងមានជីវភាពធូរធារដូចសព្វថ្ងៃ និងជ្រោមជ្រែងប្អូនផ្សេងៗទៀតដូចគ្នា៕ ប្រភព ៖ តារាញូស៍
