អ្នកគាំទ្រ និងអ្នកនិយមតាមដានរឿងរ៉ាវតារាស្រុកខ្មែរ កំពុងចាប់អារម្មណ៍ពីទំនាក់ទំនងរវាងតារាចម្រៀងនាយ ចឺម និងអ្នកមេម៉ាយកូន សេង សុខឃីម បន្ទាប់ពីបានឃើញសំណេរប្លែកៗត្រូវបានបង្ហោះលើគណនីហ្វេសប៊ុករបស់ភាគីខាងស្រីជាបន្តបន្ទាប់ នៅមួយរយៈចុងក្រោយនេះ។
ជាក់ស្ដែងម្សិលមិញនេះ អ្នកនាង សេង សុខឃីម បានសរសេររៀបរាប់ថា ៖ «ការណ៍ដែលខ្ញុំ ដកអ្នកណាចេញពីចិត្ត មកពីខ្ញុំព្យាយាមអស់លទ្ធភាពហើយ។ ខ្ញុំមិនដែលសោកស្ដាយនូវការសំរេចចិត្តរបស់ខ្លួនឯងទេ មិនមែនខ្ញុំមិនចេះឈឺចាប់ តែខ្ញុំជ្រើសរើស មិនឲ្យពិបាកចិត្តរាំរៃរាល់ថ្ងៃ ចំពោះអ្វីដែលមិនសមបំណងខ្ញុំ លើលោកនេះគ្មានអ្វីសមតាមបំណងទាំងអស់ទេ» ។
បន្ទាប់មកនាងបង្ហោះរូបថត១សន្លឹកជាមួយបុរសជាសង្សារ ដែលគេស្គាល់ថា ជាតារាចម្រៀងនាយ ចឺម ដោយក្នុងខ្លឹមសារថា ៖ «ពួកយើងធ្វើជាមិត្តនឹងគ្នាល្អស្រាប់ហើយហ្ន៎…មិនចាំបាច់បែកគ្នានាំឲ្យមានភាពឈឺចាប់នោះទេ» ។
ដោយឡែកនៅព្រឹកនេះ សង្សាររបស់នាយ ចឺម ក៏បានបញ្ចេញសារយ៉ាងវែងបន្ថែមទៀត នៅតែបង្ហាញពីការតាំងចិត្តរបស់នាងហាក់ដូចជាចង់ដកចិត្តពីនរណាម្នាក់ ។ ប៉ុន្តែមិនបានបញ្ចេញឈ្មោះនោះទេ។ សេង សុខឃីម បន្តរៀបរាប់ថា នាងដឹងត្រឹមថា បើនរណាស្រលាញ់នាងពិត នាងក៏ស្រលាញ់វិញដូចគ្នា មិនថាស្នេហា មិត្តភាព រឺអ្វីក៏ដោយ នៅពេលដែលនាងដឹងថា គេកាត់បន្ថយការស្រលាញ់ពីនាងហើយ អ្វីដែលនាងត្រូវធ្វើ គឺដូចគ្នានឹងអ្វីដែលគេធ្វើដាក់នាងដែរ។
«ខ្ញុំមិនចេះធ្វើអ្វីតែម្ខាងឲ្យខ្លួនឯងកាន់តែពិបាកនោះទេ ។ ព្រោះចិត្ត និងបេះដូងរបស់ខ្ញុំ គឺត្រូវឲ្យអ្នកដែលដូចគ្នានឹងខ្ញុំ នរណាផ្លាស់ប្ដូរ ខ្ញុំក៏ផ្លាស់ប្ដូរ នរណាស្មោះត្រង់ខ្ញុំក៏ស្មោះត្រង់ នរណាកាត់បន្ថយភាពល្អៗ ខ្ញុំកាត់បន្ថយដូចគ្នា តែបើអ្នកកាន់តែស្រលាញ់ខ្ញុំ កាន់តែស្មោះត្រង់នឹងខ្ញុំមិនថានៅមុខ រឺក្រោយខ្នង ខ្ញុំក៏តបស្នងនូវអ្វីគ្រប់បែបយ៉ាងឲ្យអស់ពីបេះដូង ហើយបរិសុទ្ធបំផុតចំពោះទំនាក់ទំនងមួយនោះ» ។
ការលើកឡើងរបស់សង្សារ នាយចឺម តាមរយៈសារថ្មីមួយនេះ ហាក់កាន់តែធ្វើឱ្យមហាជនអ្នកគាំទ្រផ្ទុះការចង់ដឹងការពិតកាន់តែខ្លាំងពីទំនាក់ទំនងស្នេហ៍របស់ពួកគេទាំងពីរ ។
បើទោះជាយ៉ាងណាពាក់ព័ន្ធនឹងមន្ទិលនៃសំណេរប្លែកៗរបស់អ្នកនាង សេង សុខឃីម ខាងលើនេះ នៅមិនទាន់មានប្រត្តិកម្មណាមួយពីភាគីខាងប្រុស គឺតារាចម្រៀងវ័យក្មេងរបស់ផលិតកម្មសាន់ដេលោក សុខ មេសា ហៅនាយចឺម ឡើយ។ មានការកត់សម្គាល់ឃើញថា នេះមិនមែនជារឿងថ្មីទេសម្រាប់តារាស្រីរូបនេះ កន្លងមកក៏ធ្លាប់បញ្ចេញសារអន់ចិត្តចំពោះគូស្នេហ៍ជារឿយៗផងដែរ ក្រោយមកក៏បង្ហាញភាពផ្អែមល្ហែមវិញ។
ដោយឡែក ថ្មីៗនេះអ្នកទាំងពីរត្រូវបានគេដឹងថា បានរួមគ្នាទិញផ្ទះវីឡាមួយកន្លែងនៅក្នុងរាជធានីភ្នំពេញ ។ ហើយការឈានដល់ទិញផ្ទះវីឡារួមគ្នានោះ បានធ្វើឱ្យមហាជនមានការចាប់អារម្មណ៍ជាខ្លាំង និងបានលើកឡើងថា ពួកគេធ្វើបែបនេះទំនងដើម្បីរឹតបន្តឹងចំណងស្នេហារបស់ពួកគេឱ្យមានភាពរឹងមាំយូរអង្វែង៕
