បើនិយាយពីឈ្មោះ អម្ពរ ទេវី, ចាន់ តារាទី, សុខ ស្រីមុំ, ហុក លក្ខិណា និង នារីរ័ត្ន គន្ធា ជឿជាក់ថា ប្រិយមិត្តនៅតែចងចាំមិនភ្លេចពីសម្រស់ស្រស់ស្អាតពីធម្មជាតិ និងទេពកោសល្យសម្ដែងដ៏ប៉ិនប្រសព្វដាច់ដោយឡែករបស់ពួកគេនាអំឡុងទសវត្ស៨០ និង៩០ ជាពេលវេលាដែលវិស័យភាពយន្តខ្មែរចាប់ផ្ដើមរស់ឡើងវិញ ។
ពេលនេះអតីតតារាស្រីល្បីឈ្មោះទាំងនោះ ម្នាក់ៗមានវ័យមិនក្រោម៥០ឆ្នាំនោះទេ ហើយខ្លះកំពុងរបស់នៅប្រទេសកម្ពុជា និងខ្លះទៀតមានសំណាងបានទៅរួមរស់ជាមួយគ្រួសារនៅបរទេស។ តទៅនេះតារាញូស៍ នឹងបើកកកាយស្ថានភាពរបស់អតីតតារាសម្ដែងដ៏កម្ររបស់កម្ពុជាទាំង៦រូបនេះដូចខាងក្រោម៖
១.អ្នកស្រី អម្ពរ ទេវី
បច្ចុប្បន្នអ្នកស្រី អម្ពរ ទេវី មានវ័យជាង ៥០ឆ្នាំហើយ កំពុងរស់នៅសហរដ្ឋអាមេរិក ដែលទើបតែក្លាយជាជីដូនរបស់ចៅកាលពីពេលថ្មីៗនេះ ក្រោយភរិយាកូនប្រុសរបស់អ្នកស្រី ដែលជាដំណក់ឈាមរបស់អតីតតារាសម្ដែង ពេជ្រ ភិរុណ សម្រាលបានកូនប្រុសម្នាក់កាលពីពេលថ្មីៗនេះ។ សព្វថ្ងៃអ្នកស្រី អម្ពរ ទេវី កំពុងរស់នៅយ៉ាងមានក្តីសុខជាមួយស្វាមី និងកូនប្រុសស្រីនៅសហរដ្ឋអាមេរិក ។ តែយ៉ាងណាអ្នកស្រីនៅតែស្រឡាញ់អាជីពសម្តែង ហើយមួយរយៈមុនអ្នកស្រីក៏បានត្រឡប់មកស្រុកខ្មែរ និងបានចូលរួមថតរឿងមួយចំនួនទៀតផង ។
២. អ្នកស្រី ចាន់ តារាទី
តារាស្រីជើងចាស់ពោរពេញដោយសមត្ថភាព អ្នកស្រី ចាន់ តារាទី ជាតារាសម្ដែងមួយរូប ដែលទទួលបានប្រជាប្រិយភាពខ្លាំង ដោយអ្នកស្រីបានឈានជើងចូលសិល្បៈអស់រយៈពេលជាច្រើនឆ្នាំមកហើយ ក៏តារាស្រីរូបនេះ នៅតែមានការគាំទ្រពីទស្សនិកជនគ្រប់មជ្ឈដ្ឋានដដែល ។ សព្វថ្ងៃអ្នកស្រីនៅតែបន្តប្រឡូកនៅក្នុងអាជីពសម្តែងហើយក្រៅពីនេះអ្នកស្រីក៏ងាកមកប្រកបរបរនៅតាមអនឡាញផងដែរ ។
៣.អ្នកស្រី សុខ ស្រីមុំ
មហាជនដែលធ្លាប់ទស្សនាវីដេអូកាលពីសម័យទស្សវត្សឆ្នាំ ៨០ជាងពិតជាបានស្គាល់ពីសមត្ថភាពសម្តែងរបស់អ្នកស្រី សុខ ស្រីមុំ ដែលមើលទៅញ៉ិកញ៉ក់គួរឱ្យក្នាញ់ ។ មកដល់ពេលនេះអ្នកស្រីនៅតែស្រស់ស្អាតហើយបើនិយាយពីការតែងខ្លួននៅតែទាន់សម័យ និងឡូយឆាយមិនធម្មតាបើទោះអ្នកស្រីមានវ័យជាង ៥០ប្លាយទៅហើយក្តី ។
បច្ចុប្បន្ននេះ អ្នកស្រី សុខ ស្រីមុំ រស់នៅសហរដ្ឋអាមេរិកហើយជារឿយៗអ្នកស្រី តែងបង្ហាញរូបភាពនៅតាមបណ្តាញសង្គមដល់អ្នកគាំទ្រនៅក្នុងស្រុក ដែលម្នាក់ៗនៅតែលាន់មាត់សរសើរពីសម្រស់របស់អ្នកស្រី។
៤.អ្នកស្រី នារីរ័ត្ន គន្ធា
អតីតតារាសម្តែង ដែលមានទម្រង់មុខមូលក្រឡង់ នារីរ័ត្ន គន្ធា កំពុងរស់នៅសហរដ្ឋអាមេរិក និងបានឃ្លាតឆ្ងាយក្រសែភ្នែកអ្នកគាំទ្រ។ ប៉ុន្តែអ្នកដែលធ្លាប់ជួបអ្នកស្រីនៅតែលើកឡើងថា នារីរ័ត្ន គន្ធា នៅតែមានសម្រស់ស្អាតគ្រាន់ និងឡើងគីឡូជាងពីមុន។ អ្នកស្រីត្រឡប់មកប្រទេសកម្ពុជាម្ដងម្កាល និងតែងតែស្ងាត់ស្ងៀមមិនសូវឲ្យនរណាបានដឹងនោះទេ និងប្រញ៉ាប់ប្រញាល់ត្រឡប់ទៅវិញ ព្រោះគ្មានអ្នកជួយមើលការខុសត្រូវមុខរបរនៅទីនោះ។
៥.អ្នកស្រី ហុក លក្ខិណា
អតីតតារាសម្តែង ហុក លក្ខិណា ជាតារាសម្តែងដែលមានឈ្មោះល្បីល្បាញនិងទទួលបានការគាំទ្រពីសំណាក់មហាជនកាលពីជាងសម័យនោះ ។ អ្នកស្រីក៏ជាតារាសម្តែងដែលមានសមត្ថភាពនិងសម្រស់ផូរផង់ជាពិសេសមន្តស្នេហ៍ថ្ពាល់ខួចរបស់អ្នកស្រី ។ អ្នកស្រី ហុក លក្ខិណា បានបញ្ចប់អាជីពសិល្បៈក្រោយមានស្វាមីនឹងបានចាកចេញទៅរស់នៅបរទេស តែថ្មីៗនេះក៏មានការបង្ហើបថាកូនរបស់អ្នកស្រីក៏មានបំណងវិលមកដើរតាមគន្លងមករបស់អ្នកម្តាយវិញដែរ។
៦. អ្នកស្រី ប៉ែន សុផានី
តារាសម្តែង ប៉ែន សុផានី ក៏បានចូលដល់វ័យ៥០ឆ្នាំហើយដែរ។ ប៉ុន្តែអ្នកស្រីបានបាត់មុខពីអាជីពសិល្បៈក្រោយពីបានភ្ជាប់ស្នេហ៍ជាមួយអ្នកមានមុខមាត់នៅក្នុងសង្គមម្នាក់ ហើយសព្វថ្ងៃក៏មានមុខងារជាលោកជំទាវផងដែរ ។ អ្វីដែលចាប់អារម្មណ៍ថ្មីៗនេះ ប៉ែន សុផានី បានបង្ហាញមុខកូនស្រីតូចម្នាក់ដោយបញ្ជាក់ថាជាកូនស្រីរបស់ខ្លួនដែលបានសម្រាលមួយរយៈកន្លងមក៕ ប្រភព ៖ តារាញូស៍
