បន្ទាប់ពីបានមកដល់មាតុភូតុភូមិកំណើតកាលពីថ្ងៃទី០៥ ខែកុម្ភៈ ឆ្នាំ២០២២នេះ ស្ត្រីខ្មែរ-អាមេរិក ដែលគ្រងមកុដ Mrs. California 2015 អ្នកនាង Jacqueline Bhagavan ត្រៀមនឹងបង្កើតការភ្ញាក់ផ្អើលមួយសម្រាប់ប្រជាជនកម្ពុជា នោះគឺកម្មវិធីប្រកួតសម្រស់ដំបូងមិនធ្លាប់មានក្នុងប្រទេសកម្ពុជា។
អ្នកនាង ត្រូវបានអញ្ជើញមកកម្ពុជា ដើម្បីសហការទាក់ទងនឹងកម្មវិធីថ្មីដែលលោក Oliva Kong ជាអ្នកដឹកនាំផ្ទាល់ ហើយក៏ជាកម្មវិធីប្រកួតសម្រស់ដំបូងមិនធ្លាប់មានក្នុងប្រទេសកម្ពុជា សម្រាប់ស្ត្រីដែលមានគ្រួសារហើយ (មានស្វាមី មានកូន) ។ ក្រៅពីនេះ អ្នកនាង Jacqueline Bhagavan ក៏ត្រូវបានលោក Oliva Kong ម្ចាស់កម្មវិធី «Mrs World Cambodia» ចាត់ឲ្យធ្វើជាតំណាងជាតិកម្ពុជាចេញទៅប្រកួតនៅប្រទេសមួយផ្សេងទៀតនៅអំឡុងខែធ្នូ ឆ្នាំ២០២២ ប៉ុន្ដែមុនចេញទៅប្រកួត នាងទស្សនកិច្ចផ្លូវការមួយនៅកម្ពុជាក្នុងខែកុម្ភៈនេះ។
សូមរំលឹកថា អ្នកនាង Jacqueline Bhagavan បានបង្ហើបពីប្រវត្ដិរបស់ខ្លួនត្រួសៗតាមរយៈសារព័ត៌មានអន្ដរជាតិមួយចំនួនដោយបញ្ជាក់ថា ខ្លួនមានស្រុកកំណើតនៅខេត្ដប៉ៃលិន ហើយបានភៀសខ្លួនទៅរស់នៅជំរំមួយក្នុងទឹកដីថៃ ហើយក៏បានបន្ដចេញទៅរស់នៅប្រទេសទី៣ គឺសហរដ្ឋអាមេរិក តាំងពីអាយុ៦ឆ្នាំ ។
បច្ចុប្បន្ននាងមានវ័យ៤៧ឆ្នាំ និងមានស្វាមីជាជនជាតិអាមេរិក មានកូនប្រុស-ស្រីចំនួន២នាក់ ។ ដោយភាពវៃឆ្លាត និងមានសមត្ថភាពខ្ពស់ខាងជំនាញមេផ្ទះ អ្នកនាង Jacqueline បានដាក់ប្រឡងក្នុងកម្មវិធីមួយឈ្មោះ «Mrs. California America» ក្នុងឆ្នាំ២០១៥ ។ អ្នកនាងក៏ទទួលបានជយលាភីលេខ១ក្នុងកម្មវិធីនោះ ក្នុងនាមជាស្ដ្រីដែលលេចធ្លោជាងគេទាំងសម្រស់ និងសមត្ថភាពជាស្ដ្រីមេផ្ទះ ។ ការណ៍នេះបានល្បីចេញពីវេទិកាប្រកួត ក្នុងរដ្ឋ California សហរដ្ឋអាមេរិក ដល់អតីតប្រធានាធិបតីសហរដ្ឋអាមេរិក គឺលោក Barak Obama ចង់ជួបដោយផ្ទាល់។
កាលណោះនាង ទទួលបានការស្វាគមន៍យ៉ាងកក់ក្ដៅពីលោកប្រធានាធិបតី ក្រោមក្រសែភ្នែកអ្នកគាំទ្រនាងជាច្រើនទៀតផង ។ ចំណែកឆ្នាំ២០២២នេះ ស្ដ្រីខ្មែរ-អាមេរិក ដ៏មានសមត្ថភាពរូបនេះ ត្រូវបានអ្នករៀបចំកម្មវិធី «Mrs Cambodia world» គឺលោក Oliva Kong អញ្ជើញនាងក្នុងនាមជាស្ដ្រីខ្មែរម្នាក់ចេញទៅប្រកួតក្នុងប្រទេសមួយផ្សេងទៀត ដើម្បីបង្ហាញពីបទពិសោធរស់នៅរបស់នាងទាំងនៅខ្មែរ និងសហរដ្ឋអាមេរិក។
ក្នុងដំណើរទស្សនៈកិច្ចរបស់ Jacqueline ចំនួន២លើកកន្លងទៅ ក៏បានចូលគាល់ព្រះមហាក្សត្រខ្មែរ និងហ្លូងម៉ែ ព្រមទាំងចុះជួបបងប្អូនខ្មែរតាមសហគមន៍ក្រីក្រមួយចំនួនដែរ ។ សម្រាប់ដំណើរទស្សនកិច្ចផ្លូវការលើកទី៣របស់អ្នកនាង គ្រោងនឹងចូលគាល់ព្រះមហាក្សត្រ និងហ្លូងម៉ែ ព្រមទាំងជួបពិភាក្សាការងារជាមួយតំណាងក្រសួងវប្បធម៌ និងវិចិត្រសិល្បៈ និងក្រសួងទេសចរណ៍ផងដែរ៕ ប្រភព ៖ តារាញូស៍
