ជារឿងមួយភ្ញាក់ផ្អើល និងសោកស្ដាយបំផុត ខណៈដែលយប់មិញនេះ តារាចម្រៀងរូបស្រស់របស់ផលិតកម្មសាន់ដេ ចេង ស្រីនិច្ច ហៅ វីរៈ និច្ច បានប្រកាសនូវរឿងរ៉ាវដ៏គួរឲ្យសោកស្ដាយមួយ ដែលនាង និងស្វាមី បានព្យាយាមលាក់បាំងរឿងនេះជិតមួយខែមកហើយ ។
រឿងរ៉ាវនោះពាក់ព័ន្ធនឹងកូនក្នុងផ្ទៃរបស់នាង ដែលកាលពីថ្មីៗនេះនរណាៗក៏ដឹងដែរថា នាង និងស្វាមីទទួលបានកូនភ្លោះពីរនាក់បន្ទាប់ពីរៀបការ ។ ប៉ុន្តែជាអកុសលកូនភ្លោះទាំងពីរ ដែលទើបតែចាប់កំណើតជាមួយនាងនោះ មិនបាននៅគង់វង្សក្នុងផ្ទៃរបស់នាងរហូតគ្រប់៩ខែ១០ថ្ងៃឡើយ ។ ពោលគឺ វីរៈ និច្ច បានអះអាងថា កូនរបស់នាងត្រូវបាត់បង់ទៅវិញ មិនបាននៅជាមួយនាងទៀតឡើយ ។
ដៃគូចម្រៀងដ៏សក្ដិសមរបស់ នាយចឺម រូបនេះបានបញ្ជាក់ថា បញ្ហានេះនាង និងស្វាមីបានព្យាយាមលាក់បាំងភ្នែកមហាជនអស់រយៈពេលជិតមួយខែហើយ ហើយការដែលលាក់បាំងនេះ គឺដោយសារតែនាងទទួលយកមិនទាន់បាន ។ បើទោះជាយ៉ាងណានាង និងស្វាមី ក៏សុំអភ័យទោសផង ។
វីរៈ និច្ច បាននិយាយថា៖ «រយៈពេលជិតមួយខែនេះបានលាក់បងប្អូន ហេតុផលគឺទទួលយកមិនទាន់បាន កូនក្នុងផ្ទៃរបស់ខ្ញុំ (ភ្លោះ) មិនបាននៅជាមួយខ្ញុំទៀតទេ មូលហេតុមានដោយចៃដន្យ។ កូនមិនលូតលាស់ ដូច្នេះបងប្អូនឈប់ឆ្ងល់ថា ហេតុអីបានខ្ញុំស្លៀកពាក់រឹបៗបាន ថ្ងៃទី 06/01/2022 ថ្ងៃដែលសោកស្តាយជាទីបំផុត» ។
គួររំលឹកថា តារាចម្រៀងសាន់ដេអ្នកនាង ចេង ស្រីនិច្ច ហៅ វីរៈ និច្ច និងស្វាមីលោក ខៀវ ពេជ្រ បានដឹកដៃគ្នារោងការកាលពីថ្ងៃទី១៦ ខែតុលា ឆ្នាំ២០២១កន្លងទៅ នៅភោជនីយដ្ឋានមួយក្នុងរាជធានីភ្នំពេញ ។ ក្រោយក្រាបផ្ទឹមមុខដូនតាពេញមុខមាត់ ស្រីនិច្ច និងស្វាមី ក៏ទទួលបានចំណងដៃជាទីគប្បចិត្ត នោះគឺកូនភ្លោះចំនួនពីរនាក់ ។
គ្រានោះ ស្រីនិច្ច និងស្វាមី មានក្ដីរំភើបរីករាយជាខ្លាំង ។ ប៉ុន្តែជាអកុសលកូនភ្លោះទាំងពីរដែលទើបតែចាប់កំណើតនោះ មិនបាននៅគង់វង្សរហូត៩ខែ១០ថ្ងៃឡើយ គឺត្រូវបាត់បង់ទៅវិញ ព្រោះតែកូនពុំមានការលូតលាស់ បើតាមបច្ចេកទេសពេទ្យមិនអាចទុកបានទេ៕
ប្រភពពីតារាញូស៍
