រាជធានីភ្នំពេញ៖ តារាចម្រៀងលោក អ៊ីណូ បានធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំង បន្ទាប់ពីលោកបានបង្ហោះរូបភាពជាច្រើនសន្លឹក និងសំណេរប្រាប់ទៅកាន់ទស្សនិកជនអំពីរឿងរ៉ាវដែលលោកកំពុងត្រៀមខ្លួនធ្វើជាឪពុកគេហើយ។
ម្ចាស់បទ “ម៉ោងបាយនឹកអូន” រូបនេះ ក៏បានសម្តែងពីអារម្មណ៍ត្រេកអរ នៅពេលខ្លួនអាចធ្វើជាឪពុកគេបានហើយ ដោយលទ្ធផលឆ្លុះអេកូបានបង្ហាញមុខកូនប្រុសរបស់លោកកាន់តែច្បាស់ និងមានការលួតលាស់យ៉ាងល្អនៅក្នុងផ្ទៃទៀតផង ធ្វើឲ្យរូបលោកជាឪពុកមានអារម្មណ៍កាន់តែរំភើប។ ទារកនេះមានអាយុកាលប្រហែលជាង៥ខែនៅក្នុងផ្ទៃម្ដាយ។
ជាមួយគ្នានោះដែរ លោក អ៊ីណូ ជាឪពុកបានដាក់ឈ្មោះអោយកូនប្រុសជាទីស្រឡាញ់ ដែលជាដំណក់ឈាមលើកដំបូងនេះថា ភាពវីណូតា ថាដា ( PHEAP VYNOTA THADA )។
សូមរំលឹកថា អ៊ីណូ និង ភរិយារូបស្រស់របស់លោក បានចាប់ដៃគ្នារៀបការស្ងាត់ៗកាលពីថ្ងៃទី ១៨ ខែកញ្ញា ឆ្នាំ ២០២១ កន្លងទៅ ធ្វើឱ្យមហាជនភ្ញាក់ផ្អើលផង ខ្លះក៏បានចូលរួមអបអរសាទរចំពោះលោកផង ដែលរកបាននារីច្បាស់លាស់ម្នាក់មករួមរស់ក្នុងជីវិតគូប្រកបដោយសុភមង្គល។
ស្របពេលកំពុងត្រៀមខ្លួនទទួលស្វាគមន៍សមាជិកថ្មី អ៊ីណូ ធ្វើឱ្យមហាជនជាច្រើនមើលឃើញថា ជីវិតរបស់តារាចម្រៀងប្រុសរូបនេះ ហាក់ជួបតែរឿងល្អផ្ទួនៗ មិនថាមុខជំនួញរកស៊ី ការងារសិល្បៈ និង ជីវិតស្នេហាទេ សុទ្ធតែរលូនទៅមុខ ហើយជាពិសេសពេលនេះ ភរិយាលោកថែមទាំងមានដំណឹងល្អដែលជាតំណក់ឈាមដំបូងជាកាដូឆ្នាំថ្មីដល់លោកថែមទៀត៕
ប្រភពពីតារាញូស៍
