ចាត់ទុកថា ជាមោទនភាពមួយសម្រាប់វិស័យភាពយន្តខ្មែរ ខណៈខ្សែភាពយន្ដបែបអប់រំរឿង “ដើម្បីកូន” របស់ផលិតករ ហ៊ុយ យ៉ាឡេង ត្រូវបានទទួលការចាប់អារម្មណ៍ពីសំណាក់បណ្ដាប្រទេសធំៗជាច្រើន ។ ក្នុងនោះសាកលវិទ្យាល័យមួយរបស់តៃវ៉ាន់ត្រៀមនាំយកភាពយន្តនេះទៅចាក់បញ្ជាំងឲ្យនិស្សិតរបស់គេបានទស្សនាផងដែរ។
តាមការបញ្ជាក់របស់ផលិតករ ហ៊ុយ យ៉ាឡេង មហាវិទ្យាល័យមួយឈ្មោះថា National Chengchi University (NCCU) របស់តៃវ៉ាន់បានចាប់អារម្មណ៍លើស្នាដៃនិពន្ធ «រឿងដើម្បីកូន» ដោយបានស្នើសុំសិទ្ធដើម្បីយកទៅចាក់បញ្ចាំងឱ្យនិស្សិតនៅទីនោះបានទស្សនា និងសិក្សាស្វែងយល់ពីភាពយន្ដជីវិតមួយនេះ ។
ដោយផលិតករដ៏ល្បីល្បាញរូបនេះបានឱ្យដឹងតាមរយៈសំណេរនៅលើបណ្ដាញសង្គមថា៖ «ដំណឹងដ៏សែនរីករាយរៀបនឹងបើកសាលា ក៏មានសាលាអន្តរជាតិផ្តល់តម្លៃដល់ភាពយន្តរបស់ខ្ញុំ ស្នើសុំភាពយន្ត រឿងដើម្បីកូន ចាក់ជូនសិស្ស ដើម្បីសិក្សាស្វែងយល់ពីភាពយន្តជីវិតមួយនេះ» ។
តាមរយៈសំណេរខាងលើនេះដែរ លោក ហ៊ុយ យ៉ាឡេង បានសម្ដែងនូវរំភើបរីករាយជាខ្លាំង ដ្បិតស្នាដៃរបស់លោកត្រូវបានផ្ដល់តម្លៃ និងយកទៅចាក់បញ្ចាំងនៅតៃវ៉ាន់ ។ការណ៍ត្រូវបានគេមើលឃើញថាស្របទៅនឹងបំណងរបស់ផលិតកររូបនេះហើយ ខណៈកន្លងមក លោកតែងបង្ហាញនូវចេតនាចង់ឃើញភាពយន្តស្នាដៃកូនខ្មែរត្រូវបានចាក់បញ្ចាំងលើឆាកអន្តរជាតិ។
គួររំលឹកថា «រឿងដើម្បីកូន» ជាខ្សែភាពយន្តស្ដីពីជីវិតពិតអ្នកធាក់ស៊ីក្លូ និងត្រូវបានផលិតឡើងយ៉ាងសម្រិតសម្រាំងពីផលិតករល្បីឈ្មោះលោក ហ៊ុយ យ៉ាឡេង ។ ខ្សែភាពយន្ដដ៏កម្សត់មួយនេះបានចាក់បញ្ចាំងនៅកម្ពុជាកាលពីអំឡុងខែមករា ឆ្នាំ២០២១ និងបានបង្ហាញវត្តមាននៅរោងភាពយន្តនៃបណ្ដាប្រទេសជាច្រើនទៀត ។
កន្លងមកលោក ហ៊ុយ យ៉ាឡេង ស្ថាបនិកនៃផលិតកម្ម «កថាជ័យ» ដែលជាអ្នកផលិតខ្សែភាពយន្តស្តែងពីជីវិតអ្នកធាក់ស៊ីក្លូ បានប្រាប់សារព័ត៌មានក្នុងស្រុកមួយថា នេះជាស្នាដៃទី ៤ ដែលលោកបានយកកុនទៅចាក់នៅក្រៅប្រទេស ដែលរឿងមុនៗជារឿងខ្មោច ប៉ុន្តែសម្រាប់រឿង «ដើម្បីកូន» លោកបានផលិតយខុសពីរឿងមុនៗ គឺបានដកស្រង់ចេញពីជីវិតពិតរបស់គ្រួសារអ្នកធាក់ស៊ីក្លូម្នាក់នៅម្តុំកែងផ្សារចាស់ ដែលបានតស៊ូក្នុងការចិញ្ចឹមកូន២នាក់ទាំងដែលខ្លួនជាជនពិការ (ពិការជើងម្ខាង) ហើយចុងក្រោយក៏ត្រូវលក់ទាំងស៊ីក្លូ និងឈាម ដើម្បីព្យាបាលជំងឺរបស់កូន។
ភាពយន្តនេះ មិនត្រឹមតែឆ្លុះបញ្ចាំងពីជីវិតពិតយ៉ាងកម្សត់នោះទេ ប៉ុន្តែក៏បានបង្កប់នូវអត្ថន័យអប់រំយ៉ាងល្អទៀតផង ដែលធ្វើអ្នកទស្សនាសម្រក់ទឹកភ្នែកតាមសាច់រឿង និងតួអង្គមិនខាន ៕
ប្រភពពីតារាញូស៍
ដេីម្បីកាន់តែជ្រាបច្បាស់សូមទស្សនារូបភាពខាងក្រោមទាំងអស់គ្នា៖
