កាលពីថ្ងៃទី២៥ ខែធ្នូ ឆ្នាំ២០២១ មហាជន មានការភ្ញាក់ផ្អើល និងតក់ស្លុតជាខ្លាំង ក្រោយទទួលដំណឹងថា តារាចម្រៀង នាងប្រាក់ សុគន្ធ ដែលខំតស៊ូមកប្រឡងចម្រៀងជាមួយប្អូនស្រី តាំងពីខេត្តទម្រាំមានឈ្មោះបោះសំឡេងបន្តិចបន្តួច មិនទាន់បានសុខស្រួលផង ក៏ត្រូវបាត់បង់ជីវិតទាំងវ័យក្មេងនោះ។
ជុំវិញរឿងនេះ បើយោងតាមគណនីហ្វេសប៊ុកឈ្មោះ ឈាម ត្រជាក់ បានបង្ហោះភ្ជាប់ជាមួយរូបភាព នាង ប្រាក់សុគន្ធ បែបនេះថា «បងប្អូនអ្នកជិះម៉ូតូយប់ៗជ្រៅមេត្តាប្រយ័ត្នប្រយែងឱ្យបានខ្ពស់ផងដាច់ខាតត្រូវពាក់មួកការពារឱ្យជាប់ពេលខ្លះយើងខំប្រុងប្រយ័ត្ន ហើយតែឡានមកបុកពីក្រោយជីវិតផុយស្រួយណាស់បុកហើយជួនបើករត់បាត់ទៀតបើទោះចាប់បានយ៉ាងច្រើនសងលុយបន្តិចបន្តូចប៉ុណ្ណោះ»។
ប្រភព បន្តថា «អ្នកបុករួចខ្លួនបាត់យើងស្លាប់ឥតប្រយោជន៍គ្រួសារទុក្ខប៉ុនភ្នំ យំស្ទើរបែកទ្រូងគ្រប់គ្នា។ សូមចូលរួមរំលែកទុក្ខគ្រួសារសពផងសូមឲ្យវិញ្ញាណក្ខន្ធប្អូនបានទៅទីស្ងាប់សុខ។ប ញ្ជាក់គាត់ស្លាប់ដោយសារឡានបើកបុកពីក្រោយយប់មិញខ្ទង់ម៉ោង៣ទៀបភ្លឺហើយបានស្លាប់ពេលទៅដល់មន្ទីពេទ្យ»។
ដោយឡែក បើតាម ផេកហ្វេសប៊ុក «វេហាស៍ SD» បានរៀបរាប់យ៉ាងកម្សត់ថា «សុគន្ធអើយសុគន្ធម៉េចក៏អាយុខ្លីម្ល៉េះ? ពីរនាក់បងប្អូនដឹកដៃគ្នាមកពីខេត្ត មកប្រលងចម្រៀង តស៊ូលំបាកវេទនារហូតមានឈ្មោះប៉ុននេះ មិនទាន់ទាំងបានសុខសប្បាយលើភាពជោគជ័យផង ហេតុអីព្រហ្មលិខិតមកផ្តាច់ពង្រាត់ជីវិតមនុស្សទាំងស្រស់ញញឹមបែបនេះ?»។
ប្រភព បន្តថា «គន្ធាអើយគន្ធា បងអាណិតប្អូនស្រីណាស់ ដែលមកត្រូវបាត់បង់ បងប្រុសដែលកម្សត់កម្រជាមួយគ្នាទាំងវ័យក្មេងបែបនេះ។ ប្អូនស្រីកំពុងជោគជ័យលើសិល្បៈ មិនគួរណាបងប្រុសមិនអាចឈរមើលភាពជោគជ័យប្អូនស្រីអោយបានយូរជាងនេះ សុគន្ធមានមោទនភាពលើប្អូនស្រីណាស់ អូនត្រូវតែរឹងមាំ ព្រោះសុគន្ធនឹងសម្លឹងមកពីឋានសួគ៌តាមរក្សាការពារអូន រឹងមាំឡើងណាអូន Neang Kunthea»។
ដោយឡែក នាង គន្ធា ជាប្អូនស្រី តារាចម្រៀង នាង ប្រាក់ សុគន្ធ ក្រោយពីបង្ហោះសារបង្ហាញពីទុក្ខសោករបស់ខ្លួនជាបន្តបន្ទាប់ហើយនោះ ក៏បានយកបងប្រុសទៅស្រុកកំណើតវិញ និងរៀបចំធ្វើបុណ្យតាមប្រពៃណីខ្មែរ។
នាង គន្ធា បានរៀបរាប់កាលយប់ពីម្សិលមិញថា «នាងខ្ញុំបានយកបងប្រុស Brak Sokun Real មកដល់ស្រុកកំណើតហើយសូមជម្រាបជូនទៅដល់បងប្អូនជិតឆ្ងាយនឹងមិត្តភក្ដ័របស់បង សុគន្ធ ទាំងអស់គ្នាជូនជាដំណឹង សពរបស់បងប្រុសនាងខ្ញុំនឹងធ្វើការបូជានៅថ្ងៃស្អែកនាម៉ោង 7 នាទីយប់បើសិនជាបងប្អូនចង់ចូលបុណ្យបងប្រុសនាងខ្ញុំតាមរយះ ABA ( 016745060 Neang Kunthea ) ហើយក៍សូមអភ័យដែលនាងខ្ញុំមិនអាចតបរាល់ខំមិននឹងឆាតរបស់បងប្អូន»។
គួរបញ្ជាក់ថា តារាចម្រៀងវ័យក្មេង នាងប្រាក់ សុគន្ធ ត្រូវបានប្រភពរាយការណ៍ថា នាង បានជួបនូវគ្រោះថ្នាក់ចរាចរណ៍ កាលពីរំលងអាធ្រាត្រឈានចូលថ្ងៃទី២៥ខែធ្នូឆ្នាំ២០២១ ក្រោយចេញពីច្រៀងនៅហាងសាច់អាំងហេងៗ២ ក្បែរច្រមុះជ្រូកស្ទឹងមានជ័យ។ បច្ចុប្បន្ន សពត្រូវបានបញ្ជូនទៅស្រុកកំណើតនៅខេត្តប៉ៃលិន ដើម្បីធ្វើបុណ្យតាមប្រពៃណី៕
