ប្រិយមិត្តមួយចំនួន ទំនងជាបានដឹងហើយថា តារាចម្រៀង នៅ ស៊ីនឿន បានសម្រេចភ្ជាប់ពាក្យ ជាមួយនឹងអនាគតភរិយា ដែលជាអាណិកជនខ្មែររស់ នៅអាមេរិក កាលពីថ្ងៃ២៧ ខែធ្នូ ឆ្នាំ២០១៨ បន្ទាប់ពីពួកគេធ្វើការស្វែងយល់ចិត្តគ្នា អស់រយៈយូរឆ្នាំរួចមកនោះ។
តារាចម្រៀង លោក នៅ ស៊ីនឿន បានបញ្ជាក់ប្រាប់នៅពេលនោះថា លោកបានស្គាល់គ្នា ជាមួយអនាគតភរិយា តាមរយៈការចេញទៅសម្តែងនៅអាមេរិក ហើយក៏បានទាក់ទងគ្នា យល់ចិត្តគ្នាទៅវិញ ទៅមក ជិត៣ឆ្នាំហើយ ទើបសម្រេចចិត្តភ្ជាប់ពាក្យតែម្ដង។
ក្រោយពីភ្ជាប់ពាក្យអស់រយៈពេលជាយូរមកនោះ កាលពីអំឡុងខែតុលា ឆ្នាំ២០២១កន្លងទៅនេះ តារាចម្រៀងប្រុសល្បីឈ្មោះប្រចាំផលិតកម្មហង្សមាស លោក នៅ ស៊ីនឿន បានដឹកដៃគូដណ្តឹងទៅថត Pre- Wedding ដើម្បីត្រៀមរៀបការនៅថ្ងៃទី២២ ខែធ្នូ ឆ្នាំ២០២១នេះ។
មុនថ្ងៃរៀបមង្គលការ១ថ្ងៃនោះ នៅ ស៊ីនឿន បានបង្ហោះរូបថត និងធៀបការ នៅលើគណនីហ្វេសប៊ុករបស់ខ្លួន ដោយបញ្ជាក់ថា «យើងខ្ញុំទាំពីរនាក់ សូមគោរពអញ្ជើញ សម្ដេច ឯកឧត្តម ឧកញ៉ា អ្នកឧកញ៉ា លោកជំទាវ អស់លោក លោកស្រី អ្នកនាង កញ្ញា ដោយក្ដីគោរពស្រលាញ់ដ៏ខ្ពង់ខ្ពស់និងជ្រាលជ្រៅបំផុត។ ថ្ងៃស្អែកត្រូវនឹងថ្ងៃទី22/12/21 ជាថ្ងៃ សិរីមង្គល អាពាហ៍ពិពាហ៍ របស់យើងខ្ញុំទាំងពីរនាក់ ដែលនឹងប្រារព្ធពិធីនៅ សណ្ឋាគារ សូហ្វីតែល ចាប់ពី ម៉ោង 6:00ព្រឹកតទៅ»។
នៅក្នុងពិធីមង្គលការរបស់លោកនាថ្ងៃទី២២ ខែធ្នូ ឆ្នាំ២០២១ នេះ គេឃើញរូបលោក និងកូនក្រមុំ ស្រី សោម ជូមូនិច ស្លៀកពាក់ប្រពៃណីយ៉ាងស្រស់ស្អាត មើលទៅសមគ្នាខ្លាំងណាស់។ ក្នុងនោះ គេក៏សង្កេតឃើញវត្តមានចូលរួមពីសំណាក់ លោកជំទាវ ម៉ែន សំអន, លោកជំទាវ ហ៊ុន ស៊ីណាត រួមនឹងតារាល្បីៗមួយចំនួនផងដែរ។
ចំពោះ តារាល្បីៗ ដែលអញ្ជើញចូលរួមនោះរួមនោះ មានដូចជា ៖ ពិធីការិនី ចាន់ កែវនិមល និងស្វាមី, តារាកំប្លែង កាតុ, លោក អ៊ឹម ជីវ៉ា, Eco Vak Song, លោកគ្រី ថៃពៅ, លោកសំ សុវណ្ណារ៉ាក់, អ្នកនាង ឱក សុគន្ធកញ្ញា និងស្វាមី, តារាកំប្លែង ប៉េងប៉ោង, តារាចម្រៀង ជ័យ សុវ៉ាត, នី រតនា និងភរិយា ជាដើម។
នៅល្ងាចថ្ងៃមង្គលការខ្លួននេះ នៅ ស៊ីនឿន បានបង្ហោះរូបថតជាច្រើនសន្លឹក ហើយធ្វើការអរគុនថា «កូន សូមថ្លែងអំណរអគុណ អ្នកម្ដាយ CH Moly យ៉ាងជ្រាលជ្រៅ សម្រាប់ការផ្ដល់ កិត្តយស ដ៏ធំធេង ដឹកដៃកូន ក្នុងពិធី សិរីមង្គល របស់កូន កូនសូមគោរពជួនពរអ្នកម្ដាយ មានសុខភាពល្អ សំណាងល្អ អាយុ យឺនយូរ ជោគជ័យ គ្រប់កិច្ចការងារ»។
តាមរយៈនេះ អ្នកលេងបណ្ដាញសង្គមហ្វេសប៊ុកជាច្រើននាក់ ដែលជាអ្នកគាំទ្ររបស់លោក រួមនឹងអ្នកសិល្បៈមួយចំនួន បានធ្វើការជូនពរស្រដៀងៗគ្នាថា «អបអរសាទរ និងសូមជូនពរឲ្យប្អូនជួបតែសេចក្តីសុខ សុភមង្គលជារៀងរហូត, ជូនពរអោយបងមានក្តីសុខនឹងស្រលាញ់គ្នាដល់ដល់ចាស់, អបអរសាទរ ប្អូន ជូនពរឱ្យមានសេចក្ដីសុខ សុភមង្គល និង ចម្រុងចម្រើន»៕
