លោកអ្នក បានជ្រាបរួចមកហើយថា ករណីប្លន់ផ្ទះលោកជំទាវឧកញ៉ា អ៊ាន សៀវម៉ី កន្លងមកនេះ ត្រូវបានអាវុធហត្ថបង្ក្រាប កាលពីយប់ថ្ងៃទី២០ ខែធ្នូ ឆ្នាំ២០២១ ដោយឃាត់ខ្លួនមនុស្សចំនួន១២នាក់ ក្នុងនោះមានលោក William Guangផងដែរ។
ប្រតិបត្តិការរបស់អាវុធហត្ថខាងលើនេះ ធ្វើឡើងនៅទីតាំងបុរី ប៉េងហួត ផ្លូវ៦០ម៉ែត្រ រាជធានីភ្នំពេញ ដោយកម្លាំងប្រមូលបានគ្រឿងពេជ្រត្រឡប់មកវិញ និងដកហូតអាវុធចំនួន៥ដើម(វែង១ដើម ខ្លី៤ដើម)។
ចំណែកប្រតិបត្តិការរបស់សមត្ថកិច្ចចម្រុះនៃស្នងការដ្ឋាននគរបាលរាជធានីភ្នំពេញ មួយយប់ក្នុងការដេញឃាត់រថយន្ត ដែលជនសង្ស័យប្រើប្រាស់ក្នុងករណីប្លន់ផ្ទះលោកជំទាវឧកញ៉ា អ៊ាន សៀវម៉ី ឈានដល់ការឃាត់ខ្លួនបានជនសង្ស័យចំនួន០២នាក់ ប្រុស ១នាក់ ស្រី ១នាក់ ហើយនៅព្រឹកនេះសមត្ថកិច្ចកំពុងយកទៅធ្វើការសាកសួរបន្តនៅអធិការដ្ឋាននគរបាល ខណ្ឌពោធិ៍សែនជ័យ។
ក្រោយការឃាត់ខ្លួនលោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ដែលអាចជាប់ពាក់ព័ន្ធករណីប្លន់អ្នកលក់អនឡាញនេះ ស្រាប់តែបុរសម្នាក់ប្រើប្រាស់គណនីហ្វេសប៊ុកឈ្មោះ Oun Vansak ធ្វើការបង្ហោះរូបថត ភ្ជាប់ដោយCaptionយ៉ាងចាក់ដោតផ្ទុះការចាប់អារម្មណ៍ពេញហ្វេសប៊ុក។
គណនីហ្វេសប៊ុកឈ្មោះ Oun Vansak បានបង្ហោះរូបថត William Guang កាលពីយប់ថ្ងៃទី២០ ខែធ្នូ ឆ្នាំ២០២១ ហើយដាក់Captionយ៉ាងចាក់ដោតថា «ប៉ូលិសបានចាប់ខ្លួនឯកឧត្ដមកោះត្រល់ ក្នុងរឿងពាក់ព័ន្ធ ករណីប្លន់ ឧកញ៉ា សៀវម៉ី, ព្រះអើយ ខ្ញុំតាមមិនទាន់ទេ, អ្នកលក់ឡេក្លាយជាឧកញ៉ា , មេបក្សនយោបាយក្លាយជាចោរប្លន់,
មិត្តភក្តិល្អដូច Love Riya និងចែកា ក៏អាចក្លាយជាអ្នកដទៃ , គ្រូជោគជ័យក្លាយជាជនទី៣, រីឯអតីតសង្ឃដូចស្រីដា ក្លាយជាទូតសុឆន្ទៈរបស់ហាងម៉ូតូ , ពិភពមួយនេះ ក្រឡាប់ចាក់ខ្លាំងណាស់ ខ្ញុំចង់នៅស្ងៀមស្ងាត់មួយរយៈ!»។
ការដាក់Captionដ៏ចាក់ដោតនេះ មានការចាប់អារម្មណ៍ខ្លាំងណាស់ ដោយគិតត្រឹមម៉ោង១១ព្រឹកថ្ងៃទី២១ ខែធ្នូ ឆ្នាំ២០២១នេះ មានអ្នកចែករំលែកជិត៨ពាន់ដង និងបញ្ចេញមតិជាង៥០០ ក្នុងនោះមានទាំងមតិស្រប និងមតិផ្ទុយផងដែរ។ ជាក់ស្ដែងករណីនេះ ស្រីដាញ ចេញវីដេអូ ប្រតិកម្ម ដោយទទូចកុំឲ្យយករូបខ្លួនទៅធ្វើអាជីវកម្ម ហើយថា បុគ្គលមួយនេះ ប្រសិនជាខ្លួន ប្ដឹង អាចប្ដឹងបាន៕ ដើម្បីកាន់តែច្បាស់ទៀតនោះ សូមទស្សនាវីដេអូខាងក្រោមនេះ ៖
