ចំណងស្នេហ៍របស់តារាចម្រៀងមាឌល្អិតចិត្តធំ តែសម្បូរបន្ដស្នេហ៍ លោក សុខ មេសា ហៅ នាយចឺម ជាមួយនឹងសង្សារក្រោយដែលគេស្គាល់ថា ជាស្រីស្រស់ សេង សុឃីម បច្ចុប្បន្នកំពុងល្អូកល្អិនជាមួយគ្នាកាន់តែខ្លាំង និងហ៊ានបើកជំហរភាពស្និតស្នាលជាមួយគ្នាជាងពីមុន។
ជាប្រចាំ នាយចឺម និងគូស្នេហ៍ តែងតែព្យាយាមរិតបន្តឹងចំណងស្នេហ៍របស់ពួកគេឱ្យកាន់តែមានភាពរឹងមាំ និងបានគង់វង្សយូរអង្វែង តាមរយៈការបង្ហាញរូបភាពស្និតស្នាល និងភាសាផ្អែមល្ហែមនៅលើបណ្ដាញសង្គម ខណៈដែលទំនាក់ទំនងអ្នកទាំងពីរក៏ចាស់ខែចាស់ថ្ងៃ។
ទោះជាយ៉ាងដូច្នោះក្ដី គូស្នេហ៍មួយគូនេះមិនដែលនឹកនា ឬបង្ហើបពីគម្រោងចូលរោងការឡើយ ហើយពាក់ព័ន្ធនឹងករណីនេះ នាយចឺម ដែលជាម្ចាស់បទ «ថ្លៃទឹកដោះ» ក៏ធ្លាប់ឱ្យសារព័ត៌មានក្នុងស្រុកដឹងថា ពួកគេកំពុងតែត្រូវការប្រើពេលវេលា ដើម្បីមើលចិត្តគ្នាបន្តិចទៀតសិន ហើយរឿងរៀបការនៅមិនទាន់គិតនៅឡើយទេ។
គួរបញ្ជាក់ថា តារាចម្រៀងដែលបានអភិវឌ្ឍខ្លួនពីតារាកំប្លែង លោក សុខ មេសា ហៅនាយចឺម ក្រោយពីផ្ដាច់និស្ស័យស្នេហ៍ជាមួយអតីតសង្សារ គឺស្រីស្អាត ហ្វាហ្វា ក៏បានចាប់ផ្ដើមជីវិតថ្មីជាមួយនឹងអ្នកមេម៉ាចាយរាងកូនមួយអ្នកនាង សេង សុឃីម ។
ហើយបច្ចុប្បន្ន នាយចឺម និង ស្រីស្រស់ សេង សុឃីម បាននិងកំពុងកសាងអនុស្សាវរីយ៍ និងភាពផ្អែមល្ហែម ល្អូកល្អិនជាមួយគ្នា ដើម្បីស្វែងយល់ចិត្តឱ្យកាន់តែច្បាស់ មុនឈានដល់ថ្ងៃចូលរោងជ័យ។
ទោះបីជាយ៉ាងណា ជារឿយៗកន្លងមក គេតែងឃើញភាគីខាងស្រីបង្ហោះសារលើបណ្ដាញសង្គមបង្ហាញពីការអាក់អន់ស្រពន់ចិត្ត ដែលធ្វើឲ្យអ្នកគាំទ្រពិបាកកំណត់ថា សំណេរសំដៅទៅកាន់នាយ ចឺម ជាគូស្នេហ៍ ឬក៏នរណាម្នាក់។
ជាក់ស្ដែង នៅថ្ងៃទី១៤ ខែធ្នូ ឆ្នាំ២០២១នេះ សង្សារនាយចឺម បានបង្ហោះសារបែបនេះថា «កុំធ្វើរឿងឲ្យនាងអស់ភាពអំណត់ ព្រោះនាងនឹងមិនស្រណោះអ្នកបន្ទិចឡើយនៅពេលដែលនាងឆ្អែតខ្លាំង ហើយកុំបន្ទោសមនុស្សស្រីថា នាងចិត្តដាច់ »។ នៅពេលមានគេសួរកើតអីនោះ អ្នកនាង សេង សុខឃីម ឆ្លើយថា «អត់អីផងបង អ្នកកាន់page postដើម្បីបានភាពទាក់ទាញ »៕
