អ្នកលេងបណ្ដាញសង្គមទីកតុក និងហ្វេសប៊ុក មានការភ្ញាក់ផ្អើលយ៉ាងខ្លាំង ក្រោយពីទទួលដំណឹងថា VJ តា ប៊ុយ បើករថយន្តស៊េរីទំនើបម៉ាក Range Rover លឿនជ្រុលបុករថយន្ត toyota prius ពីក្រោយ ហើយព្យាយាមបើករត់គេចនោះ។
ករណីនេះ បានកើតឡើងកាលពីវេលាម៉ោង២ យប់រំលងអធ្រាត្រឈានចូលថ្ងៃទី ១៤ ខែធ្នូ ឆ្នាំ ២០២១ នៅចំណុចមុខប៉ុស្តិ៍នគរបាលរដ្ឋបាលស្រះចក តាមបណ្តោយផ្លូវព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញរាជធានីភ្នំពេញ។
បើយោងតាម ម្ចាស់រថយន្តព្រូស ពាក់ស្លាកលេខ ភ្នំពេញ 2AH-7048 បានឲ្យដឹងថា រថយន្តរបស់គាត់ បានឈប់ស្តុប ស្រាប់តែមានរថយន្ត ដែលពាក់ស្លាកលេខ 2BK-8809 មកបុកគូទរថយន្តរបស់គាត់ពីក្រោយពេញទំហឹង។
ម្ចាស់រថយន្តរងគ្រោះ បានបន្តទាំងហួសចិត្តថា បន្ទាប់បង្កគ្រោះថ្នាក់ លោកក៏ចុះមកនិយាយដើម្បីសម្រួលគ្នា ប៉ុន្តែ ម្ចាស់រថយន្ត Range Rover ដែលបើកបរដោយ តាប៊ុយ ស្រាប់តែទាញទូរស័ព្ទមកថត រួចបើករថយន្តគេចចេញពីកន្លែងកើតហេតុ ជាហេតុធ្វើឲ្យគាត់បើករថយន្តដេញតាម រហូតមកដល់ចំណុចផ្លូវសហព័ន្ធរុស្ស៊ី ទើបអាចឃាត់បានតែម្តង។
តាមប្រភពព័ត៌មានពីកន្លែងកើតហេតុបាន ឲ្យដឹងដែរថា នៅមុនកើតហេតុ គេឃើញ មនុស្សប្រុសស្រី ៣ ទៅ ៤ នាក់បើករថយន្ត Toyota Prius មួយគ្រឿងពាក់ស្លាកលេខភ្នំពេញ 2AH-7048 ធ្វើដំណើរតាមបណ្តោយផ្លូវព្រះមន្នីវង្សទិសដៅពីជើងទៅត្បូង។
លុះមកដល់ចំណុចកើតហេតុខាងលើ បានឈប់រង់ចាំភ្លើងស្តុប ខណៈនោះ ក៏មានរថយន្តស៊េរីទំនើបមួយគ្រឿងម៉ាក Range Rover ពណ៌សពាក់ស្លាកលេខភ្នំពេញ 2BK-8809 បើកបរដោយ VJ តា ប៊ុយ ធ្វើដំណើរមកពីក្រោយ ក៏បុករថយន្ត Toyota Prius ពេញទំហឹងតែម្ដង។
ប្រភបន្តថា ភ្លាមនោះរថយន្តបង្កមិនបានឈប់ធ្វើការដោះស្រាយនោះទេ បានព្យាយាមបើករត់ចេញពីកន្លែងកើតហេតុ រហូតដល់ចំណុចមុខអតីតទូរទស្សន៍លេខ៣ ផ្លូវសហព័ន្ធរុស្ស៊ី ក្នុងសង្កាត់ស្រះចកខណ្ឌដូនពេញ ទើបជនរងគ្រោះ បើករថយន្តដេញឃាត់ជាប់។
តាមរយៈវីដេអូ ដែលគេបង្ហោះក្នុងបណ្ដាញសង្គមហ្វេសប៊ុក និងទីកតុកឃើញថា ក្រោយកើតហេតុ VJ តា ប៊ុយដើរមិនត្រង់ផ្លូវផងសង្ស័យស្រវឹងខ្លាំង ត្រូវបានបុរស៣ នាក់ទៀត គ្រាទៅដាក់ក្នុងរថយន្តមួយគ្រឿងទៀត។ ទោះជាយ៉ាងណា នៅទីបំផុត ភាគីទាំងសងខាងក៏បានសម្រួលគ្នា ដើម្បីបញ្ចប់រឿងនៅទីតាំងកើតហតុផងដែរ៕
