រាជធានីភ្នំពេញ៖ បវរកញ្ញា Miss World Cambodia កញ្ញា សារី សុវត្តី បានសម្រេចដាក់ពាក្យប្ដឹងកញ្ញា ម៉ានីតា ពីបទបរិហារកេរ្តិ៍ជាសាធារណៈ និងគំរាមថានឹងសម្លាប់។ នេះបើយោងតាមលិខិតកោះហៅដែលចេញដោយមន្ត្រីនគរបាលយុត្តិធម៌កាលពីពេលថ្មីៗនេះ។
យោងតាមលិខិតដដែលបានកំណត់កញ្ញា ស័ត សុខកញ្ញា ហៅ ម៉ានីតា ចូលទៅបំភ្លឺនៅនាយកដ្ឋាននគបាលព្រហ្មទណ្ឌក្រសួងមហាផ្ទៃ នៅព្រឹកថ្ងៃទី ១៥ ខែ ធ្នូ ឆ្នាំ២០២១ ដើម្បីបំភ្លឺជុំវិញបណ្តឹងរបស់កញ្ញា សារី សុវត្តី ក្នុងករណី បរិហាកេរិ៍្តជាធារណៈ និងគំរាមថានឹងសម្លាប់។
ជុំវិញនូវរឿងនេះ កញ្ញា ម៉ានីតា បានថ្លែងប្រាប់ សារព័ត៌មាន “តារាញូស៍” ថា នាងនឹងចូលខ្លួនទៅបំភ្លឺតាមការកំណត់ដោយអះអាងថា នាងពុំបានធ្វើទង្វើរដូចការចោទប្រកាន់នោះទេ។
កញ្ញា ម៉ានីតា បានសង្កត់ធ្ងន់ថា៖ “ខ្ញុំសុំច្រានចោលនូវពាក្យបណ្តឹងដែល សារី សុវត្តី ចោទប្រកាន់ថា ខ្ញុំបាន បរិហាកេរ្តិ៍ជាធារណៈ និងំរាមថានឹងសម្លាប់។ ខ្ញុំអត់ទទួលទេ ដោយខ្ញុំអត់បាននិយាយ អត់បានធ្វើអីទាំងអស់”។
សូមបញ្ជាក់ថា វិវាទផ្ដើមពីស្នេហាត្រីកោណរវាងបវរកញ្ញា Miss World Cambodia ជាមួយតារាសម្ដែងបុរសសង្ហា សន ពិសិដ្ឋ និងកញ្ញា ម៉ានីតា បានកើតឡើងជាយូរមកហើយតាំងពីជាងមួយឆ្នាំមុនមកម្ល៉េះ។ ទើបតែមួយរយៈចុងក្រោយប៉ុណ្ណោះ ដែលរឿងនេះហាក់កាន់តែឡើងកំដៅ ខណៈភាគី សារី សុវត្តី បានចូលរួមក្នុងកម្មវិធី Miss World Cambodia ជាពិសេសនៅក្នុងវគ្គផ្ដាច់ព្រ័ត្រ។
ថ្លែងមកកាន់ តារាញូស៍ កាលពីពេលថ្មីនេះ សារី សុវត្តី បានគួសបញ្ជាក់ថា មិនមែនសុខៗនាងនឹកឃើញដាក់ពាក្យប្ដឹង ម៉ានីតា នោះទេ ព្រោះនាងមានការមមាញឹកយ៉ាងខ្លាំង។ ប៉ុន្តែរឿងមានដើមចម ដែលនាងចាំបាច់ត្រូវដាក់ពាក្យប្ដឹង។ បវរកញ្ញារូបនេះអះអាងថា នាងមិនបានដណ្ដើមប្ដីរបស់ ម៉ានីតា គឺលោក សន ពិសិដ្ឋ នោះទេ គ្រាន់តែមានទំនាក់ទំនងជាសង្សារនាពេលកន្លងមក ខណៈខាងប្រុសបានបញ្ជាក់ថា បានដាច់ស្រឡះជាមួយ ម៉ានីតា ហើយ។
ដោយឡែក ភាគីលោក សន ពិសិដ្ឋ ក៏បានគួសបញ្ជាក់នាពេលកន្លងមកដែរថា សារី សុវត្តី មិនបានដណ្ដើមប្ដីរបស់នរណានោះទេ។ លោកគ្មានភរិយាឡើយ បន្ទាប់ពីចែកផ្លូវតាមផ្លូវច្បាប់ជាមួយភរិយាមុន លោករស់នៅក្នុងជីវភាពជាពោះម៉ាយកូនមួយ មិនដែលបានចុះសំបុត្រអាពាហ៍ពិពាហ៍ ឬអេតាស៊ីវិល ជាមួយនារីណាម្នាក់ឡើយ។ ដូច្នេះពាក្យថា “ដណ្ដើមប្ដីគេ” មិនត្រឹមត្រូវឡើយ៕
ប្រភពពីតារាញូស៍
ដេីម្បីកាន់តែជ្រាបច្បាស់សូមទស្សនារូបភាពខាងក្រោមទាំងអស់គ្នា៖
