ម្ចាស់មកុដ Miss Universe របស់ប្រទេសកម្ពុជាប្រចាំ ឆ្នាំ២០២១ កញ្ញា ងិន ម៉ារ៉ាឌី នឹងជួបជាមួយ Steve Harvey ពិធីករលំដាប់ពិភពលោកលើវេទិកាប្រកួត Miss Universe ឆ្នាំ២០២១នៅក្នុងប្រទេសអ៊ីស្រាអ៊ែល។
វគ្គផ្តាច់ព្រ័ត្រនៃការប្រកួតបវរកញ្ញា Miss Universe ឆ្នាំ២០២១ នឹងត្រូវប្រារព្ធធ្វើឡើងនៅថ្ងៃ១២ធ្នូឆ្នាំដែលនឹងចូលមកដល់នៅពេលឆាប់ៗខាងមុខនេះ ក្នុងរយៈពេលតែប៉ុន្មានថ្ងៃទៀតប៉ុណ្ណោះ ។
ហើយសម្រាប់ឆ្នាំ២០២១នេះផងដែរ អ្វីដែលកាន់តែពិសេសសម្រាប់ការប្រកួត Miss Universe ដែលកំពុងតែធ្វើឡើងនៅប្រទេសអ៊ីស្រាអ៊ែល នោះគឺការវិលត្រលប់មកកាន់វេទិកាប្រកួតបវរកញ្ញា Miss Universe សារជាថ្មីឡើងវិញ របស់លោក Steve Harvey ដែលជាពិធីករលំដាប់ពិភពលោក។
វត្តមានរបស់លោក Steve Harvey ត្រូវគេជឿជាក់ថា នឹងកាន់តែធ្វើអោយឆាកវេទិកាប្រកួតបវរកញ្ញា Miss Universe ប្រចាំឆ្នាំ២០២១ កាន់តែលេចធ្លោរឡើងបន្ថែមទៀត បន្ទាប់ពីអវត្តមានរបស់លោកក្នុងការប្រកួតបវរកញ្ញា Miss Universe កាលពីឆ្នាំមុន ដោយសារបញ្ហាជំងឺឆ្លងរាលដាលកូវីដ១៩។
ការវិលត្រលប់មកវិញ ជាពិធីករនៅលើវេទិកា ប្រកួតMiss Universe ឆ្នាំ២០២១ គឺជាឆ្នាំទី៦ហើយដែលលោក Steve Harvey ធ្វើជាពិធីករសម្រាប់កម្មវិធីប្រកួត Miss Universe ។
ម្ចាស់មកុដ «Miss Universe Cambodia» ឆ្នាំ២០២១ កញ្ញា ងិន ម៉ារ៉ាឌី នាងជាតារាបង្ហាញម៉ូត ដែលមិនត្រឹមតែមានរូបសម្រស់ស្រស់សោភាប៉ុណ្ណោះទេ ប៉ុន្តែនាងថែមទាំងមានអាជីពជាតារាសម្តែង និងជាពិធីការិនីផងដែរ។ តារាស្រីរូបនេះ គឺជាបេក្ខភាពលេចធ្លោចាប់តាំងពីផ្តើមនៃកម្មវិធីប្រកួត។ នាងមានអាយុ២២ ឆ្នាំកម្ពស់ ១,៦៥ម៉ែត្រ ទម្ងន់ ៤២គីឡូក្រាម និងមានទំហំទាំង៣ ៣២,២៣,៣៤ ។
សម្រាប់ឆ្នាំ២០២១នេះ គឺជាឆ្នាំទី៧០នៃការប្រកួតបវរកញ្ញា Miss Universe ហើយម្ចាស់មកុដបវរកញ្ញា Miss Universe ឆ្នាំ២០២០នាង Andrea Meza នឹងចូលរួមបំពាក់មកុដទៅអោយម្ចាស់ជ័យ លាភីឆ្នាំ២០២១នេះ នៅចុងបញ្ចប់នៃកម្មវិធី ។
ប្រភពពីតារាញូស៍
